1Tesaloniki 5 - Bible en Guidar

Məsoŋ də wəzaɓan zukum vi wəziya na Daya

¹ Milmiŋgiɗwa, dəwəl sən paya gəm ənziya nan na, mənokum tat də wəray nawver sukum aka wən nan ɓa.

² Vi munokum sən kikum kəsənənək lewlew na, pay na Daya na, va məhal dəfɗa vas adazzani.

³ Pay adawnahaŋ na: Addəv zay mənani gəm fendeŋ mənani, əza wade aket mədəgirzike va daway ada waksət gulku, sessel akohoŋ na ɓa.

⁴ Ya nokum, milmiŋgiɗwa, ara guzli kənanaŋ ɓa, ka pay nan adazzan ərəmkum girzik va məhal ɓa.

⁵ Munokum pak kirtin əkeɗeɗe kənanaŋ, kirtin kapay kənanaŋ, ɗiy na dəfəɗ mənan ɓa, na guzli ɓa.

⁶ Vi vaski mədawleŋ va net ɗiy meɓɓet ɓa, məsamsəm ɗezleŋge gəm məgasəm ki zəmə.

⁷ Vi məzuleŋgeŋ dəfəɗ adawleŋgeŋ, məs mbazla adawbay dəfəɗ adawbeyti.

⁸ Ya nam, mənam ɗiy na kapay, məga səm ki zəmə, mugul səm ətafa gəm əŋgla va lukut na təbza, əga nawkõh va kulpup nawgaya.

⁹ Vi Maŋgəlva dəɗiyəm ka gədəvən dədəgən akam ɓa, ya aŋgələk mərahgən əkõh də Daya nam Yesu Kristu.

¹⁰ Məs dəmtə vimə, vi, kəta məsam ɗezleŋge, kəta məmtə zlaŋ məsamgən madaram dəndəni.

¹¹ Vi vaski məsɓan zukum gəm məɓɓəlan zukum addəv ətafa, va kədaɗɗanən səkayə.

Əpel an bayma faɗə ( 5:12-22 ) An məɗi wən nani gəm əsɗa an bayma faɗə

¹² Milmiŋgiɗwa, mənam tat əkkamokum məɓe sit məɗɗaŋ wəza a waloŋkum, məs Daya aɗi abokum dəzga'aŋ sukuməni.

¹³ Məgagdaketi, məŋgliwe, vi wəza məs adaɗɗaŋ a waloŋkum, məssoŋ zay a walaŋ zukum.

¹⁴ Mənam tat əkkamokum milmiŋgiɗwa, məhayet mətampəlɗe, məsəɓ sit ɗiy məs makret məmtəni, məbbah sit ɗiy məddekti, məɓəs wən net ɗiy pakə.

¹⁵ Məzi zukum ɗəf adamndan mambray də mambray sən ɗəf ɓa, ya məzban əɗɗa moggon pay pak a walaŋ zukum də azet ɗiy pakə.

¹⁶ Mənneken zukum pay pakə.

¹⁷ Məkkam ɗayɗayə.

¹⁸ Məgəɗ soko vi zəga pakə, vi ndəni əŋgla na Maŋgəlva azokum də Yesu Kristu.

¹⁹ Kədamtanən wəza na Zeŋgile Salala ɓa.

²⁰ Kədawzelenən əpel na kəleŋ ɓa.

²¹ Məkoson gabba zəga pakə, mərma an moggoni.

²² Məzar səza mambray zev awandi pakə.

Əgrakən ( 5:23-28 )

²³ Maŋgəlva afən zazay sən kiyən dubburkum tu'tu'u, gəm dəgagən zukum gərak lewlewi, əmpəs nokum, magenegenekum gəm gəɓa zukum, vi kəssoŋgən məza heslepe ɓa pay nazza na Daya nam Yesu Kristu.

²⁴ Maŋgəlva məs dəyukuməŋka təstəsi, ndəni naɗɗani'e.

²⁵ Milmiŋgiɗwa məkkam viymə'e.

²⁶ Məsɗet milmiŋgiɗəm pak də ərma zukum na zazaya.

²⁷ In tat əkkamokum də iya na Daya, məŋɗan letərəŋ a walaŋgit milmiŋgiɗəm baymeti.

²⁸ Mbəlembəle na Daya nam Yesu Kristu dəsan də munokum.