1Samiyel 8 - Bible en Guidar

Sawlu akkpaŋgək məlyã ( 8:1—10:27 ) Mə Israyelɗe tahəŋ əssohõŋ məlyã

¹ Adan Samiyel agalə, aɗiyik kirtin ka mətawaŋwən a Israyel.

² Iya na wətən an daya na Yo'el, an dəzban tam na, Abiya. A Ber-seba assoŋ mətawaŋwəna.

³ Kirtin dəgəmnən tələn ɓa. Heret ɗəhərra ammba wərəha, wətafaŋ zəga na makaryam, wədoɗonən wən nawtaw sarra.

⁴ Ɗiy məsɓet na Israyel pak akkalaŋgək addoŋ aza Samiyel a Rama.

⁵ Aɓsənən na: «Yaŋ kəgalka, kirtuk dəzbanən tuluk ɓa. Kakaŋ apsəm məlĩ nawtaw wən nam va net ɗiy meɓɓet pakə.»

⁶ Əpel an anahaŋ na: «Apsəm məlĩ nawtaw səm wənəŋ na,» dəl sən Samiyel ɓa. Samiyel akkamanək Yawe.

⁷ Yawe aɓsən Samiyel na: «Aprəm an ɗiy anahaŋ sukun pakə. Vi anok azgaŋ ɓa, anawi azgaŋ dawzəm məlĩ aketi.

⁸ Va aɗɗaŋ suwən səza nəgilgit sə Eziptə hã gap pay dəpaŋka, appawən firik kaɗɗa wəza sit meŋgilveɗ meɓɓetiŋka, anani yi aɗɗaŋ sukun tamə.

⁹ Ya kakaŋ na, nok aprəm sit meti, arban siti, aprəman sit va məlĩ adawsan aket hara.»

Tatwãh an məlĩ adawkiya

¹⁰ Samiyel anah sitik əpel na Yawe pak sit ɗiy dəssohõŋ məlĩ amanəŋka.

¹¹ Aɓsit na: «Tatwãh an məlĩ dədawzəm məlĩ akokum adawki yaŋka: Wande kirtukum mezeŋgleket kawziyit addəv mawteɗ nalpa nani, mbirit ka məŋkoroŋ pilseŋge nani, meɓɓet tamə nanzoŋ aba mawta nalpa nani;

¹² Gəm kawɗiyit ka deyeɗe naket gabalɗe, naket kaklaw sle'ɗe. Wagim meɓɓet kense gulyeŋge nani də wəkkalan zəga na mabardaw nani, awaniɓa kawvot sən zəgeɗ nawgay dit zəgeɗ net mawteɗ nalpa.

¹³ Wande kirtukum muguluŋgit ka mədaŋ tursan, mədaŋ way dit mədaŋ peŋ.

¹⁴ Watef gulyeŋge nokum en moggeti, net megezlembirkeɗi, net heremeɗi, wapsit belemɗe nani;

¹⁵ wagim makəlawet net zəgeɗ net gulyeŋge dit en na megezlembirkeɗ nokum, kapsit ɗiy mərget gəm məɗɗaŋ wəza nani.

¹⁶ Belemɗe nokum mezeŋgleket dit muguluŋgiti, kirtukum gewleɗ en mogget dit korɗe nokum, wande naɗɗa wəza nani.

¹⁷ Wagim makəlewet net timeŋgiɗ dit gilew nokum. Mənokum vet wakəkkpaŋgaŋ ka belemɗe nani.

¹⁸ Wakəɓuhnən mokum pay dəpas aka wən na məlĩ nokum kuweleŋgi, ya Yawe azlan sukum na dəpas ɓa.»

¹⁹ Mə Israyelɗe aɓoŋgoŋgək dəprəm ma Samiyel, aɓɗaŋ na: «Owwo nam məlĩ dəsan akam dərəŋgə.

²⁰ Məsamgən va dəlveŋge meɓɓet pak tamə. Məlĩ nam dətawgən wən namə, dədawgən abam gəm dədawgəngən wəgay namə.»

²¹ Samiyel aprəmək əpel net ɗiy pakə, amndagan sənək a sləma Yawe.

²² Yawe aɓsən Samiyel na: «Aprəm meti, aɗi sit məlyã.» Samuyel anah sit ɗiy na Israyel na: «Məddoŋgu, naway pak a walaŋgəla-metiŋ nani.»