1Timote 5 - Bible en Guidar

An dəslə naɗɗa ammbet məzutafaŋ

¹ Kədawhayãn mazza dəhay ɓa, apel sən va sən afuko, sit gewleɗ tamə, va sit milmiŋgiɗko,

² sit gil məsɓeti, va sit mãy moko; sit gil en kirin kirini, va sit milmiŋgiɗuk məguluŋgiti, də mokrok barə.

³ Aɗi kiyit gil net gəbayɗe, en dəssoŋ gil net gəbayɗe gesiŋ gesiŋ.

⁴ Ya an gagəbay tat dit kirni awaniɓa dəhiŋgiɗta, dəyaganən əɗɗa wəza na əgeslne sən Maŋgəlva eŋgil anetda daabəŋ, də əvəl sit migilti, vi wən nan moggoni aba Maŋgəlva.

⁵ Akən gagəbay gesiŋ, təsat də gəlata, məs təɗi əɗɗum nat pak aka Maŋgəlva, dəfəf də kapay pak, tat əsok zət əssõh gəm əkkama.

⁶ Ya akən məzukay əssa neneke, nat məmtəttə, də təsat madarat zlaŋgə.

⁷ Aski məs kədawɗi wən nani, vi dəssoŋgən məza wən aket ɓa.

⁸ An ɗəf azga sləma aket ɗiy nan ɓa, sasak en neŋgil ananda, dəɗi kiyən aka ətaf ɓa yi, azganka, dəɗah məs dətaf ɓa kini.

⁹ Kawverət gagəbay aret gil net gəbayɗe na, təsat siɗikke nan də əzva kaklaw sləre, təsat zil taka təɗi kaka'ə;

¹⁰ ɗiy dəsəntən sən wəza moggon nata: Vi təzgələk kirni, tətafək melekeɗi, təskoɓək tilit ɗiy en salala, təbbah siti ɗiy en dəssoŋ addəv əzəmsahã, təppanək kiyət ammba wəza moggon awandi pakə.

¹¹ Dəwəl sit gil net gəbayɗe en kirin kirin hara na, aɓoŋgu. Vi an mãy net aɗohik səza Kristu, waŋglaŋ əmsak əɗi zile.

¹² Vasna wassoŋ də wən mətawən aketi, vi dəzbanən an məs aynaŋ maddaabəŋ ɓa.

¹³ An dəday əmpa na, tay an məs adaɗɗaŋ ɓa, tahəŋ kəŋkəŋ anet ɗiy da, tay an adaɗɗaŋ ɓa yi kaka ɓa, ndəɗaŋ ɗewsən əpele, wən awziw amet ɓa, əpeleŋ an dəslə nawpel ɓa.

¹⁴ Nəŋgəl kan na, gil net gəbayɗe en kirin kirin dəmsak əɗiyaŋ zile, duwaŋ kirni, dərmanən gəla neti, adappaŋ tive sən məzuzel dəpelgən mbərayən ɓa.

¹⁵ Vi en meɓɓet amzlahaŋgək səkay ammba Satan.

¹⁶ An məzutafək tat dit gil net gəbayɗe eŋgil annatda, təbbah siti, vi adawyan Gəla na Maŋgəlva ɓa, vi dərahgən əbbah sit gil net gəbayɗe en gesiŋ gesiŋ.

¹⁷ Ɗiy məsɓet en mədawgənən wəza moggon na, adahək nawfaɗ sit təl sula, sasak en məzuyaŋ addəv ərbawəna gəm əɗɗa əyaka.

¹⁸ Vi Əver amna: Kədawgul taɓak ama wasli məzərga hay ɓa. Gəm əmpa na: Məgəɗ wəza aslək dəragən əfaɗ na anza nani.

¹⁹ Kədawtaf dolgoy aka ɗəf məsɓan an miziweɗe, tay ɓa tay ɓa na, tahəŋ sula awaniɓa hoku ɓa ɓa.

²⁰ Məzəɗɗaŋ mambraya, ahẽyẽt karet ɗiy pakə, vi ɗiy en dəppaŋ dəgeslne'eŋgəni.

²¹ In tat əkkamok aba Maŋgəlva də aba Yesu Kristu dit maslayɗe məs məwelti, arme zəgeɗis məza də əɗɗum mbərəŋ aket ɓa, məza əŋgəl sən ɗəf maɓɓan dayki mbərən ɓa.

²² Kədawɗi vok də kakara aka ɗəf ɓa, kədawtoŋ addivit mambrayɗe na ɗəf maɓɓan ɓa, is vatə aga zuk salala.

²³ Kədawsa iŋkile kaka ɓa, dəɗah asə mbazla siɗikke siɗikke, vi wən na gədəvkuŋka gəm viyit gbəgba'ɗe nok ɗarɗarəŋka.

²⁴ Mambray net ɗiy meɓɓeti, biɗimbiɗimi tak ətawwən aketi, net ɗiy meɓɓet tamə dərɓedərɓe adarba.

²⁵ Vaski yi'e wəzeɗe moggeti, en biɗimbiɗim dit en tahəŋ vas ɓa pak aɗamaŋ na ɓa.