1Samiyel 18 - Bible en Guidar

¹ Pay Davit agrak əpel də Sawlu, yaŋ ki Yonatan aləm də Davit diyɗa, Yonatan aŋgləwək va aŋglu kiyzəni.

² Pay dəpas Sawlu dəppan Davit əzar səzan kaddan ana afənda ɓa.

³ Yonatan də Davit aynaŋgək wənmiyna a weleŋti, aŋgluwək va aŋglu kini.

⁴ Yonatan aggbukuk lukut səzan apsən Daviti; apsənək lukutɗe nan nawgaya də masalam nani, bəle nani, gəm maslapa nagzeni.

⁵ A təki Sawlu aslən Davit pak tay əska wəla; vini yi, Sawlu aɗi ka daya net məzəlpaŋ nan pakə, ɗiy pak dit məɗɗaŋ wəza na məlĩ tahəŋ zit nek dəndəni.

Kotorok na Sawlu

⁶ Dəmnda net məzəlpaŋ səza Davit abay mə Filisti na, gil na walaŋgəleɗe gugriɗ na Israyel pak agilyoŋ də wəya gəlya gəm də wəskəla, kawləm sən məlĩ Sawlu dit gaŋgaɗe dit salalayɗe gəm gaŋgaraɗe.

⁷ Gil agəmaŋgək wəla gəlya, ammba zit də wənneke: «Sawlu abayək məzuzelɗe nan gabalɗe ɓaɓayə, na Davit na, gabalɗe kaklaw ɓaɓayə.»

⁸ Makra Sawlu agəɗək ɓərəs ɓerəsə, gəlyas dəl sən ɓa. Amna: «Ndəɗaŋ əpsənən gabal kaklawɗe sən Daviti, su na gabalɗe! An dəpəl sən na ərəh məlĩyə kaka'ə!»

⁹ Səza dəpaski Sawlu atəŋ ula Davit də haran zlollo.

¹⁰ Mazayən nan, Maŋgəlva aslən əmpəs mbərayən aka Sawlu, ndən təŋ əpel ɗarɗar eŋgil ananda. Davit tay əbay gəzləŋtəndəŋ, va ɗaɗayə, Sawlu tay də tulhõ nan avan kawwã.

¹¹ Sawlu askanək tulhõ nani də ənəh na: «Wanəkpa' Davit aza gəla.» Davit kofloh səba tulhõ təl sula.

¹² Geslne adak Sawlu sən Davit, asənək na, Yawe tay dəndəni, na Sawlu na, azganəka.

¹³ Yas Sawlu azargən Davit faraɗa səzani, aɗi ka daya net məzəlpaŋ gabalə. Ndən dədawgilgit gəm dədawmilgit ɗiy səma əgaya,

¹⁴ də təki Davit al pak tay əska wəla, vi Yawe tay dəndəni.

¹⁵ Adan Sawlu awla na tay əska wəla diyɗa, ageslne' sənəka.

¹⁶ Mə Israyelɗe dit mə Yudeɗ pak aŋgluwənək Davit, vi ndəni yi məzugilgit gəm məzumilgit səma əgaya.

Davit tay əkayət Mikal wətən Sawlu

¹⁷ Sawlu aɓsən Davit na: «Merab, wətu akən daya yakəŋkə. Anat nədapsuk ka gulku. Ampa tuluk aka wəza naw kaka'ə, agay wəgay na Yawe.» Əɗɗum na Sawlu na, adawbayən dəvan ɓa dəɗah mə Filistiɗe dəbaynəngəni.

¹⁸ Davit aɓsən Sawlu na: «Intə nawa di, həlfiŋgiɗu gəm məlma na afu mi agapaŋ a Israyel hara nəsawgən dəhən məlĩ di?»

¹⁹ Pay Merab wətən Sawlu, təgap napsənət Davit ka ɗak nani, ndən pəla' ta' əpsənət Adiriyel na Mehola ka goni.

²⁰ Ya Mikal, wətən Sawlu təŋgluwək Davit. Yas məprəman sən wən nan sən Sawlu, awlak wən nan lewi arani;

²¹ Sawlu anah na: «Wanəpsənət ka ɗak nani, vi təsatgən ka bizwil abani, dəbətgən avet mə Filistiɗe.» Təl sula Sawlu anah sən Davit na: «Wakəsok ka dəhu dəpaŋka.»

²² Sawlu aɗi wən nan sit məɗɗaŋ wəza nani: «Məpel sən Davit də mahaɗamma, mənah sən na: Məlĩ aŋgələk wən noko ya məɗɗaŋ wəza nan pak aŋglukunko. Kakaŋ na, ataf kəsokgən ka dəhən məlyã.»

²³ Məɗɗaŋ wəza na Sawlu amndan sənənək wənəs a sləma Davit. Aɓsit na: «Azokum na, zəga nasmay yi əssa ka dəhən məlĩ sa? In ɗəf məssahã gabba foŋ ɗar di?»

²⁴ Məɗɗaŋ wəza na Sawlu anah sənənək an va Davit apel pakə.

²⁵ Sawlu amna: «Mənah sən Davit na: Məlĩ man tay aka arya na way nat ɓa. Ma gimnit mə Filistiɗe səkat aŋgəl kaka'ə, vi kampəlki məlĩ aket məzuzelɗe.» Wəɗɗum na Sawlu vasna, Davit dəbətgən avet mə Filistiɗe.

²⁶ Məɗɗaŋ wəza nan aki sənən wən nan sən Davit. Davit awlak wən nan lew aran ka dəkkpaŋgən dəhən məlyã. Pay məɗiyən dətoŋ ɓa

²⁷ Davit asilik dit ɗiy nan addoŋgu, abayaŋgək mə Filistiɗe səkat sula. Davit akiyik ma gimnit mə Filistiɗe naka, məŋɗeti aba məlyã, vi dəsangən ka dəhən məlyã. Yaŋ Sawlu apsənət Mikal, wətən ka guluku.

²⁸ Yas Sawlu awla gəm asən na, Yawe tay də Davit, Mikal wətən Sawlu təŋgluka.

²⁹ Sawlu tay əgeslne sən Davit day ki lahəŋ əmpa, Sawlu tay əzel Davit pay pakə.

³⁰ Deyeɗe net mə Filistiɗe aza va agilyoŋ əgay pakə, Davit dədaska wəla daykiyit məzəlpaŋ na Sawlu, də tive vaski sləman agil birbiri.