1Timote 3 - Bible en Guidar

Daya net məzutafaŋgə

¹ Əpəl an dəslə nawtafi yi: An ɗəf akayək wəza nawsan daya net məzutafaŋgə, wəza moggon aŋgələ.

² Aslək kan na, daya dəsangən məza də wən akan ɓa, dəsan guluk taka, məzərma zəni, məs maɗɗulani, məgəɗ məs dəslə, mətaf melekeɗi, məɓap ərba zəga.

³ Adawsan ɗəf məs dəppan ki zən sən mbazla ɓa, adawsan məŋgəl əgay ɓa, dəsan makran zayə, adawsan məkaymama ɓa, awaniɓa məŋgəl deleɗ diyɗa diyɗa ɓa.

⁴ Dədawgən gəla nan moggon moggoni, dərme kirtin addəv əprəm ma gəm əɗikiya.

⁵ An ɗəf dəsən ədawgən gəla nan ɓa na, mbari adawɓap əzga sləma aka əsap net məzutafaŋ na Maŋgəlva di?

⁶ Adawsan malakan addəv ətaf ɓa, kuzuŋ wagagdakan zəni, asna wabət addəv ətawwən va na Satan.

⁷ Dəsan ɗəf məs ɗiy nappaka adawpeleŋ akan moggoni, vi adawzelenin mãy adawbəta addəv mazzaɗ na diyabəl.

Məzəbbahaŋ

⁸ Vaski yi'e məzəbbahaŋgə, dəssoŋ də maɗɗulet moggoni, adassoŋ matakatakeɗ ɓa, adappanən kiyit sən əsa mbazla diyɗa ɓa, awaniɓa məzəŋgla ərəh net wil ɓa.

⁹ Dəssoŋ də məɗama na ətafa də əɗɗum na makret barə.

¹⁰ Net pak aslək ula an nazet tagay. Siske, an wən tay aket ɓa na, dəɗɗanən wəza neti.

¹¹ Gil pak vaska'e, dəssoŋ də maɗɗulet moggoni, adassoŋ məgeyetin ɗiy ɓa, dəssoŋ mətaɗən ziti, məɗɗaŋ zəga pak aka tələn.

¹² Məzəbbah pak dəsan zələt guluk taka, dəsan məlĩ aket kirtini də aka gəla nan moggon moggoni.

¹³ Vi en dəɗɗanən wəza moggoni, warəhaŋ gagdak aret ɗiyi, waɓapən əpel kiyit foŋgo aka ətaf net naddəv Yesu Kristu.

Wən məɗama metiŋgini

¹⁴ In tat əver wənɗeŋ də əɗɗum nazzaw azok go'u.

¹⁵ Də as pakə, an nəliyək na, kəsəngən va mbar kəssok addəv Gəla na Maŋgəlva di, va ənəh na ɗiy na Maŋgəlva madarani, məs dəsan dədəka gəm gabba gegesiŋ.

¹⁶ An məsən sap yaŋka, məɗama na geslne na Maŋgəlva van metiŋgini: Ndən məs dərbə addəv gəɓa zə ɗəfa, məs Əmpəs arban na təstəsi, məs dərban zən azet maslayɗe, məs mətəlma aka wən nan aweleŋgit ɗiy-ɗarə, məs dəsan ka zəga nawtaf egge, məs məslan a disiŋ addəv gagdaka.