1Samiyel 22 - Bible en Guidar

Davit daya net məɓoŋti

¹ Davit ambatək sədaka, akõh addəv bətəŋ a Adullam. Adan milmiŋgiɗin dit ɗiy nana afənda aprəməni, apurkoŋ azan adaka.

² Ɗiy en də tatwãha, məs dəmneŋge dit ɗiy en zit dənnek ɓa pak akkalaŋgək azani, asanək ka daya neti, waɗɗaŋ ɗiy gap səkat poɗo.

³ Davit ambatək sədak a Mispe na Mo'ab. Aɓsən məlĩ na Mo'ab na: «Kamə appet may əbba dət əmma dəzzoŋ əssoŋ aŋ də mənokum hã gap pay nədawsən an Maŋgəlva adaɗɗa viwa.»

⁴ Akek aza məlĩ na Mo'ab, assoŋguk də gəla dəndən pay nawɗam na Davit pakə.

⁵ Məskəleŋ Gad aɓsən Davit na: «Kəsok a təki na əɗam nok ɓa, dok aka dələv na Yuda.» Davit mbat asan aka muyã na Heret.

Sawlu tay əŋgroɓ məsdəlveŋge na Nob

⁶ Sawlu aprəm na, mulani Davit dit ɗiy nani. Sawlu tay ɗewwe a Gibeya aka mossorgo ammbat wəlaŋgək adawyaŋ na esel, tulhõ nan avan kãwwã. Gewleɗ nan pakgit tahəŋ a maŋgavan ziwziwi.

⁷ Sawlu Aɓsit məɗɗaŋ wəza nan en dəziweŋ azan na: «Əŋga məprəmɗa munokum mə Benyaminɗe! Azokum na, wətən Yesseŋ wapsukum gulyeŋge, dit megezlembirkeɗ pak sa? Azokum na, waɗiykum ka deyeɗe aket məzəlpaŋ gabal, awaniɓa səkat sa?

⁸ Vi mənokum pak kiynanənək mokum akawa, ɗəf tay sərokum dəssak su gala wətu asler man də wətən Yesse ɓa, ɗəf tay dəssan ammbaw sərokum ɓa, ɗəf tay dəssak su gala wətu aɓoŋgən balam naw akaw ka dənslingən bizwil abaw va dəpaŋkəŋka.»

⁹ Do'ek mə Edom dəsan ziwwe azet gewleɗ na Sawlu azlanəka, amna: «Nulak wətən Yesse əzzan ana Ahimelek, wətən Ahitub da, a Nob.

¹⁰ Ahimelek akkamanək Yawe vini, apsənək zəga nawzəm aka tive gəm masalam na mə Filisti Golyat.»

¹¹ Yaŋ məlĩ aslən iya məsdələv Ahimelek wətən Ahitub, dit ɗiy neŋgil ana afənda gəm məsdəlveŋge na Nob pakgiti. Azzoŋguk beymet pak ana məlĩ da.

¹² Sawlu amna: «Aprəm lewlewi wətən Ahitub.» Yas azlan sən na: «In yakəŋkə daya nawa.»

¹³ Sawlu aɓsən na: «Vimi kətəp mok akaw is də wətən Yesse kəpsən peŋ də masalam gəm kəkkaman Maŋgəlva vini ka dəsilgən akawa, dənslingən bizwil abaw va dəpaŋkəŋ di?»

¹⁴ Ahimelek azlan sən məlyã amna: «Naway təstəs səmmbet məɗɗaŋ wəza nok va Davit di? Ya Dəhkuy ɓa sa məlyã, daya net məzugukuni yi, ɗəf məɗi kini anokda.

¹⁵ Dəpaŋki nətəŋ əkkaman Maŋgəlva viyən sa? Aw məlyã kədakrək wən aka balam nok gəm aka gəla na afən pak ɓa, vi balam nok dəsən gabba wənəs sən sa ɓa.»

¹⁶ Məlĩ amna: «Ahimelek, əmta kədamta, is dit ɗiy neŋgil ana afukda pakə.»

¹⁷ Məlĩ aɓsit məzuganən na maŋgavan ziwziw na: «Məkkpaŋ məbey məsdəlveŋge na Yawe iŋki, vi net pak abbahaŋ sənənək Davit; asənnənək na, Davit ənza anzani, dəssakaŋ suwən ɓa.» Məgaɗe na məlĩ ɓoŋgoŋ dawslan vet əbey məsdəlveŋge na Yawe.

¹⁸ Yaŋ məlĩ anah sən Do'ek na: «Nok akkpaŋgə, abey məsdəlveŋge.» Do'ek mə Edom nak kpaŋgə, abey məsdəlveŋge nek dəvani. Ɗiy en nawguloŋ lukut na daya net məsdəlveŋge na ngərayã naɗɗa wəza na Maŋgəlva kaklaw dodopoɗo kiyit sle' abay dəpaska.

¹⁹ A Nob, walaŋgəla-metiŋ net məsdəlveŋge, abeyik zeli, gili, kirin dit mepriŋgeɗi may wasliɗe, korɗe dit timeŋgiɗ də ma masalam.

²⁰ Wətən Ahimelek dəhən Ahitub taka, adawyaŋ na Abiyatar, dəkõh dənzan aza Davit.

²¹ Abiyatar aprəman sənək Davit na, Sawlu abeyik məsdəlveŋge na Yawe.

²² Davit aɓsən Abiyatar na: «Nəsənək pay nan dəpas na Do'ek mə Edom tay adaka, sessel abew na dawnah sən Sawlu ɓa. Aka batamwi yi wənəŋ akkpaŋ aka gəla na afuk pakə.

²³ Asok də iyna, kəgeslne' ɓa. Vi məzukayaw nawbaywa wakayok nawbayko; zəga tay nawgəɗ suk sə maŋgavaw ɓa.»