1Samiyel 7 - Bible en Guidar

¹ Ɗiy na Kiryat-Ye'arim azzoŋguk agəmən akoti na Yawe, akanən eŋgil ana Abinadab da, aka mossorgo. Aɗiynənək Ele'azar wətəni, dəgagən akoti na Yawe.

Samiyel mətaw wən a Israyel

² Səza məɗi akoti na Yawe a Kiryat-Ye'arim, anziyək diyɗa, agəɗək wəzva kaklaw sula. Mə Israyelɗe dəwənnet tahəŋ ənɗəsaŋ aba Yawe.

³ Yaŋ Samiyel anah sit mə Israyelɗe dəwən neti amna: «An də mokrokum taka kəɗɗumoŋ namndo aza Yawe na, məzergit meŋgilveɗ melekeɗ gəm tuya astera sə walaŋkum, məkkpaŋgan mokrokum aza Yawe, məgəɗ wəza sən kaka'ə, wakõhgukum səvet mə Filistiɗe.»

⁴ Mə Israyelɗe azergitinik Ba'alɗe dit tuyeŋge Astereɗi, sən Yawe aɗɗaŋ wəza kaka'ə.

⁵ Samiyel amna: «Məkkelet mə Israyelɗe pak a Mispa; nəkkamangən Yawe ambokum.»

⁶ Akkalaŋgək a Mispa. Ambaɗaŋgək iŋkile azlufin afuŋ aba Yawe, aɗɗaŋgək meme dəpaska. Aɓɗaŋ na: Asna məgəɗək mambray aka Yawe. Samiyel atawək wən aket mə Israyelɗe a Mispa.

⁷ Adan mə Filistiɗe aprəmən na, mə Israyelɗe akkalaŋgək a Mispa, milyeŋge net mə Filistiɗe asilyoŋguk aket mə Israyelɗe. Də wəprəm wənəs na, mə Israyelɗe ageslne'eŋ sitinik mə Filistiɗe.

⁸ Mə Israyelɗe aɓsənən Samiyel na: «Kəsok ɓatɓat faraɗa məza wəkkaman Yawe Maŋgəlva nam ɓa ɓa; dəkõhgəmgən səvet mə Filistiɗe.»

⁹ Samiyel agəmək ndargayãk məzuwaɗa, adə əvəl nawzla kurmbuɗuk sən Yawe; Samiyel akkaman Yawe ammbet mə Israyelɗe, Yawe azlan sənka.

¹⁰ Gala Samiyel adawda əvəl nawzla kurmbuɗuk naka, mə Filistiɗe tay əzaraŋ nawgay dit mə Israyelɗe; Yawe ahẽyetik mə Filistiɗe də ɓaɓəlman diyɗa dəpaska, azlzlaɓetike, mə Israyelɗe aŋgroɓinke.

¹¹ Zel na Israyel agilyoŋgək sə Mispa, arɓehetinik mə Filistiɗe, arbaŋ sitinik gap a dohoŋ na Bet-kar.

¹² Samiyel agəmək gərma, aɗiyək aka walaŋ Mispa də Sen, aya na: Eben-Ezer, va wənəh na: gərəm nabbaha. «Amna: Hã kakaŋ pak Yawe abbah səməka.»

¹³ Mə Filistiɗe avoŋgənənək kiyti dəzbanən əzzoŋ aka dələv net mə Israyelɗe ɓa, Yawe agagdakanək van aket pay na Samiyel asan egge pakə.

¹⁴ Walaŋgəleɗe məs mə Filistiɗe amõhoŋ səvet mə Israyelɗe, aka walaŋ Ekron də Gat pak amndoŋguk avet mə Israyelɗe; mə Israyelɗe amohĩnik dəlveŋge net səvet mə Filistiɗe. Zazay asanək awaleŋgit mə Israyelɗe dit mə Amorɗe.

¹⁵ Samiyel asanək mətaw wən net mə Israyelɗe hã gap əmta nani.

¹⁶ Aza wəzva pak tay əbbal aka waleŋgit gəleɗe na Betel, na Gilgal gəm an na Mispa, wətaw wən net mə Israyelɗe na təkiɗes pakə.

¹⁷ Ndən buryok a Rama, vi adaki gəla nani, adak ataw wən net mə Israyelɗe. Yaŋ arkə gəlamatuya adak sən Yawe.