1Yohanna 2 - Bible en Guidar

Kristu tay əzzan əbbah səmə

¹ Kirtuwa an nədawver sukuməŋka, vi kədaɗɗaŋ mambray ɓa yi. Ya an ɗəf agəɗək mambraya, mənam tat də məzutərəm aza Afəni, Yesu Kristu məs təstəsə.

² Vi ndəni dəmtə kavviyan mambray namə; ya an nami kaka' ɓa, vi an net ɗiy nammba dələv paki ye'e.

³ Aza aski mədawsənən na məsənəka an mənam tat ərme mahenziŋɗe nani.

⁴ Ɗəf məs dənah na: Nəsənəka ya arme mahenziŋɗe nan ɓa, məwə wəni yi, tay də gegesiŋ ɓa.

⁵ Ya ɗəf an dərma əpel nani, əŋgla na Maŋgəlva tay gərak a makran gesiŋ. Də aski mədawsənən na mənam tat addəvən.

⁶ Ɗəf dədawnəh nan tay addəvən, aslək nan van dədawgən va adawə.

Mahenziŋ meleketeni

⁷ Beyneŋgiɗwa, mahenziŋ meleketen nədawver sukum ɓa, mehenziŋ məzvan məs kəsənaŋ far də ətəŋ nani; mahenziŋ məzvan vanəs na, əpel an kəprəmaŋgi.

⁸ Də as pak na, mahenziŋ meleketen nədawver sukum, gesiŋ an naddəvən ndəni addəvkume'e, adan guzli tay ətoŋgo, əkeɗeɗe an gesiŋ tay əwiɗe.

⁹ Ɗəf məs dədawnəh na tay addəv əkeɗeɗe'e, yaŋ adawzel məlməni, asna tay addəv guzli hã kəkaŋka.

¹⁰ Ɗəf məs dəŋglu məlməni, nan tay addəv əkeɗeɗe'e, zəga tay azan nawtaŋgbaygən ɓa.

¹¹ Ya ɗəf məzuzel məlməni nan ara guzliyi, ara guzliyi adawdawa, dəsən aŋga adaddan di ɓa, vi guzli atipik harani.

¹² In tat əver sukum kirtuwa, mambray nokum avvuyuk aka iya nani.

¹³ In tat əver sukum munokum efiŋgiɗit kirni, vi kəsənənək məs dəsan səza ətəŋ nan farə. In tat əver sukum munokum gewleɗi, vi kəskanənək wəla Zəga mbərayən.

¹⁴ In tat əver sukum munokum kirni, vi kəsənənək Afəni. In tat əver sukum, munokum efiŋgiɗit kirni, vi kəsənənək an dəsan də ətəŋ nan farə. In tat əver sukum munokum gewleɗi, vi gboŋgboŋ kənanaŋgə, əpel na Maŋgəlva tay addəvkum, kəskanənək wəla Zəga mbərayən.

¹⁵ Kədaŋglunən ənziya negge mãy zəga negge ɓa. An ɗəf aŋgluwək ənziya negge, əŋgla na Afən tay azan ɓa.

¹⁶ Vi an dəsan egge pak va əsim na gəɓa zə ɗəfa mãy əsim na hara ɗəfa gəm əkaɓ də arya, dəde səza Afən ɓa, səgge ade.

¹⁷ Ənziya egge də zəga nawsim nan pak watoŋgu; ya ɗəf məzəɗɗa əŋgla na Maŋgəlva wasan hã faɗə.

Məzuzel na Kristu

¹⁸ Kirtuwa, pay an meddirɓe yi, va kəprəmənən na məzuzel na Kristu tay əzzani əŋka. Ya kəkaŋ vani, məzuzelɗe na Kristu tahəŋ diyɗa. Səza aski mədawsənən na pay an meddirɓeyi əŋka.

¹⁹ Səram agulyoŋgu, ya naraməŋgə ɓa. Va naraməŋgə na, wassoŋ də mənam kəta. Ya vi dərbaŋgən na naraməŋgə pak ɓa yi.

²⁰ Ya nokum, kərahaŋ Zeŋgile Salala səza Kristu, ndəni kəsənaŋ gegesiŋ baymokum.

²¹ Nəver sukum na vi kəsənnən gegesiŋ ɓay ɓa, kəsənnənkayi, uwawən tay dəde səza gegesiŋ ɓa.

²² Ya naway məstepelke van an ɗəf mənah na Yesu na Kristu wi ɓa ɓa di? Ɗəf as məzuzel na Kristuwi. Məzuzelen Afən də Wətəni.

²³ Ɗəf məs dədawzelen Wətən pak tay də Afən ɓa'e. Ɗəf məs dətaf Wətəni, tay də Afəni'e.

²⁴ Nokum an məs kəprəmaŋ də ətəŋ nan farə, dəsan a makrokum. An məs kəprəmaŋ də ətəŋ nan farə, an tay a mokrokum, asna mənokum tat addəv Wətəni gəm addəv Afəni.

²⁵ Aski iynama məs aynan man səmə, ndəni zeŋgile an faɗə.

²⁶ Zəgeɗ nəver sukuməs na, aka wən net ɗiy məs dədawzokumni.

²⁷ Ya nokum Zeŋgile Salala məs kərahaŋ səvanəŋ dəsan a makrokum, wəray tay ɗəf dərbə sukumgən zəga ɓa, adan Əmpəs nan tay əyogokum aka zəga pakə, ya gegesiŋgi awa wən ɓa. Məssoŋ addəvən va ayagan sukum.

²⁸ Ya kakaŋ kan na, kirin nawa, məssoŋ addəvən, vi va pay arban zən pak na məsamgən fendeŋgi, wil adawzargəmən səzan ɓa' pay nazza nan ɓa.

²⁹ An kəsənnənək na nan təstəsi, məsənna ɗəf məgəɗ təstəs pak ndən duwa.