1Timote 4 - Bible en Guidar

Əyak sən Timote aka wəza nani ( 4:1—6:21 ) Mərbaŋ əyak na tepelke

¹ Əmpəs na Maŋgəlva anahək kotakə, gu'o aza əgrak na dələv na ɗiy meɓɓet wappanən ətaf neti, wappanən kiyit sən əmpəs məmakan ɗəfa gəm sən əyak net tuyeŋge.

² Wazbanən muluvuluvu net muwaŋ wəna, məs məslar əɗɗum na makret də təbəz nziliwnziliwi.

³ Watakən əɗi gulku. Watakən əzəm zəgeɗ meɓɓet temtem məs Maŋgəlva azəməɗə, məs məzutafaŋ en dəknahaŋ də əsən na gegesiŋ adawzəmaŋ də əɗɗa soko.

⁴ Vi zəga məs Maŋgəlva azəməɗ pak moggoni, tay an nazga, an mətafək də əfət ɓa.

⁵ Vi əpel na Maŋgəlva də əkkam wakkpaŋgan salala.

Məgəɗ wəza na Yesu Kristu moggoni

⁶ Darbet zəgeɗis sit milmiŋgiɗuk na, wakəsok məgəɗ wəza na Yesu Kristu moggoko, məs məzəmguk də əpel na ətafa gəm də əyak moggon məs kəzbə lewlewi.

⁷ Ya məraygənən wəna gəm mambet ɗar mekeleŋ net gil mezzeɗi, aɓoŋgu. Appan kiyuk addəv gəslne na Maŋgəlva.

⁸ Vi əsərəkgən zə ɗəfa ətərwəray nan siɗikke yi, ya geslne na Maŋgəlva na, tay ətərwəray aza zəga pakə. Tay də iynama na zeŋgile kakaŋka, gəm an nazzani.

⁹ Əpel dəslə nawtafi gəm aslək ɗiy pak dətafəngəni.

¹⁰ Vini kan mədaya əɗɗa wəza, mədawgaya, vi məɗiyək əga nam aka Maŋgəlva madarani. Ndəni məkõhgit ɗiy pakə, sasak məzutafaŋgə.

¹¹ Aɗi wən nani gəm ayegeti.

¹² Ɗəf adawzelok vi kəsok gawla ɓa. Asok azet ɗiy məs dətafaŋ pak va zəga narban sit tive, də əpele, də ədawa, də əŋgla, də ətaf gəm də əssa salala.

¹³ Dawga əzza nawa, appan kiyuk sən əŋɗan ɗerewel na Maŋgəlva, sən əsɓeti gəm sən əyaka.

¹⁴ Kədassok məza əzga sləma aka əvəl na mbəlembəle, məs məpsuk də tive na kəleŋ gəm əɗi va ɗəf məs əsap net ɗiy məsɓet aɗiyən akokuŋ ɓa.

¹⁵ Asok məzlək sləma aket zəgeɗiski, vi əmbat nok abe abe dərbəgən ama heret ɗiy pakə.

¹⁶ Azlək sləma aka zək noko gəm aka əyak noko, aziw ɓəlɓəl aket zəgeɗiski, vi də əɗɗa vaski kədawkõhgən kiyko gəm en məzəprəmkuni.