1Timote 1 - Bible en Guidar

Ətoŋ addəvən ( 1:1-2 ) Əsɗa

¹ Pol maslən na Yesu Kristu də əŋgla na Maŋgəlva məkõhgəmə, gəm Yesu Kristu əga namə.

² Sən Timote wətu məs də gegesiŋ addəv ətafa. Mbəlembəle, ulasahã gəm zazay səza Maŋgəlva Afən də Daya nam Yesu Kristu dəsan akoko.

Əyak temtem duwəl sən əsap net məzutafaŋgə gəm ɗiy gugriɗ na wəza ( 1:3—3:16 ) Əzga' aka wən na əyak mbərayən

³ Nəkkomokuk kəsokgən a Efesus, aka nədawmbat a Makedoniya, vi kəɗigən wən nan sit ɗiy meɓɓet adaɗɗaŋ əyak temtemi.

⁴ Adappanən kiyit sən mamba gəm sən wən na mazlalwãh məza agrak ɓa ɓa. Vi wən nan əbayma adawki ɗar ki ədawgən wəza na Maŋgəlva məs naɗɗa də ətaf dərəŋgə.

⁵ Wəray na wən məɗinəs na: Ndəni əŋgla məs də makra ɗəf barə, əɗɗum moggoni gəm ətaf məza matakataka ɓa.

⁶ Ɗiy meɓɓet amzləhaŋgək ki tive moggonəska, tahəŋ əzbanən əpel ɗarə.

⁷ Tahəŋ ulanən zit va mərbaŋ-mahenziŋ, ya awsənən gabba an məs adawpeleŋ ɓa, awsənən zəga məs adawziweŋ akan taŋtaŋ ɓa.

⁸ Məsənək mahenziŋ na moggoni, an ɗəf tay əzban va an dəslə,

⁹ Məsənəka, mahenziŋ tay vi ɗəf an təstəs ɓa, tay viyit məs tahəŋ də mahenziŋ ɓa, ɗiy məɓoŋti, məzelen Maŋgəlva, məs mambrayɗe, məraygənən zəga na matuya, məraygənən zəga salala, ɗiy məbayaŋ efiti məbayaŋ meti, dit məbayaŋ gəbaya,

¹⁰ viyit məkuhwaŋ a gizbe, məvunoŋ dit zel tusso, viyit məvəlaŋ belemɗe, dit məwaŋ tepelke, dit məswayaŋgə, dit məɗɗaŋ zəga maɓɓan nawraygən əyak an salala.

¹¹ Əsən vanəs aslək də Alabara Nenek na gagdak na Maŋgəlva nawɗi kiyən məs məppan avawa.

Əsoko sən Maŋgəlva vi moggon nani

¹² In tat əɗɗa soko sən məs dəvay əɓapa, ana Yesu Kristu Daya namə, məs dula na nədahək nawɗi kiyən akaw nawɗiyu aka wəza nani.

¹³ Lahəŋ na, nəpelik mbərayən akani, nəsərək met ɗiyi, məkay mama, ya awlak sasãhwã, vi nəsən gabba məs nədaɗɗa ɓa sən in tat də ətaf ɓa.

¹⁴ Ya mbəlembəle na Daya nam azlərək akawa, avayək ətafa də əŋgla addəv əsap də Yesu Kristu.

¹⁵ Əpeliŋ gesiŋgi, aslək nawtaf təstəsə, Yesu Kristu adek aka dəlva, vi kakõhgit ɗiy məɗɗaŋ mambraya. Intə daabəŋ nereti,

¹⁶ ya sən aski Maŋgəlva awəl sahã akawa, vi Yesu Kristu dərbangən əɓəs nan diyɗa akaw daabəŋ, vi nəsawgən nawsla ki van azaw a waleŋgit ɗiy məs nawtafəni, məs dədawrəhaŋ zeŋgile nassa hã faɗə.

¹⁷ Gagdak gəm əɗikiya va sayit ɗiy amə' pak sən məlĩ məs faɗə məs amta ɓa, məs awlanən ɓa, ndəni Maŋgəlva kaka'ə. Amin.

¹⁸ Timote wətuwa, aŋki wən məɗiyən məs nəppan avoko, məs dəslə də əpel na kəleŋ məs məpel akok lahəŋka. Vi kəmpagən tuluk akani, kəlpəgən əlpa moggoni,

¹⁹ də ətafa gəm əɗɗum moggoni. Ɗiy meɓɓet dəzbanən ɓa, məlpa akak ətaf neti.

²⁰ Himeneyus də Alekzaŋdər tahəŋ areti, nəppetik ava Satan, vi dəzga'aŋgəni, dəppanəngən əpel mbərayən aka Maŋgəlva.