1Samiyel 2 - Bible en Guidar

Əkkam nat Anna

¹ Anna təkkamka, təmna: «Makraw annekik aka wən na Yawe, wəlaw ɗiliwwey aka wən na Yawe, maw bakaka əmas aket məzuzelɗe nawa. Vi in tat ənneken zu vi əbit noko.

² Ɗəf tay salala va Yawe ɓa. Vi istə Maŋgəlva, tay məbal suk ɓa. Milɓe va Maŋgəlva nam tay ɓa.

³ Kədanzlərgənən əpel nawkaɓ sə mokum ɓa, vi Maŋgəlva məsən zəga ndəni Yawe, ndən məzusla zəga naɗɗa net ɗiy pakə.

⁴ Bəle net məs mekret aŋgəzlka, ɗiy en məddekit pak arəhaŋgək gbogboŋgo.

⁵ Ɗiy məbeti, tahəŋ əkayaŋ wəza nawrəh əzəma, en də may tamə, net wəray tay naɗɗa wəza sam ɓa, ndarzlayək, tuwek kirin buhul egge, akən məzuwa tam nat kpaŋ ndarzlaykə.

⁶ Yawe dədaɗɗa ɗəf adamta gəm ɗəf adawsan madarani, ndən dədaprikgən ɗəf a təki net ɗiy məmtiti may dədawsilgən səka əmta.

⁷ Yawe dədaɗɗa ɗəf məssahã gəm məsarya, dədavviren ɗəfa gəm dədawɗi kiyne'e.

⁸ Tay əsilgit məddekit səka burɗuku gəm məssãhã səka moŋglo ɗigiti, kawɗiyit sap dit ɗiy na məlyã, waɗi aka mazaŋga na gagdaka. Vi dədəka na dəlvafuŋ ava Yawe yi, ndən dəziwgən dələv aketi.

⁹ Tay əga tilit ɗiy məzəprəmən mani, məɓoŋgit akan hara na, wazaŋ ara guzliyo. Vi də gbogboŋgi ɗəf adaska wəla ɓa.

¹⁰ Yawe wazet məzuzelɗe nani, waheyẽt sə disiŋ va buna. Yawe wataw wən aka dələv gboŋgu. Wapsən gbogboŋ sən məlĩ nani, wasilgən mohõ mesiya nani.»

¹¹ Elkana amilik a Rama ananda, wiyən asanək a Silo kaɗɗa wəza na Yawe aba məsdələv Eliya.

Kirtin Eliya

¹² Kirtin Eliya ɗiyən ɗarə, dəsənən Yawe ɓa.

¹³ An məsdəlveŋgeŋ adaɗɗaŋ sitin ɗiy yaŋka: An ɗəf adek əzaɓ-Maŋgəlva na, gawla na məsdələv əzzan də təbəz mayorkok hoku avan gala slu adawda.

¹⁴ Ndən əmpan sə mozgoyo, sə mesteɓe awaniɓa səddəvət mazaŋzaŋkə, an məs təbəz mayorkok agilgən pak məsdələv əgəmən ka nani. Vaski adaɗɗaŋ sitin ɗiy na Israyel məzəzzoŋ a Silo adak pakə.

¹⁵ Gəm əmpa na, tak adawzlanən səlhã, gawla na məsdələv əzzan ənah sən ɗəf məzaɓ-Maŋgəlva nak na: «Avay slu nawya' sən məsdəlva. Aŋgəlna slu mədan səvok ɓa, an madarani ɓa ɓa.»

¹⁶ An ɗəf van anah sənək na: «Əzla səlhã ɗuksa tagay, sissiŋ kəgəmgən an kəŋgələ», ndən ənəh na: «Awwo, naw kakaŋ nəŋgəl kəpsugəni, an vaski ɓa na, wanəgəm na gagay.»

¹⁷ Vaski mambray net gewleɗ van asan metiŋgin diyɗa aba Yawe, vi ɗiyis awlanənək əvəl sən Yawe va zəga ɗarə.

¹⁸ Samiyel nan tay əɗɗa wəza aba Yawe. Lukut na məsdələv na helege na ngərayã agulu.

Migil Samiyel

¹⁹ Aza əzva pak man tat əgəɗ sən lukutək muzliyakə, ndət əkasən pay tədawmbat əzaɓ-Maŋgəlva də zələt nama əzva.

²⁰ Eliya aɓuh sənək ma sən Elkana dət goni, aɓsən Elkana na: «Kəta Yawe dəpsuk kirin meɓɓet dət ɗak nokkəŋkə, dəgəmnəngən gəla wiyən təpsən Yawe əŋka!» Siske na ndəɗaŋ mbat anet da.

²¹ Adan Yawe azaɓat Anna: təɗiyək daway yaŋ tuwə kirin mezeŋgleket hoku dit muguluŋgit sula. Wiyən Samiyel nan tay əɓay aba Yawe.

Eliya tay əheyẽt kirtini

²² Eliya agalək diyɗa. Tay əprəm va kirtin adaɗɗaŋ sitin mə Israyelɗe pakə, gəm adawvoŋgitin gil məzəɗɗaŋ wəza ama gizlirke nalma də Maŋgəlva.

²³ Aɓsit na: «Vimi kədaɗɗaŋ zəga vaŋ di? In tat əprəm zəga mbərayən nokum kədaɗɗaŋ pak səmet ɗiyi.

²⁴ Məppan wənəska kirtuwa! Vi wən an nədaprəm səmet ɗiy na Yawe adabbalanənəŋ tay law ɓa.

²⁵ An ɗəf agəɗək mambray sən ɗəf maɓɓani, Maŋgəlva wazaɓan sit wən na weleŋti. Ya an aka Yawe agəɗ mambray na, naway nakkam viyən di?» Vasna dəprəmnən ma efit ɓa. Yawe armak wən nawbeyti.

²⁶ Wiyən Samiyel na, tay əɓaya gəm tay ərəh kinenek aba Yawe gəm amaheret ɗiye'e.

Maŋgəlva tay əzgan Eliya də gəla nani

²⁷ Ɗəf na Maŋgəlva adek aza Eliya, aɓsən na: «An Yawe anah yaŋka: Nərbanək zu aza gəla na afuk gala asan ammba va Farawən a Eziptə.

²⁸ Səddəvit mahəlfaɗe na Israyel pak anan nəwel dəsangən məsdələv nawa, naddan a matuya, kawzla tursan, nawgul lukut na məsdələv abawa. Əvəl məhhətən an ɗiy na Israyel adawvayaŋ pak nəpsənək gəla na afuko.

²⁹ Vimi kədawndapanən əzaɓ-Maŋgəlva naw gəm əvəl məs nəɗi wən nan a təki nassa nawa, kəɗi kiyit kirtuk daykiywa, kawkərgən zukum də zəga nawvəl maddaabəŋ na Israyel ɗiy naw di?

³⁰ Vini Yawe Maŋgəlva na Israyel aɗiymani, nənahək lahəŋ na: Gəla nok də gəla na afuko wadawaŋ abaw faɗə. Ya kakaŋ na arayka, Yawe aɗiymani! Vi naw na wanəɗi kiyit məzuɗiynən kiywa, wanəzelet məzelewən tamə.

³¹ Pay yaŋ əzzani, wanəbey gewleɗ səŋgil anokda gəm səddəv mahəlfa noko: Kawrəhi mazza eŋgil anokda ɓa.

³² Wakəwəl mosok ɗayɗay anokda. Zəga pak wasan moggon a Israyel; ya anokda na, kəwəl na ɗah mazza kpak ɓa.

³³ Hara na, wanəpəl taka səmmbet kirtuk a matuya nawa, vi horok dəskəlgən piɗpiɗi, mokrok dəssokgəni. Ɗiy nanokda pak wamtaŋ aka seyti.

³⁴ An dədarban suk na, an dədawteh aket kirtuk mezeŋgleket suleŋki, Hofni də Pinhas: wamtaŋ pay taka sulegiti.

³⁵ Wanəsilgən məsdələv an kotakə. Wagəɗ va makraw də megenegenew aŋgələ. Wanəɗi sən gəla kpikki, nan wadaw aba mesiya naw pay pakə.

³⁶ Ɗəf an dədappa madaran anokda pak wade əppu' abani, ammbat koɓok taka gəm maptakakə, wanah sən na: Kamə, asləku aza wəza na məsdələv vi nərahgən an nawgul amawa.»