1Samiyel 5 - Bible en Guidar

Akoti na Maŋgəlva anet mə Filistiɗe da

¹ Yaŋ mə Filistiɗe agəmnən akoti na Maŋgəlva; akiynən sə Eben-Ezer a Asdod.

² Mə Filistiɗe agəmənək akoti na Maŋgəlva atoŋgənən addəv gəla na Dagon, aɗiynən a maŋgava Dagon.

³ Mazayin nani, adan ɗiy na Asdod asilyoŋ pumu, awlanən Dagon məskotən ɓuloho afuŋ aba akoti na Yawe, agəmən Dagon asilginin a gəlani.

⁴ Asilyoŋguk dafsən mazayən nan əmpa, awlanən Dagon məskotən afuŋ aba akoti na Yawe, ki Dagon, dagragay van sulagəni, mərslet aka maddamba sekke, wəlaŋ zə Dagon dəmbər kaka'ə.

⁵ Vini məsdəlveŋge na Dagon dit en mətoŋgoŋ addəv gəla na Dagon a Asdod pak awndapnən ki maddamba na Dagon ɓa, gap pay dəpaŋka.

⁶ Yawe agagdakanək van aket ɗiy na Asdod, atoŋgitik addəv tatwãha, aggbo' huwweɗ aket dit məskaɗe, ɗiy na Asdod də kiyva nan pakə.

⁷ Adan ɗiy na Asdod awlanən vaska, aɓɗaŋ na: «Akoti na Maŋgəlva na Israyel adawsan də mənam ɓa, vi van ɓəli akamə gəm aka Dagon maŋgəlva namə.»

⁸ Aslənaŋgək əkkelet milyeŋge net mə Filistiɗe pakə, aɓɗaŋ na: «Miy mədaɗɗa də akoti na Maŋgəlva na Israyel di?» Aɓɗaŋ na: «A Gat akoti na Maŋgəlva na Israyel adamndani.» Amndaganən akoti na Maŋgəlva na Israyel.

⁹ Səza amndaganəni, Yawe agagdakanək van aka walaŋgəla-metiŋ, geslne armek diyɗa. Arbə sitik ɗiy gugriɗ na walaŋgəla-metiŋ, təŋ səket kirni gap aket ɗiy gugriɗe. Huwweɗ dit məskaɗe arɗiyaŋgək azeti.

¹⁰ Akanənək akoti na Maŋgəlva a Ekron, adan mə Ekron awlanən məki akoti na Maŋgəlva, aŋzlaŋgək vaŋvəla, aɓɗaŋ na: «Akiynən akoti na Maŋgəlva na Israyel anamda na, vi dəbayəmgən paki yi!»

¹¹ Aslənaŋgək əkkelet milyeŋge net mə Filistiɗe pakə, aɓɗaŋ na: «Məka akoti net ɗiy na Israyel a gəlani, adawbayu dit ɗiy naw ɓa.» Vi geslne namta awanək zən a walaŋgəla-metiŋ, va Maŋgəlva asanək təɓeltəɓel adaka.

¹² Ɗiy məs dəmtaŋ ɓa na, huwweɗ dit məskaɗe aggbo'oŋguk aketi, vaŋvəl sən əzəmsahã na walaŋgəla-metiŋ agapək a disiŋ.