1Samiyel 3 - Bible en Guidar

Maŋgəlva tay əɗi Samiyel ka məskəleŋ

¹ Wiyən Samiyel, nan tay əɗɗa wəza sən Yawe, aba Eliya. Əpel na Yawe tay fohfoh dasək ɓa, ula tay ɗarɗar ɓa'e.

² Pay nanəska, Eliya tay ɗuffo a gəlani, haran atəŋgək əddaka, awɓap ula lewlew ɓa.

³ Lalam na Maŋgəlva dəɓəl əmta tagay ɓa. Samiyel tay ɗuffo addəv gəla na Yawe, a təki akoti na Maŋgəlva asani.

⁴ Yawe ayak Samiyel, azlanək na: «In yakəŋkə!»

⁵ Yaŋ anzan ade aza Eliya, amna: «Kiyu nak na, in yakəŋkə!» Yaŋ Eliya amna: nəyuk ɓa, amil avoŋgu. Ndən tek ɗufu.

⁶ Yawe amndak aya Samiyel əmpa. Samiyel le', ndən tek aza Eliya, amna: «Kiyu nak na, in yakəŋkə vi kəyuka!» Yaŋ Eliya amna: «Nəyuk ɓa wətuwa, amil avoŋgu.»

⁷ Samiyel dəsən Yawe tagay ɓa, vi əpel na Yawe dərbə azan tagay ɓa.

⁸ Yawe ayak Samiyel mohokon əmpa: Ndən le' tek aza Eliya, amna: «Kiyu nak na, in yakəŋkə» Eliya asənək na, Yawe yi dədawya wiynəŋka.

⁹ Eliya aɓsən Samiyel na: «Amndok avoŋgu, an məyuki əmpa na, kənahgən na: “Apeli, Yawe, vi balam nok tay əprəmən!”» Samiyel amndan əvoŋ a gəlani.

¹⁰ Yawe adek aziw adaka; ayak va ɗayɗayə: «Samiyel, Samiyel!» Samiyel azlan na: «Apeli, balam nok tay əprəmən!»

¹¹ Yawe aɓsən Samiyel na: «Wən yaŋ nədawpel a Israyel, ɗəf dəprəm pak sləman wagəɗ nzẽhẽ.

¹² Pay dəpas na, wanəsil sən gəla na Eliya, an nəpel aka gəla nanəŋ pak wagəɗ gərakə.

¹³ Nəboton sənək dafsən na, wanətaw wən aka gəla nan ka faɗə; vi heslepe an asəni yi, vi kirtin arawənka, ya dəzga'sit ɓa.

¹⁴ Vini, nəsway aka gəla na Eliya, sessel heslepe na gəla na Eliya avvuy na də əzaɓ-Maŋgəlva ɓa, may də wəvəl ɓa hã faɗə.»

¹⁵ Samiyel asanək ɗuffo gap təki dadaŋgə. Yaŋ akol maddambeɗe na gəla na Yawe. Samiyel tay əgeslne' dawboton wən an awəl sən Eliya.

¹⁶ Eliya ayak Samiyel, aɓsən na: «Samiyel wətuwa.» Yaŋ azlan na: «In yakəŋkə.»

¹⁷ Yaŋ amna: «Əpel miy apel suk di? Kəɗaman su ɓa kamə, an kəɗaman suwəka, Maŋgəlva dəgəɗ suk an naɗɗa an kəɗaman suwək wən təttaka səra an apel suk pakə.»

¹⁸ Samiyel aboton sənək əpel nan pak dəɗaman sən ɓa. Amna: «Ndəni Yawe, dəɗɗa an moggon ama haran pakə.»

¹⁹ Samiyel aɓayka. Yawe tay dəndəni, dəzgan əpel nan təttaka dayday afuŋ ɓa.

²⁰ Israyel ŋgbaŋtaŋ təŋ sə Dan gap a Ber-Seba, asənək sessel na, Samiyel məskəleŋ na Yawe yi.

²¹ Yawe azbanək ərban zən a Silo. Vi a Silo adaki Yawe arban zən aza Samiyel də wəpel na Yawe.