1Samiyel 19 - Bible en Guidar

Yonatan tay əka wən ammba Davit

¹ Sawlu anah sən Yonatan wətən dit məɗɗaŋ wəza nan pak na, wabay Davit. Ya Yonatan wətən Sawlu aŋgluwək Davit diyɗa.

² Yaŋ Yonatan assak sən Davit, amna: «Afu Sawlu man aka wəbayko. Ya kakaŋ na kamə mazayən də mompummo na asla zuko, arah təki kəɗamgən adaka.

³ Naw wanigili, wanəziw a maŋgava əbba a guli an kədawɗam adaka. Wanəpel wən nok aza əbba, nulagən va adaɗɗa, an mbari na wanəprəman suko.»

⁴ Yonatan apelik wən na Davit moggon moggon aza Sawlu afəni, aɓsən na: «Məlĩ agəɗ mambray aka gawla nan Davit ɓa, vi dəgəɗ suk mambray ɓa, wəzeɗe nan tawtəraŋ wəray azok diyɗa.

⁵ Dula əmta azan va zəga ɓa yas abay mə Filisti, Yas Yawe apsən əska wəla metiŋgin sən Israyel dəwənnani. Kulaka, zuk anneke. Vimi kan kədaŋgla əɗɗa mambray kakgbo' mbel na ɗəf də mezlibezlibe na mani kawbay Davit ɗar di?»

⁶ Sawlu aprəmək ma Yonatan aswayka amna: «Yawe madarani, sessel kawbayni ɓa!»

⁷ Yonatan ayak Davit, aboton sən wən nan pakə, Yonatan akiyək Davit aza Sawlu, asanək aban va lahəŋka.

Mikal tat əkõhgən Davit

⁸ Wəlpa amndanək ətəŋga. Davit alək əlpa dit mə Filistiɗe, akə sitik dərwadərwa, ndəɗaŋ ɓak səbani.

⁹ Pay mbərən, əmpəs mbərayən adək aka Sawlu səza Yawe, tay ɗewwe eŋgil ananda, tulhõ nan avan kawwã. Davit tay əbay gəzləŋtəndəŋ.

¹⁰ Sawlu agay nakkpa' Davit də tulhõ aza gəla əmpa, Davit kofloh, tulhõ na Sawlu aza gəla kpimi. Davit ɓakə akõhuk dəfəɗ nani.

¹¹ Sawlu aslənək maslənɗe ana Davit da kataɗni, kawbayən də mompumo. Yaŋ Mikal, guluk na Davit, təprəman səni, təmna: «An kəkõhgən kiyuk dəfɗəŋ ɓa, mazayən də mompumo na, kawboyki yi!»

¹² Mikal təprikgin Davit də təkifoŋgo məppan naza gəla, ndən ɓak kõhu.

¹³ Mikal təgəmək tuya neŋgili, wəlaŋga; təvoŋgən aka zəga nafna, təɗaman kiyən də zlazlar məhõn də deɓeke net gilewi, təsərət zəga akani.

¹⁴ Sawlu aslən maslənɗe karma Daviti. Mikal təɓsit na: «Gbəgba'i yi.»

¹⁵ Sawlu aslən maslənɗe kawla Davit dawnəh na: «Məki su aka zəga nawvoŋ nan nəbaygəni.»

¹⁶ Maslənɗe azzoŋko, tuya arahaŋ aka zəga nawvoŋgo gəm zlazlar məhõn də deɓekeɗ net gilew a disiŋ kini.

¹⁷ Sawlu aɓsət Mikal na: «Vimi kəmbəɗaw vaŋ kəppan məzuzel naw ambat akõh di?» Mikal təɓsən Sawlu na: «Ndəni dənah su na: Appaw nəmbatə. Nəboyuk kəŋgəl sa?»

May Davit də Sawlu a Nayot

¹⁸ Davit ɓak kõhu. Ambatək ana Samiyel da a Rama, aboton sənək an Sawlu agəɗ sən pakə. Ndən də Samiyel addoŋ assoŋ də gəla a Nayot.

¹⁹ Mənah sən Sawlu, dawnəh na: «Davit tay a Nayot a Rama.»

²⁰ Sawlu aslənek ɗiy karma Davit. Awlanən ngaɓa net məskəleŋɗe tay əɗɗaŋ kəleŋ, daya net Samiyel tay ziwwe, əmpəs na Maŋgəlva armek maslənɗe na Sawlu, ndəɗaŋ pak siyom əɗɗa kəleŋgi.

²¹ Mənah səni Sawlu, yaŋ aslən maslənɗe meɓɓeti, ndəɗaŋ pak siyom əɗɗa kəleŋge'e. Sawlu aslən ngaɓa mohokoni, atoŋgoŋguk siyom əɗɗa kəleŋ pakə.

²² Ndən sən kiyən mbat a Rama. Adan agap a bobok metiŋgin na Seku, assohũ, amna: «Aŋgaŋ may Samiyel də Davit di?» Məzlan sən na: «A Nayot a Rama əŋgə.»

²³ Ambatək a Nayot a Rama adaka. Əmpəs na Maŋgəlva armak tamə; tay əɗɗa kəleŋ hã gap a Nayot a Rama.

²⁴ Nan pak aggbuk lukutɗe nani, agəɗ kəleŋ aba Samiyel, askotuk zən mekeleŋ, hurruɓ dəpaska, kim təki dədaŋgə. Vini adawnahaŋ na: «Sawlu pak tay aret məskəleŋɗe sa?»