1Timote 6 - Bible en Guidar

¹ Belemɗe məzutafaŋ pak dəgagadeketini deyeɗe neti, dəɗinən kiyit vi adawpeleŋ mbərayən aka Maŋgəlva gəm aka ərba nam ɓa.

² En məs deyeɗe net məzutafaŋgə, adawzeletin vi assoŋ məlma ɓa. Dəsokən zit əgəɗ sit wəza day dərəŋgə, vi məzutafaŋgəŋgə gəm ɗiy məs Maŋgəlva aŋgələ dədawzəmən ma wəza moggon an adaɗɗaŋgə. Arban wənəska, asɓet ɗiy aka wən nani.

Əyakɗe mbəreyti gəm aryeɗ en gesiŋ

³ An ɗəf tay əɗɗa əyak maɓɓani, məs dəziw aka əpel salala na Daya nam Yesu Kristu gəm aka geslne na Maŋgəlva ɓa,

⁴ asna əɓaygən kiya atipik harani, zəga tay asən ɓa. Əbay ma adaŋgla gəm ərma mama də wənəska. An məs dədazzan səza wənəska ndəni: Kotoroku, əgaya, əra gəm əssa mbərayən,

⁵ əgay nan məza meŋge ɓa yi a walaŋgit məza əsən aket ɓa, gegesiŋ azək sə ma hereti. Azet na, əgeslne sən Maŋgəlva na, suwer ərəh arya yi.

⁶ Gesiŋ, əgeslne' sən Maŋgəlva van suwer ərəh arya metiŋgini, an ɗəf tay əɓap ənnek də an navani.

⁷ Vi vam mekeleŋ məde egge, zəga tay mədawɓap əka avam ɓa'a.

⁸ Vini an mənam tat də zəga nawzəma də an nawgulo məki azamə.

⁹ Ya ɗiy məkayaŋ arya wabətaŋ addəv əraka, addəv mazzaɗə gəm addəv əsim zəga na dərwa diyɗa, mbərayən, məs dədawtoŋgit ɗiy addəv əraya gəm əza kuɗupə.

¹⁰ Vi əsim deleɗi, ndəni slalwãy mambray pakə. Ɗiy meɓɓet asiminik sawɓa, hã amzləhaŋgək ki ətaf neti, akiyənək əzəmsahã diyɗa aka ziti.

An məs nəɗi wən nan in sən kiwa

¹¹ Ya is ɗəf na Maŋgəlva azar səza zəga vaska. Akayan təstəsə, geslne na Maŋgəlva, ətafa, əŋgla, əɓəsa gəm mokrok zazaya.

¹² Agay əgay moggon vi ətafa, arma zeŋgile nassa faɗ məs məyuk akani məs kərban də əpel moggon karet ɗiy pakə.

¹³ Aba Maŋgəlva nəɗi suk wən nani, ndən məzəpsit zeŋgile sit zəgeɗ pakə, də aba Yesu Kristu məs dəpel əpel moggon nawtaf aba Pontiyus Pilat.

¹⁴ Nok arma wənəs a mokroko məza mbərayən azan ɓa, məza nawrəh əpel akan ɓa hã gap pay Daya nam Yesu Kristu adarban zəni.

¹⁵ Məs Məlĩ metiŋ, Afən əɓapa, Məlĩ net məlyeŋge, Daya net deyeɗe arban də pay nan məs məɗiyə.

¹⁶ Ndəni takərgən məza amta ɓa, tay addəv əkeɗeɗe məs ɗəf aɓap əgap azan ɓa, ɗəf tay dula ɓa, ɗəf tay nawɓap ulan ɓa'a. Gagdak də əzəm məlĩ nani hã faɗə. Amin.

¹⁷ Aɗi sit wən nan sit məsaryeɗ kakaŋ naka dəlvəŋka, adawkaɓaŋ ɓa, adawɗiyən mekret aka arya məs asana faɗ ɓaŋ ɓa, ya dəɗiyən mekret aka Maŋgəlva məs dədapsəm zəga pak na mekeleŋ, mənekengən zəm dəndən.

¹⁸ Anah siti, dəɗɗaŋ moggoni, dəssoŋ məsaryeɗ net wəzeɗe lelewɗe, dəssoŋ məzuvəla, dəbbahaŋ sitin ɗiy meɓɓet də arya neti.

¹⁹ Vas na, tay əkkalanən arya moggon an ɓəlɓələ vi pay nabe, vi dərəhaŋgən zeŋgile an gesiŋ gesiŋ.

²⁰ Timote, arma wən an məɗi suko. Azar səza əpel məraygən wən na Maŋgəlva gəm səza əsən na uwa wəna.

²¹ Ɗiy meɓɓet agagdakanən əsən nan ama heret ɗiyi, ya amzləhaŋgək ki tive na ətafa. Mbəlembəle na Maŋgəlva dəsan də munokum.