1Tesaloniki 2 - Bible en Guidar

Wəza na Pol a Tesaloniki

¹ Milmiŋgiɗwa, munokum sən kikum kəsənənka, əmbat nam anokumda na tay ɗar mekeleŋ ɓa.

² Kəsənənka, tak əgap nam anokumda na, məzəmgəmi sahã gəm mərami a Filipi. Ya Maŋgəlva asɓaməka vi məpel sukumgən Alabara Nenek nani, də wən ɗarɗar asil zlaŋ.

³ Wən məs mədawpeliŋka dəde səza tepelke ɓa, səza əɗɗum mbərayən ɓa, əmbəɗet ɗiyi ɓa'a.

⁴ Ya Maŋgəlva akkesik an na zamə, apsəmək tive nawpel Alabara Neneke. Vas kan na, an nannek zit ɗiy mədawpel ɓa, abbər an nannek zə Maŋgəlva, ndəni məzəkkoson makramə.

⁵ Kəsənənka, də əpel nawlef mədawpel ɓa, əŋgla nawrəh deleɗ tay dəɗam addəv əpel nam ɓa. Maŋgəlva yi miziwe namə.

⁶ Məkay gagdak avet ɗiy ɓa, avokum ɓa, avet ɗiy meɓɓet ɓa.

⁷ Gesiŋ waməɓap ərban gagdak nam sukum vi maslənɗe na Kristu manan kəta, ya məvoŋgənək kiyəm a waloŋkum, va met kirin tədazga sləma aket kirtəta.

⁸ Də zev əzga sləma vaski, mulak lew, nawpel sukum Alabara Nenek na Maŋgəlva yi kaka ɓa ya məpsukumək zeŋgilem zək namə'e, vi kəkkpaŋgaŋgək ɗiy na makramə.

⁹ Vini, milmiŋgiɗwa, məɗɗumon əzəm sahã də iya namə. Məgəɗək wəza dəfəɗ də kapay pakə, vi mədawsam va zəga gagdak aka ɗəf səmmbokum ɓa, mərban sukumək Alabara Nenek na Maŋgəlva.

¹⁰ Miziwe nam kənanaŋgə gəm Maŋgəlva, məsamək va an dəslə, təstəsə gəm məza wən akam ɓa a walaŋkum munokum məs kətafaŋgə.

¹¹ Mənokum zək nokum kəsənnənka, məgəɗək də naway di səmmbokum pak va afit kirin dit kirtini.

¹² Məpel sukumko, məsɓokumko, məziwgukumko vi kədawaŋgən va an dəslə də Maŋgəlva məs dəyukum aka məlĩ nan də gagdak nani.

¹³ Vi wən nani məppana əɗɗa soko sən Maŋgəlva ɓa, vi kətafənək alabara na Maŋgəlva sə mamə, kətafən va əpel net ɗiy ɓa, ya va əpel na Maŋgəlva kətafən gesiŋ gesiŋ. Tay əɗɗa wəza a makrokum munokum məs kətafaŋgə.

¹⁴ Milmiŋgiɗwa, kəkkpaŋgaŋgək ɗit məs dəgəmən tilit məzutafaŋ na Maŋgəlva en na Yude məs dəssoŋ addəv Yesu Kristu. Vi nokum pak kəzəmaŋgək sahã vaska'e, avet hilfiŋgiɗkum, va neti'e azəmaŋ sahã avet mə Yudeɗi.

¹⁵ Ndəɗaŋgə'e dəbayən Daya Yesu gəm məskəleŋɗe, dəsərnən mam, tahəŋ lew ara Maŋgəlva ɓa, məzuzeleŋ net ɗiy pakəŋ.

¹⁶ Atakmənək dawpel sit ɗiy-ɗar wən na Maŋgəlva məs nawkõhgiti, vi kaknahanən mambray net məs adaɗɗaŋ pay pakə, ya əgrak nan na, ədagədəv na Maŋgəlva atehik aketi.

Pol man aka ule mə Tesaloniki əmpa

¹⁷ Anziyək səza muɗakə milmiŋgiɗwa, mula zəm ɓa, ya makram duɗak ɓa. Ndəni məsok zəm diyɗa vi mam tay sirsir aka ula horokum.

¹⁸ Vi vaski məɗɗum nazzam anokumda, in Pol kpak nəɗɗumuk təl ɓəɓayə, ya Satan atakməka.

¹⁹ An mənokumtə ɓa na mi əga namə, ənnek awaniɓa mətərkiya na əkaɓ nam aba Daya nam Yesu pay əzza di?

²⁰ Munokumtə gagdak namə, gəm ənnek namə.