1Samiyel 6 - Bible en Guidar

Mə Filistiɗe tay əmndaganən akoti na Maŋgəlva a Israyel

¹ Akoti na Yawe asanək təla buhul aka dələv net mə Filistiɗe.

² Mə Filistiɗe ayeninik məsdəlveŋge, dit mulaŋ helig neti, aɓɗaŋ na: «Mərban səm mbar mədaɗɗa kamndagan akoti na Yawe di? Məsləngən a təki asan laŋka.»

³ Aɓɗaŋ na: «An wakəmndaganən akoti na Maŋgəlva na Israyel na, kədamndaganən mekeleŋ ɓa. Məslən də əvəl nawzaɓan mambraya asna wakənzaɗaŋgə. Wakəsənən na, vimi appan ərgukum ɓa di?»

⁴ Aɓɗaŋ na: «Miy mədawfaɗ di?» Aɓɗaŋ na: «Gba wəŋɗa net milyeŋge net mə Filistiɗe məs huwweɗ gəm məskaɗe arəmə: Məska na meleŋge məzeɓit sle'i gəm kakkamɗe na meleŋge mezeɓit sle'i. Vi gəbay məstakay dəteh akokum dit milyeŋge nokum pakə.

⁵ Kəɗɗaŋgən zeŋgilet huwweɗ dit məskaɗe nokum gəm zeŋgilet kakkamɗe məzuraygənən dələv nokum, gəm məgagdakan Maŋgəlva na Israyel. Kuzuŋ wakkafan van səkokum, səket meŋgilveɗ nokum gəm səka dələv nokum soko.

⁶ Ya vimi kədaɓɓəlanən mokrokum va mə Eziptiɗ də Farawən aɓɓəlanən mekret di? Vaski yi asər met pəla' ndəɗaŋ mbagitin mə Israyelɗe əddoŋ ɓa sa?

⁷ Ya kakaŋ na, məvot mawta net pilseŋge meleketeni, mərəm wasliɗe muhurit sula məs məklaki ɗah zuk awlet nagdəh mawta net pilseŋge ɓa. Kətok sitingən mawta naka, kəmə'gətingin kirtit a gazlaŋ.

⁸ Kəgəmnəngən akoti na Yawe kəɗiyəngən aka mawta net pilseŋge, zəgeɗ na meleŋge kədapsənən nawfaɗ nak na kəziningin addəvət akotiyək a maŋgavani. Kəppanəngən dəlgəni.

⁹ Kulanəngəni, an agəmək tive nawmbat aka dələv nan kəla Betsemes, asna ndəni dəki gəbay metiŋgin akamə; an vaski ɓa na waməsən kana ndən dərgəm ɓa mandaray dəde akamə.»

¹⁰ Ɗiy nek aɗɗanənək vaska, armaŋgək wasliɗe muhurit sula, atok sitin mawta net pelseŋge naka, armetin kirtit a gazlaŋ.

¹¹ Aɗiyənək akoti na Yawe aka mawta net pilseŋge, akotikə, kakkamɗe na meleŋge neki gəm zeŋgilet məskaɗe net neki.

¹² Tive sarra wasliɗe agəmaŋ nawmbat a Betsemes də wəhəma, dəmzlahaŋ dəka dəzəŋ may dəka zlaɓay ɓa. Milyeŋge net mə Filistiɗe tahəŋ əzbetin dərɓeget gap aket meŋge na Bet-Semesi.

¹³ Ɗiy na Betsemes tahəŋ ətawən haykəmari a walaŋ, le'gənən heret na akoti, annekenənək zit də ulani.

¹⁴ Mawta net pilseŋge adek a guli ana Yosuwa ɗəf na Betsemes da yas aziw adaka, gərəm metiŋgin tay adaka, apɗakən wəlaŋga na mawta net pilseŋge naka, atawən wəlet wasliɗe neki, adaŋ əvəl nawzla kurmbuɗuk sən Yawe.

¹⁵ Mə Levi aprikgənənək akoti na Yawe nak gəm akotiyək məs zəgeɗ na meleŋge addəvət nakə, aziynin aka gərəm metiŋgin naka. Yaŋ ɗiy na Betsemes aɗɗaŋ əvəl nawzla kurmbuɗuku, azaɓaŋ-Maŋgəlva sən Yawe dəpaska.

¹⁶ Adan milyeŋge net mə Filistiɗe sle' awlanən vaska, amilyoŋguk a Ekron pay dəpaska.

¹⁷ Wəŋɗa net məskaɗe na meleŋge məs mə Filistiɗe apsənən Yawe a gəla mambray net yeŋki: taka na walaŋgəla na Asdod, taka na Gaza, taka na Askelon, taka na Gat, taka tam na Ekron.

¹⁸ Kakkamɗe na meleŋge na, aza əŋɗa net walaŋgəleɗe gugriɗ na korgu net milyeŋge net mə Filistiɗe sle'i hã gap walaŋgəla məza zlava ɓa, gap aza milɓe metiŋgin məs aɗiynən akoti na Yawe akani. Hã dəpaŋ milɓe van tay addəv guli na Yosuwa ɗəf na Betsemes.

¹⁹ Yawe amə'sitik ɗiy na Betsemes, vi asəŋgləkanən akoti na Yawe: abayək zel kaklaw buhul səret zel gabal kaklaw sle'i. Vasna en dəppaŋ aɗəkaŋka, vi Yawe amə'sitik diyɗa sawɓa.

²⁰ Zel na Betsemes aɓɗaŋ na: «Naway dədawɓap əziw aba Yawe, Maŋgəlva salalaŋ di? Ana nawada mədawkan səzam di?»

²¹ Aslənaŋgək maslənɗe azet ɗiy na Kiryat-Ye'arim, kawneh sit na: «Mə Filistiɗe akiynənək akoti na Yawe, məde məgəm məka anokumda.»