1Samiyel 21 - Bible en Guidar

¹ Yaŋ asil ambatə, Yonatan tam amə'ək a walaŋgəla-metiŋ.

Davit a Nob ana məsdələv Ahimelek da

² Davit ambatək a Nob, ana məsdələv Ahimelek da. Ahimelek makran zlah də ələmsən Davit, yaŋ amna: «Vimi kəde takərguk vaŋ məza ɗəf də is ɓaŋ di?»

³ Davit aɓsən məsdələv Ahimelek na: «Məlĩ aɗi suwək wən nan dawnəh na: “Ɗəf adawsən an nəslənuk sənəŋ ɓa də an nəɗi suk wən nanəŋ ɓa.” Net gewleɗ na, nəŋgəɗ sitik va a təki vana.

⁴ Miy avok kakaŋkəŋ di? Avay peŋɗe sle'i, awaniɓa an kərah pakə.»

⁵ Məsdələv azlan sən Davit na: «Peŋ ɗar tay a vaw ɓa, peŋ məɗi sən Maŋgəlva na, nan tay hara, an ɗiy nok dəsapaŋ dit gil ɓa.»

⁶ Davit azlan sən məsdəlva, aɓsən na: sessel va nədagilyew ɗayɗay ama əgaya: Mawrəŋgit gil ɓa, əmpa na gulomɗe net ɗiy naw salalaŋgə. Malaka aŋkəŋka ɗari yi, də as zlaŋ dayday na, dəpaŋ salalaŋgə aza an dəwəl sən wənəska.

⁷ Məsdələv nak apsinik peŋɗe məzergit səka tabəl na Yawe, vi meɓɓet tahəŋ napsən ɓa, kawzi en də offo azet a gəleti.

⁸ Dəpas na Do'ek mə Edom ɗəf səret məɗɗaŋ wəza na Sawlu, badaway net məzuteɗeŋɗe nani, tay əɗɗa wəza aba Yawe.

⁹ Davit anah sən Ahimelek na: «Mbari di, tulhõ awaniɓa masalam tay avok aŋ ɓa sa? Nərah əgəm masalam awaniɓa gulom naw avaw ɓa, vi wəslən na məlĩ van də kakaray yi.»

¹⁰ Məsdələv amna: «Masalam na Golyat mə Filisti məs kəbay awaleŋgit wəleŋɗe gugriɗ məs adawyaŋ na Sen nak yaŋ mətərən də lukut ara lukut na daya net məsdəlveŋge. An kəŋgələk na agəma; tay mbərən balsən aŋ ɓa.» Davit amna: vandən tay ɓa apsuwa.

Davit anet mə Filistiɗe na Gad da

¹¹ Davit asil dəpaska, anzan faraɗa səza Sawlu. Ade ana Akis məlĩ na Gat da.

¹² Məɗɗaŋ wəza na Akis anahaŋ sənən na: Aŋ Davit məlĩ naka dəlvəŋ kiyi ɓa sa? Nam na səni məya gəlya də əskəl ammban dawnəh na: «Sawlu abeyik məzuzelɗe nan gabalɗe, Davit na, gabalɗe kaklaw ɓaɓay ɓa sa?»

¹³ Wəpel vanəs azlahgənək makra Daviti, yaŋ geslne' arma diyɗa sən Akis məlĩ na Gat.

¹⁴ Addəɗanək maɗɗulan a mahereti ndən əɗɗa zəga va mətemin abeti, ndən əŋgbroton zəga aza zit maddambeɗe ɗarɗarə, mbigit mefɗe iymaŋ tolorro azet eŋgemeni.

¹⁵ Akis aɓsit məɗɗaŋ wəza nan na: «Kulannək lewlew na ɗəf mətemni yi, Vimi kəki suwən di?

¹⁶ Ɗiy mətemit dəkkpapaŋ suwən ka kəki aŋkəŋ dəɗɗagən ətem nan anawda sa? Kəŋglaŋ na ɗəfəŋ dətoŋgən anawda sa?»