1Samiyel 25 - Bible en Guidar

Nabal tay əɓoŋ dabbah sən Davit

¹ Samiyel amtəka. Mə Israyelɗe dəwənnet akkalaŋgək ahəmənək kini; a Rama məndəkən ananda. Davit asilik aprikik kəla kapta-muyã na Paran.

² Ɗəf tay a Ma'on, arya nan a Karmel, sləman tay birre, tay dit timeŋgiɗ gabal hoku, gəm gilew zit gabalə. Tay ətaw zeŋze net timeŋgiɗ nan a Karmel.

³ Iya nan na Nabal, nat ɗak nan tam Abigayel. Ɗak vat lalawəktə, məs maɗɗulata, zələt kiyən ɓəli yi, əɗɗa nan moggoni ɓa. Zev Kalepi yi.

⁴ Davit aprəmək na, Nabal adek a kapta-muyã ətaw zeŋze net timeŋgiɗ nani.

⁵ Davit aslənək kirin kəlawə. Davit anah sit kirin nak na: «Məpeŋ a Karmel, kəddoŋgən aza Nabal, kəsɗanəngən də iya nawa.

⁶ Kəsɗanəngəni, mənokum na: zazay dəsan akoko! Aka gəla nok gəm aka zəga an na nokda pakə.

⁷ Ya kakaŋ nəprəm na, mətawni zeŋze net timeŋgiɗ noko, asən kakaŋ na gala məzuteɗeŋɗe nok assoŋ də mənam na, məzimgit sahã ɗah ɓa, zəga net tay dəzə pay assoŋ a Karmel aŋ ɗah ɓa'e.

⁸ Assõhẽt kirin noko, wanahaŋ sukuni. Horok dula sasẽhit gewleɗ newiski, vi aka pay moggon məde; kamə apsəm an vok arah sit belemɗe noko gəm sən Davit wətuko.»

⁹ Kirin na Davit nek azzoŋ anahaŋ sənən Nabal va mənah sit pak aka iya na Davit, ndəɗaŋ gurom əganəni.

¹⁰ Yaŋ Nabal azlan sit gewleɗ na Davit naka, amna: «Naway Davit di? Naway wətən Yesse kpak di? Pay dəpaŋ belemɗe məzunzoŋ sə net migilit da aŋɗaŋ ɓa.

¹¹ Kəŋglaŋ kan na, nəgəmgən way nawa, iŋkile gəm slu naw nədə viyit mətawaŋ səwən zeŋze net timeŋgiɗ nawa, vi kapsit ɗiy-ɗar nəsən sə təki azzoŋ ɓaŋ sa?»

¹² Gewleɗ na Davit amndoŋguk aka tilti, aman sənənək əpeləs pakə.

¹³ Davit aɓsit ɗiy nan na: «Ɗəf pak diynan masalam nani!» Naway pak aynanək masalam nan agzeni; Davit aynanək nani'e tamə. Ɗiy gap səkat poɗo, dəddoŋ ammba Davit, səkat sula dəssoŋ azet zəgeɗ neti.

Abigayel tat əki əbbah sən Davit

¹⁴ Taka naret gewleɗ assak sət Abigayel ga Nabal dawnəh na: «Davit aslənək maslənɗe sə kapta-muyã, kasɗan ɗəf daya namə, ndən aket õzõsu.

¹⁵ Ɗiy vet aɗɗaŋ səmənək moggon diyɗa, dəzəmgəmən sahã ɓa, zəga tay dəzə səzam pay məbbal də meŋgevet awraŋ ɓa.

¹⁶ Dəfəɗ də kapay pak tahəŋ va zlava kiyəm tərwəsl, gba' mənzi ətaɗ timeŋgiɗ a meŋgevet adak pakə.

¹⁷ Ya kakaŋ na, awla kəsəngən an kədaɗɗa, vi əza na daya nam də gəla nan pak məziwgəni wən nani. Ndən sən kiyən ɗəf ɗari, nawpel sən wəni sam ɓa.»

¹⁸ Abigayel təgəmək zət təndə peŋɗe səkat sula, kwenekweneɗ na mbazla sula, timeŋgiɗ məfotit sle'i, mideɗ gap həluw na way sle'i, kirtin megezlembirkeɗ məkleket mokkoy net səkatə, gəm gəpa məbaya dit kirtin sokoyo məktimit səkat sula. Təsletik aket korɗe.

¹⁹ Tənah sit gewleɗ nat na: «Məddoŋ abawa in yakəŋ əzbokumu.» Tənah sən Nabal zələt ɓa hara.

²⁰ Ndət aka koro nat peŋ ɗewi, ndət əpriket dəra gərma, Davit yaŋ dit ɗiy nan əprikeŋ səka gərəm mbərən yaŋ almaŋ prisli.

²¹ Davit amna: «Ɗari nəga zəgeɗ memeyẽɗ na ɗəfəŋ a kapta-muyã mbara, zəga nan tay dəzə təttaka dayday ɓa. Yaŋ amndan su də mbərayən a gəla moggoni!

²² Kəta Maŋgəlva dəraygu kuɗupu, an in Davit hã aza əddaŋ nəpələk ɗəf mizilin təttaka sən Nabal.»

²³ Abigayel ula Davit ləŋgə, ndət pirik də kakara səka koro; ndət ɓe' afuŋ aba Davit, mirbizət afuŋ nisi, təppu'u.

²⁴ Sissiŋ ndət ammba tələn hulŋgusu, təmna: «Akawi yi, akawi mbərayən nani daya nawa! Kamə balamək nok təpel suk ammba sləmoko, aprəm əpel nat balamək noko.

²⁵ Kamə makra daya adawsan aka ɗəf ɗar Nabaləŋ ɓa, vi ɗəf ɗari va iya nani: iya nan na Nabal va wənəh na dərway ɗarə. Ya naw in balamək nok na, nule kirin məs is daya naw kəsləniŋ ɓa.

²⁶ Ya kakaŋ na, də Yawe madarani gəm də zeŋgilok anok zəknoko daya nawa, adan Yawe atak vok də wəbay gəbay na, məzuzelɗe dit məs met aka əɗɗa mbərayən sən daya naw pak dəkkpaŋgaŋ va Nabal.

²⁷ Ya əvəl an balamək nok təki sən daya kakaŋkəŋ na, kapsit kirin məzudawaŋ ammba daya nawi yi.

²⁸ Kamə appan heslepe nat balamək noko. Vi Yawe abew na dəpsən gəla an faɗ sən daya naw ɓa, gesiŋ nan na, daya naw əlpa na Yawe adalpa, mbərayən tay nawrəh azok pay əssa nok egge ɓa.

²⁹ Ɗəf asilik karɓohoko gəm kawkayan zeŋgiloko, zeŋgile daya naw wasan tərra a təki net mederet a maŋgava Yawe Maŋgəlva noko, zeŋgilet məzuzelɗe noko, wazget va ɗəf adazget gərmeŋge də mabəŋbəŋga.

³⁰ Pay Yawe adaɗɗa sən moggon an anah nawgəɗ sən daya naw gəm kawɗiyuk ka məlĩ na Israyel na,

³¹ adawsan aza daya naw va zəga nawtaŋgbãy may nattapan a makran naggbo' mbel ɗar vi daya naw adawkõhgən kiyən dəvan ɓa. Pay Yawe adaɗɗa moggon sən daya nawa, kəɗɗumotgən balamək noko!»

³² Davit aɓsət Abigayel na: «Soko sən Yawe Maŋgəlva na Israyel, dəslunuk dəpaŋ nawləm suwəŋka.

³³ Soko vi əɗɗum moggon noko, soko noki yi vi kətaku dəpaŋ də wəbay gəbay may əmpəlkiya dəvawa.

³⁴ Gegesiŋ, də Yawe madarani, Maŋgəlva na Israyel dətaku dəɗɗa mbərayən azoko, va kəgəm zuk kəde ələm su go' ɓa na, sessel hã aza əddaŋ na nəpəl na ɗəf mizilin təttaka ana Nabal da ɓa.»

³⁵ Davit atafək an təki sən səvata, sissiŋ anah sət na: «Amndok anokda zayə. Awle nəprəmək moko, nulukuk sãhə.»

Wəmta na Nabal

³⁶ Abigayel poh aza Nabal. Waynabaya tay ananda va waynabaya na məlyã. Makra Nabal apparka, mbazla abayək diyɗa, tay təpel sən ɓa hara, gap təki dadaŋgə.

³⁷ Də pummo mbazla agrak səka Nabal, ɗak nan təboton sən wənəska. Dadawan ɓuh səddəvni, kpaŋ va gərma.

³⁸ Gap əvoŋ kəlaw sədərɓanəs na, Yawe abayək Nabal, ndən zamə.

³⁹ Adan Davit aprəm əmta na Nabal, amna: «Nəsokonək Yawe, məs dəkə wən ambaw aka wəra na Nabal araw gbaŋkəŋka, dətak balam nan dəɗɗa mbərayni. Yawe amndaganək mambray na Nabal akani.» Sissiŋ Davit aslən azat Abigayel kawgəmət ka goni.

Davit tay əgəmət Abigayel ga Nabal ka goni

⁴⁰ Gewleɗ na Davit azzoŋguk azat Abigayel a Karmel, anahaŋ sətən dawnəh na: «Davit dəslənəm azoko, man aka wəgumuk ka goni.»

⁴¹ Ndət le' tuppu' hã mirbizit afuŋ ne', təmna: «Balamək nok yakəŋ məsla zət nawɗa təlit belemɗe na daya nawa.»

⁴² Abigayel təsilik də kakara, ndət aka koro peŋgi, belemɗe nat sle' azbatənka, təzbetik maslənɗe na Davit; vaski təkkpaŋ ɗak nani.

⁴³ Davit agəmtək Ahino'am na Yizrel ka guluk nani'e; sulegit pak gil nanəŋgə.

⁴⁴ Sawlu apsəntək wətən adawyaŋ na Mikal ga Davit sən Palti, wətən Layis məs na Galim.