1Samiyel 15 - Bible en GuidarMaŋgəlva tay əzgan Sawlu 1 Samiyel anah sən Sawlu na: «Anawi yi Yawe aslən kappay suk mẽl ka məlĩ net ɗiy nan Israyelɗe, kakaŋ na, aprəm an əpel na Yawe anahə. 2 Yaŋ an Yawe Məzuɓappak na disiŋ anahə: Nəɗɗumonək an mə Amalekɗe aɗɗaŋ sitin ɗiy na Israyel, atakənək tive gala əgilya net sə Eziptə. 3 Kakaŋ na, dok əbey mə Amalekɗe, azet kakãhə də zəga net pakə, kədappa ɓa, zeli, gili, kirni, məzuwaɗaŋgə, wasliɗe, timeŋgiɗi gəm zlogomeɗ dit korɗe.» 4 Sawlu ayek məzəlpaŋgə, aŋɗet a Telayim. Məzəlpaŋ mədawaŋ də tilit tahəŋ gabal səkat sula gəm ɗiy na Yuda gabal kəlaw. 5 Sawlu adek go'o də walaŋgəla-metiŋ net mə Amalekɗe, avoŋ sitik a lolohõ. 6 Yaŋ Sawlu anah sit mə kenɗe na: «Məzar səzet mə Amalekɗe, məzar səzet faraɗa. Maw tay aka əsapokum azet ɓa, vi nokum kəɗɗaŋgək moggon sit mə Israyelɗe pay agilyoŋ sə Eziptə.» Mə Kenɗe agohoŋgək səzet mə Amalekɗe. 7 Yaŋ Sawlu abey mə Amalekɗe təŋ sə Hawila hã nawtoŋ a Sur, dəmmba pay nampum na Eziptə. 8 Armak Agag məlĩ na Amalek madaran ka məfərsəna, azetik ɗiy pak də masalam. 9 Sawlu dit məzəlpaŋ nan appanənək Agag azet zəgeɗ na sləma va səret wasliɗe, gilewi, gəm səret en uwa masula'a appetinik ndargeyẽɗi dit zəgeɗ mogget pakə. Zəgeɗ en atəraŋna wəray ɓa dit zəgeɗ memeyẽɗ məterit pak azetinke. 10 Yawe apel sənək Samiyel, amna: 11 «Maw nzoki də wəɗi Sawlu aka məlyã, awla aktohuk gəɓan səzawa, dəzban əpel naw ɓa.» Gədəv Samiyel adəka, ndən kim əkkaman Yawe. 12 Samiyel alvəɗək pum kadda ələmsən Sawlu. Yaŋ məzawnahsən sən Samiyel na: Sawlu alək a Karmel kampa serek aka iya nani, siske kakkpaŋ əmbat a Gilgal. 13 Səza Samiyel agap aza Sawlu, Sawlu aɓsən na: «Yawe dəzaɓoko! Nəɗɗak an Yawe anah suwa.» 14 Samiyel amna: «Ya səŋgay sləmaw adaprəm wəhəm net timeŋgiɗ də an net wasliɗeŋ di?» 15 Sawlu amna: «Sənet mə Amalekɗe da akinini. Timeŋgiɗ mogget en ɗiy appaŋ kawzaɓ-Maŋgəlva sən Yawe Maŋgəlva noko. Madembirgit pak məzeti kakãhə.» 16 Samiyel aɓsən Sawlu na: «Mək kana, nənoh suk an Yawe anah su na dəfɗəŋka.» Sawlu amna: «Apeli.» 17 Samiyel amna: «Də kədawzelen zuk va ɗəf ɗar dayday na, kulak kakaŋ aka zeŋvit mə Israyelɗe kənan ɓa sa? Yawe aɗiykuk ka məlĩ na Israyel. 18 Yawe arban sukuk tive, amna: Dok əzet mə Amalekɗe məs mambrayɗeŋki, abey kakãhə. 19 Vimi kəprəm ma Yawe ɓa is ngom aka zəga nawrəh səma wəgay kəgəɗ mbərayən ama hara Yawe di?» 20 Sawlu anah sən Samiyel na: «Nəprəmək ma Yawe, nəzbanək tive məs Yawe arbə suwa. Nəbeyik mə Amalekɗe pakgiti, Agag, məlĩ net nəkiyə. 21 Ɗiy naw agimin timeŋgiɗi, gilewi gəm wasliɗe mogget məs mətektiŋki, vi kawzaɓ-Maŋgəlva sən Yawe Maŋgəlva noki yi a Gilgal aŋka.» 22 Samiyel amna: «Əvəl nawzla kurmbuɗuk də an nawda Yawe aŋgəl day ki əprəm ma Yawe sa? Vaski ɓa! Əprəm ma aŋgəl day ki əzaɓ-Maŋgəlva, əɓe'gən kiya day ki səlhã net ndergeyẽɗi. 23 Əɓoŋgo, məstakayi də ula heligi, əziw aka an noko, məstakayi də əgegdeket tuyeŋge, adan kəzgan əpel na Yawe, nan pak azgokuk səka məlyã.» 24 Sawlu anah sən Samiyel na: «Nəraygənəka. Nəɓe'sən əpel na Yawe də an nok ɓa. Vi geslne sit ɗiy aduwa, nəprəm meti. 25 Ya kakaŋ na, kamə askoɓ su mambray nawa, ade də in nəmbatgən əppu' aba Yawe.» 26 Samiyel anah sən Sawlu na: «Nəmbat na də is ɓa, vi kəzganək əpel na Yawe, Yawe azgokko, kəsok na məlĩ na Israyel ɓa.» 27 Samiyel akkpaŋgək kaddani, yaŋ Sawlu arma aza gabba lukut nani, ndən ngarə. 28 Samiyel aɓsən na: «Vaski Yawe amõh məlĩ na Israyel səvok dəpaŋka apsən baynok məday kiyuko.» 29 Əmpa na: «Məzuwwiɗ na Israyeləŋ awa wən ɓa, aɗi marava ɓa, vi ɗəfi yi dəɗigən marava ɓa.» 30 Sawlu amna: «Nəgəɗək mambray kakaŋka. Də as pak, in tat əkkomoko aɗi kiyu abet ɗiy məsɓet naw də ɗəf titir naw na Israyel; ade də ina nəppu'gən aba Yawe Maŋgəlva noko.» 31 Samiyel alək ammba Sawlu yas Sawlu ambat əppu' aba Yawe. 32 Samiyel anah sit na məki su Agag, məlĩ net mə Amalekɗe. Adeke, zən nek, azan na: «Sessel tatwãh namta tay əmpa ɓa!» 33 Yaŋ Samiyel anah sən na: «Va masalam nok abey kirtit gil diyɗa, vaski mok tədawɗak də wətət sə weleŋgit gil tamə!» Yas Samiyel abəlan Agag aba Yawe a Gilgal. 34 Samiyel amndanək a Rama, Sawlu nan ambatək ananda a Gibeya. 35 Samiyel dula Sawlu ɗah əmpa ɓa, gap əmta nani. Samiyel aɗɗak gəlabay na Sawlu, Yawe man nzoki dawɗi Sawlu ka məlĩ aka Israyel. |
All right reserved
Bible Society of Cameroon