1Samiyel 16 - Bible en GuidarDavit də Sawlu ( 16:1—30:31 ) Maŋgəlva tay əwel Davit ka məlĩ meleketeni 1 Yawe anah sən Samiyel na: «Pay gbəŋgbar kədazban əhəm ammba Sawlu əŋdi? Intə nəzgan adawsan məlĩ aka Israyel ɓa, aknəh bəbər na mẽlẽ, doko, nəslunuk ana Yesse da, mə Bet-Lehem, vi nəwələk səret kirtin məlĩ nawa.» 2 Samiyel amna: «Mbar nədaɗɗa di? An nəmbatək adak Sawlu aprəməka, wabaywa.» Yawe aɓsən na: «Agəm bəlata na wasli avoko. Kənahgən na: “kawzaɓ-Maŋgəlva sən Yawe nəde.” 3 Pay nawzaɓ-Maŋgəlva vani, kiyagən Yesse. Vasna, in sən kiyu wanərban suk an kədaɗɗa; kəppay sən sugən mẽl sən ɗəf an nədawnah suko.» 4 Samiyel aɗɗak an Yawe anah səni, alək a Bet-Lehem. Ɗiy məsɓet na walaŋgəla-metiŋ azzoŋguk də wəkker kawləm səni. Aɓɗaŋ na: «Zay dəkiyuk kpakə?» 5 Yaŋ azlan na: «Zay yi. Əzaɓ-Maŋgəlva nəde wədə sən Yawe. Məbbur zukum, Kəzzoŋgən də in a matuya.» Abburik Yesse dit kirtini, aye a matuya. 6 Adan azzoŋgu, Samiyel awla Eliyab, amna: «Sessel ndəni mesiya na Yawe.» 7 Yawe aɓsən Samiyel na: «Nok kədawla gəɓa zən də əɓay nan ɓa, nəzganəka. Vi naw nawla aza an ɗiy adawlaŋ ɓa: Ɗiyi, an na ma heret adawlaŋgə ya Yawe nan makra ɗəf adawla.» 8 Yesse ayak Abinadab atoŋgən dəba Samiyel, amna: «Yawe dəwel anan ɓa'a.» 9 Yesse atoŋgən Samma, Samiyel amna: «Yawe dəwel aŋkəŋ ɓa'a.» 10 Vaski Yesse atoŋgit kirtin buhul pak dəba Samiyel, Samiyel aɓsən na: «Yawe tay awel səret ɓa.» 11 Samiyel aɓsən Yesse na: «Gewleɗ vet yeŋ gərak sa?» Yas amna owwo, tay muzliya faɗə'e, ya nan gilew adawtaɗa. Samiyel aɓsən Yesse na: «Aslən əkiyən. Məsam na əzəm way tak dəgap aŋ ɓa ɓa.» 12 Yesse aslən əkiyni. Wiyən van pepreŋgi haran pəhpəhə, gəɓa zən nzololo. Yaŋ Yawe amna: «Asil! Appay sən mẽlẽ, ndən yaŋka.» 13 Samiyel agəmək bəbər na mẽlẽ, appay sənək abet milmiŋgiɗni. Əmpəs na Yawe aprikik aka Davit təŋ dəpas ləŋgə hã nadda abe. Samiyel asilik alək a Rama. Əmpəs mbərayən tay əzəmgən sãhã na Sawlu 14 Əmpəs na Yawe azarək səka Sawlu, yaŋ əmpəs mbərayən dəde səza Yawe adawzəmgən sãhã. 15 Məɗɗaŋ wəza na Sawlu aɓsənən na: «Awle əmpəs mbərayən dəde səza Maŋgəlva tay əzəmguk sãhã. 16 Belemɗe nok yeŋ aboko, daya nam dəpeli, wakayaŋ ɗəf dəsən əbay gəzləŋtəndəŋ. Vasna an əmpəs mbərayən na Maŋgəlva tay əpriken akok na, wabaya, wagəɗ suk ɗaɗahə.» 17 Sawlu aɓsit belemɗe nan na: «Asna mərah su ɗəf dəsən əbayən moggoni, məki suwa.» 18 Taka naret gewleɗ nan amna: «Ya nulak wətən Yesse mə Bet-Lehem asənək əbayni; məs makrani, gəm məzəlpa moggoni. Də maɗɗula adawpele, ɗəf lelewiy. Yawe tay dəndəni.» 19 Sawlu aslən maslənɗe aza Yesse ənah sən na: «Aslən su Davit, wətuk an məzuteɗ timeŋgiɗi.» 20 Yesse agəmək koro, peŋ, kwenekwene də mbazla addəvni gəm porsokuk səret gilewi, apsən Davit dəka səngən Sawlu. 21 Davit adek ana Sawlu da, aziwik abani. Sawlu aŋgluwək diyɗa, asanək ka məndə gulom nani. 22 Sawlu aslən ənah sən Yesse na: «Kamə, nəŋgəl kəta na Davit dəsangən aka wəza nawa, vi zu neki dəndəni.» 23 Vaski, an əmpəs dəde səza Maŋgəlva nak aprikik aka Sawlu na, Davit əgəm gəzləŋtəndəŋ nan əbayən. Tay əffeten makra Sawlu, ndən ɓatə, əmpəs mbərayən əzar səkani. |
All right reserved
Bible Society of Cameroon