1Samiyel 4 - Bible en Guidar

¹ Samiyel apel sit mə Israyelɗe pakgiti. Mə Israyelɗe agilyoŋguk kalpa dit mə Filistiɗe, aɗiynən dibirgidik net disiŋ ki Eben-Ezer. Mə Filistiɗe tam net a Afek.

Akoti na Maŋgəlva avet məzuzelɗe

² Mə Filistiɗe assahãŋgək kalma dit mə Israyelɗe. Wəgay aləɓka. Mə Filistiɗe ammusinik mə Israyelɗe, abayangək ɗiy səret gap gabal poɗo, ama wəlpaska.

³ Ɗiy amndoŋguk a dibirgidik, ɗiy məsɓet na Israyel aɓɗaŋ na: «Vimi Yawe appet mə Filistiɗe əbayəm vaŋ di? Mədam a Silo wəgəm akoti na wənmiyna na Yawe. Dədegən a walaŋgəm dəkõhgəmgən səvet məzuzelɗe namə.»

⁴ Yaŋ ɗiy aslənaŋ a Silo, sədak akiynən akoti na wənmiyna na Yawe Məzuɓappak na disiŋ dəsan aket kerubaɗe. Hofni də Pinhas kirtin məsdələv Eliya suleŋ tahəŋ adak də akoti na wənmiyna na Maŋgəlva.

⁵ Adan akoti na wənmiyna na Yawe agap a dibirgidiki, yas mə Israyelɗe pakgit aŋzlaŋ vaŋvəl diyɗa, dələv dimbiɗ dimbiɗi.

⁶ Mə Filistiɗe aprəmənən vaŋvəla, aɓɗaŋ na: «Miy dədaɗɗa vaŋvəl koɓo' koɓo' a dibirgidik net mə Ibriɗes di?» Asənənək na, akoti na Yawe dəde a dibirgidiki.

⁷ Mə Filistiɗe ageslne'eŋke, vi maŋgəlva adek a dibirgidiki anahaŋgə, yaŋ aɓɗaŋ na: «wəray akamə vi dəgəɗ ɗah vaŋ ɓa.

⁸ Aw, wəray namə! Naway dədawkõhgəm səva maŋgəlva gambaraŋ di? Ndəni maŋgəlva an dəzget gəbayɗe temtem aket mə Eziptə a kapta-muyãŋ ɓa sa?

⁹ Məsɓan zukum, məssoŋ va zeli mə Filistiɗe, vi kədaɗɗaŋ wəza sit mə Ibriɗe va aɗɗaŋ sukumənəŋ ɓa. Kəssoŋgən zeli, kəgayaŋgəni.»

¹⁰ Mə Filistiɗe agəmənək əlpa, akaŋ sitinik mə Israyelɗe, naway pak anzanək a gizlirke ananda. Wəddak nan mbərayni diyɗa: məzəlpaŋ mədawaŋ də tilit na Israyel gabal hoku məbeyti.

¹¹ Məgəmni akoti na Maŋgəlva, Hofni də Pinhas kirtin Eliya sulegit pak amtaŋka.

Əmta na Eliya dət ga wətəni

¹² Ɗəf na Benyamin anzanək səma wəgay gap a Silo dəpaska'e; lukutɗe nan məŋgereti, burɗuk aka kiyən kpu'kpu'u.

¹³ Eliya tay ɗewwe ama tive aka mazaŋga nan ɗəhərra, vi makran tay əzlah aka wən na akoti na Maŋgəlva. Ɗəf nak aguluk a walaŋgəla-metiŋ kaprəman siti, walaŋgəla-metiŋ bayman pak aŋgəslək vaŋvəla.

¹⁴ Eliya aprəmək vaŋvəla, amna: «Gogoyos na mi dədaɗɗa di?» Yaŋ ɗəf nak ade də kakara aprəman wən nan sən Eliya.

¹⁵ Wəzva na Eliya agəɗək kaklaw vaytak kiyin dodopoɗo, ya haran agəɗək ŋgburohõ awɓap ula ɓa.

¹⁶ Ɗəf nak aɓsən Eliya na: «Naw səma wəgay nəde, dəpaŋki nənzawa.» Amna: «Miy dəgəɗ di wətuwa?»

¹⁷ Ɗəf dəki alabara nak azlani, amna: «Mə Israyelɗe anzoŋguk səbet mə Filistiɗe, məzəlpaŋ nam addakaŋgək diyɗa sawɓa. Kirtuk dayday sulegit may Hofni də Pinhas amtaŋka, məgəmni akoti na Maŋgəlva.»

¹⁸ Səza aŋɗan wən na akoti na Maŋgəlva ləŋgə, Eliya sukot səka mazaŋga nan nak midiŋgbile aka maddamba na gəla, vi agalka, məkərni, muffur wəlan ɓalə ndən zamə. Asanək mətaw wən net mə Israyel wəzva kaklaw poɗo.

¹⁹ Ga Pinhas atən də daway nawwatə. Adan təprəm na mə Filistiɗe agəmən akoti na Maŋgəlva, gəm dəhət də zələt pak amtaŋka, ndət ɓe' boku, vi əssa na gədəvət armətəka.

²⁰ Aka tədawkay əmta, en dədawətən aɓsətən na: «Kəgeslne' ɓa wiyən kəwə.» Təzlan ɓa, təzlək sləma ɓa.

²¹ Təlvan wiyən nak na Ikabod, dawnəh na: «Gagdak azarək faraɗa sə Israyel, vi məgəmni akoti na Maŋgəlva, gəm vi dəhət də zələt amtaŋgə.»

²² Tənah na: Gagdak azarək faraɗa sə Israyel, vi məgəm akoti na Maŋgəlva yi.