1Samiyel 9 - Bible en Guidar

Sawlu gəm korɗe muguluŋgit məzeti

¹ Ɗəf tay a Benyamin iya nan na Kis, wətən Abiyel, wətən Seror, wətən Bekorat, wətən Afiya, wətən mə Benyamin. Ɗəf totokproki.

² Wətən tay iya nan na, Sawlu, gawla lelewi, ɗəf tay va ndən a Israyel də wəlaŋ zən va nan ɓa, səka kiyvan gap dadwar kiyən, piyok daykiyit ɗiy pakə.

³ Korɗe muguluŋgit na Kis afən Sawlu azaŋka. Kis anah sən Sawlu wətən na: «Kamə agəm gawla taka də isi, asil dok əkeyet korɗe muguluŋgiti.»

⁴ Abbalanənək ki gərəm na Efrayim, abbalanənək dələv na Salisa, dərihnin ɓa. Abbalanənək dələv na Sa'alim sam ɗarə. Abbalanənək dələv na Benyamin, məza gas ərihit ɓa.

⁵ Azzoŋguk aka dələv na Suf, Sawlu anah sən gawla nan məs dəndən nak na: «Dam eŋgili, vas ɓa na, əbba wappan wən net korɗe muguluŋgit kaɗɗum akam əmpa dərəŋgə.»

⁶ Gawla nak aɓsən na: «Ɗəf na Maŋgəlva tay a walaŋgəla nabaməŋka, ɗəf məs sləman dəgili yi: An apel pak vas adaɗɗa. Ade məlgən kakaŋ adaka; kuzuŋ wanah səm dəka tive mədaddam soko.»

⁷ Sawlu anah sən gawla nan naka: «Ya wamələ, miy mədawkə sən avam peŋ tay ɓaŋ di? Zəga tay a gabal anamda ɓa, mənam tat də zəga nawkə sən ɗəf na Maŋgəlva van ɓa. Miy mərah di?»

⁸ Gawla nak amndak əzlan sən Sawlu, amna: «In tat dət suleyək aŋ yaŋka; nəpsəngən ɗəf na Maŋgəlva van wapel səm aka malaka namə.»

⁹ A Israyel lahəŋ na, an ɗəf man aka əssõhon Maŋgəlva na, ənahaŋ na: «Məde məlgən aza məzula, vi an adawyaŋ məskəleŋ dəpaŋ na, məzula adawyanən lahəŋka.»

¹⁰ Yaŋ Sawlu anah sən gawla nan na: «Lewi kənahə, damə. Addoŋguk aza ɗəf na Maŋgəlva a walaŋgəla-metiŋ naka.»

¹¹ Aka adawpeŋgeŋ addəv walaŋgəla-metiŋ, arəhaŋgək gorɗeŋge əgilyoŋ ədawmbaɗaŋ iŋkile, aɓsitin na: «Məzula tay aŋ sa?»

¹² Yaŋ gorɗeŋge nek azlan sitini, aɓɗaŋ na: «Ha'aw tay, yas aboko. Agəm zuk kakaŋka, vi adek dəpaŋ a walaŋgəla-metiŋ, vi əzaɓ-Maŋgəlva tay nawda viyit ɗiy pak aka gəlamatuya.

¹³ Wətoŋ nokum a walaŋgəla-metiŋ ləŋgə, wakərəhnən tak dəɓəl əpeŋ a matuya kawzəm ɓa. Ɗiy azəmaŋ na an dəde ɓa ɓa, vi ndən dədakkam aka əzaɓ-Maŋgəlva vani, siske ɗiy miyet dəzəmaŋgəni. Məddoŋ kakaŋka, wakərəhəni.»

Sawlu tay ələmsən Samiyel

¹⁴ Addoŋguk də walaŋgəla-mətiŋ, adan atoŋgoŋ a walaŋgəla-metiŋ, Samiyel yaŋ tay əgilyen kalma dənɗaŋ daddan a gəlamatuya.

¹⁵ Mbara Yawe assaksənək Samiyel tak pay taka nazza na Sawlu, amna:

¹⁶ «Pumpum va kakaŋka, wanəslən suk ɗəf na Benyamin; kəppay səngən mẽl na mahenziŋ dəsangən məlĩ aket ɗiy naw mə Israyelɗe, wakõhgit ɗiy naw səvet mə Filistiɗe. Vi nulek ɗiy nawa, əhəm net agapək azawa.»

¹⁷ Adan Samiyel awla Sawlu, Yawe affon səni: «Ɗəf məs nənoh suk nak yaŋka: ndən dədarma vet ɗiy nawa.»

¹⁸ Sawlu azarək go'o a maddamba aza Samiyel, amna: «Kamə, anah su aŋgay gəla na məzula asan di?»

¹⁹ Samiyel azlan sən Sawlu, amna: «Intə məzula vani. Atoŋ abaw dam a gəlamatuya. Də in kədawzəmaŋ dəpaŋka; mazayən dəmpummo nədappok əmbata, an na mokrok pak wanənoh suko.

²⁰ Mokrok adawzlah aka wən net korɗe muguluŋgit dəzaŋ pay hokiŋ ɓa, mərihtiŋgə səkay. Zəga na sləma na Israyel pakəŋ na naway di, noki də gəla na afuk ɓa sa?»

²¹ Sawlu azlani, amna: «Mə Benyamin nan muzliya nammba gebbet mə Israyelɗe en siɗikke ɓa sa? Mahəlfa naw ŋgbəra'i səret mahəlfaɗe na Benyamin pakə. Mbar kədawnah su zev wən askəs di?»

²² Samiyel agəm Sawlu də gawla nan ake addəv gəla apsit təki nassa abet ɗiy miyeti, waɗɗaŋ kaklaw hoku.

²³ Samiyel aɓsən məzuda na: Aki slu məs nəpsuk nənoh suk na: aɗi a maŋgava naka.

²⁴ Məzuda nak akiyək mettile də kuturun, aɗi aba Sawlu, amna: «An dəpəl yaŋ ta' aboko azəma, vi sən pay aŋki məzaɓan suk dawnəh na: Nəyək ɗiy.» Sawlu azəmək də Samiyel dəpaska.

²⁵ Aprikeŋgik sə gəlamatuya a walaŋgəla, azgək meŋ də Sawlu aka təgbalka.

Samiyel tay əɗi Sawlu ka məlĩ na Israyel

²⁶ Asilyoŋguk pumu, adan təki agəɗ biŋbiŋgi, Samiyel ayak Sawlu aka təgbalka, anah sən na: Asili nəppokgən kəlgəni, Sawlu asilke, agilyoŋ sulegiti, ndən də Samiyel appaka.

²⁷ Agapaŋ aket meŋge na walaŋgəla-metiŋ, Samiyel anah sən Sawlu na: «Anah sən gawla nokəŋ dətoŋ abamə.» Ndən toŋ abe. «Kakaŋ na nok aziwi, nəprəman suk əpel na Maŋgəlva.»