1Tesaloniki 4 - Bible en Guidar

Əpel aka ədaw net məkristuɗe ( 4:1-12 ) Ədaw məs Maŋgəlva aŋgələ

¹ An dəpəl kan na, milmiŋgiɗwa, mənam tat əkkamokum gəm əsɓokum addəv Daya Yesu, va an məs kəprəmaŋ səmam va mbar kədawdawaŋ va an Maŋgəlva aŋgələ di, vas van kədawdawaŋgə, məsok zukum əmbat abe abe.

² Kəsənənək va an mərban sukum an dəde səza Daya Yesu.

³ An məs Maŋgəlva aŋgəl na: Ndəni əssa salala, faraɗa də əɗɗa ɗarɗarə.

⁴ Naway di pak sərokum dərma ki zən addəv ənziya dət gulkun də əssa salala gəm əɗi kiya,

⁵ məza əppan zən addəv əsim an dərwadərwa va net ɗiy məs dəsənən Maŋgəlva ɓa adaɗɗaŋ ɓa.

⁶ Ɗəf adawgəɗ sən mbərayən sən məlmən aka wənəs də ətak an dəsan nan ɓa, vi Daya wataw wən aket ɗiy məɗɗaŋ zev mambray vaska, va mənah sukum lahəŋka, yaŋ mənah sukumək əmpa.

⁷ Vi Maŋgəlva dəyəm məsamgən addəv haramba ɓa, ya məsamgən salala iyi.

⁸ Vas kan na, ɗəf an dəzgan wənəska, ɗəf azgə ɓa, ana Maŋgəlva məs dədapsukum Zeŋgile nan Salala azgə.

⁹ Aka wən na əŋgla na məlma na, wəray tay nawver sukum əmpa ɓa, vi Maŋgəlva sən kiyən arban sukumək va kədaŋgluwən zukum.

¹⁰ Gesiŋ munokum tat əɗɗanən vas azet milmiŋgiɗkum na Makedoniya pakə, ya mənam tat əsɓokum milmiŋgiɗwa kəddoŋgən abe abe də wən nani.

¹¹ Məsok zukum kəssoŋgən zayə, də əɗɗum aka zəga nokum sən kikum, də əɗɗa wəza nawzəm nokum, va məɗi sukum wən nan səkayə,

¹² ka ədaw nokum dərbəgən va an dəslə azet ɗiy-ɗarə, kədassoŋ vi ɗəf ɓa.

Əyak aka wən na əmilye na Kristu ( 4:13—5:11 ) Əmilye na Daya

¹³ Ya milmiŋgiɗwa, mam tay aka kəssoŋgən slamma aka wən net ɗiy mimtit ɓa, vi kədassoŋ addəv əɗəka va ɗiy meɓɓet məs tahəŋ də əga ɓaŋ ɓa.

¹⁴ An mətafək na Yesu amtəka gəm asilke, vaski yi'e ɗiy en dəmtaŋ də Yesu, Maŋgəlva wasilgit sap dəndəni.

¹⁵ Aŋki məs mədawnah sukum də əpel na Daya: Mənam məs məpəl madaram hã gap əzza na Daya na, sessel məmbat na daabəŋ kiyit ɗiy en dəmtaŋ ɓa.

¹⁶ Vi Daya sən kiyən waprik sə disiŋ də wiya dayadaya, də wəla maslay an daya, də gozloro na Maŋgəlva, asna ɗiy en dəmtaŋ addəv Kristu wasilyoŋ tagay.

¹⁷ As kana mənam məpəl madaram kakaŋ na, kawslami mənam pak sap dənɗaŋ aka slaybuwna, vi kalma də Daya a disiŋ. Vaski kan mədawsam də Daya pay pakə.

¹⁸ Vi vaski məsɓan zukum də wənəska.