1Samiyel 26 - Bible en Guidar

Davit tay ərbəsən wil sən Sawlu əmpa

¹ Ɗiy na Zif azzoŋguk aza Sawlu a Gibeya, aɓsənən na: «Kəsən na, Davit tay aka mossorgo na Hakila, aba təki mə fiktuwwe ɓa sa?»

² Sawlu asilke, aprikik a kapta-muyã na Zif, dit ɗiy məwelit na Israyel gabal hoku, Kawkayan Davit a kapta-muyã na Zif.

³ Sawlu aɗiyək dibirgidik nan aka mossorgo na Hakila, aba təki fiktuwwe ama tive. Davit asanək də gəla a kapta-muyã. Awlak na, Sawlu adek ammban a kapta-muyã.

⁴ Davit aslənək ɗiy kawla gabba təkiya, yas asənna sessel Sawlu adeke.

⁵ Davit asilik adek a təki Sawlu azi dibirgidik nan adaka, Davit awlak təki Sawlu avoŋ adak də Abner, wətən Ner, daya net məzəlpaŋ nani; addak dibirgidik Sawlu avoŋgu, məzəlpaŋ gizlirkeɗe net kiyən karkarə.

⁶ Davit agəm əpele, aɓsən Ahimelek mə Hitti gəm Abisay wətət Seruya, məlmən Yo'ab, amna: «Naway napriken də in sərokum a dibirgidik na Sawlu di?» Abisay amna: «Naw waniprik də isi.»

⁷ Davit də Abisay azzoŋguk də dəfəɗ azet məzəlpaŋgə: Sawlu tay ɗuffo mileŋgin addak dibirgidiki, tulhõ nan tay biɗimme a disiŋ kini. Abner dit məzəlpaŋ pak tahəŋ məleŋgit kiyən karkarə.

⁸ Abisay aɓsən Davit na: «Dəpaŋ Maŋgəlva apsukuk məzuzel nok avoko. Kakaŋ appaw kan nəmpa taka də tulhõ aka dəlvafuŋ, məza əmndagan sən ɓa.»

⁹ Davit aɓsən Abisay na: «Kəbay ɓa, nawa dətəl ɗah van aka mesiya na Yawe ndən ɗew barbar di?

¹⁰ Davit amna: Yawe madarani, sessel Yawe sən kiyən wabay an pay namta nan agapka, wamtə an ama wəgay yi, kawza adaka.

¹¹ Yawe dətaku ka nəgəmgən vaw aka mesiya na Yawe. Ya kakaŋ na, agəm tulhõ na disiŋ kiynəŋka, də bəbər net iŋkile nam məlgəni.»

¹² Davit agəmək tulhõ də bəbər net iŋkile sə disiŋ ki sawlu neki, ambataŋka. Ɗəf tay dule ɓa, tay dəsən ɓa, tay an dəfɗah ɓa, ndəɗaŋ pak eleŋgeŋke, vi Yawe dəleŋgit həddəkə.

¹³ Davit mbat zlaŋgat mbərən, aziwik aka dadwar ki gərma, walaŋ tay diyɗa a weleŋti.

¹⁴ Davit ayek məzəlpaŋ na sawlu, gəm Abner wətən Ner də wənah sit na: «Wakəzlan su sa Abner?» Abner amna: «Nawa kənan is məyə aka məlyəŋ di?»

¹⁵ Davit aɓsən na: «Abner, kəmna ɗəf mozoŋglokok kənani ɓa sa? Ya naway va is a Israyel di? Vimi kəɓap əga daya nok məlĩ ɓa di? Ɗəf səret ɗiy pay kawbay məlĩ daya noko!

¹⁶ Yawe madarani, zəga an kəgəɗəs moggoni ɓa. Əmta dədah sukum vi kəganən daya nokum mesiya na Yawe ɓa! Kakaŋ na awla ngay tulhõ na məlĩ də bəbər net iŋkile na disiŋ kinin di?»

¹⁷ Sawlu asənək wəla Daviti, amna: «Wəloki askəs sa Davit wətuwa?» Davit amna: «Wəlawi daya naw məlyã».

¹⁸ Amna: «Vimi daya naw adarɓahan balam nan di? Mi yi nəgəɗ di? Mbərayən mi azaw di?

¹⁹ Kakaŋ na, kamə daya naw məlyã, aprəm əpel na balam noko. An Yawe yi dəpsuk tive naɗɗa ammbaw vaska, dəffok tursan məpsəni! An ɗiyəŋ hara na, Yawe dəraygiti. Vi arɓahawənək dəpaŋ dawsaw aka dələv məs Yawe apsit ɗiy nani, anahaŋ na: “Dok əzbet meŋgilveɗ meɓɓeti!”

²⁰ Naw kakaŋ na, maw tay aka nəmtəgən faraɗa səza Yawe ɓa. Vimi məlĩ na Israyel agil əkayan dememes ɗar va ɗəf adarɓahan taɓraw aket gərmeŋge di?»

²¹ Yaŋ Sawlu nak amna: «Nəgəɗək mambraya! Amili ade Davit wətuwa, nəgəɗ suk na mbərayən əmpa ɓa, adan dəpaŋ kəɗiyək ki zeŋgilew kəbayu ɓa. Gesiŋ nəgəɗək va dərwa ɗarə, əzlzlaɓ nəzlzlaɓ gəddakə.»

²² Davit amna: «Tulhõ na məlĩ yaŋka; gawla taka dəggar wəgəmni.

²³ Yawe dəfaɗ sən ɗəf pak aza təstəs nan də əssa ŋgbak nani. Dəpaŋ Yawe apsukwək avawa, nəŋgəl əzan zeŋgilok ɓa, nəŋgəm əslan vaw aka mesiya na Yawe ɓa.

²⁴ Dəpaŋ zeŋgilok va asan na sləma diyɗa ama harawa, vaski zeŋgilew asan ama hara Yawe tamə, wakõhgu səddəv tatwãh pakə.»

²⁵ Yaŋ Sawlu aɓsən Davit na: «Soko noko wətu Davit. An kədaɗɗa pak wadaw ammboko.» Davit agəmək tive nani, Sawlu tam amndan ananda.