1Samiyel 14 - Bible en Guidar

Yonatan tay əwak sən ngaɓa net mə Filistiɗe taka

¹ Pay mbərən Yonatan wətən Sawlu aɓsən məndə gulom nan na: «Ade, dam aza ngaɓa net mə Filistiɗe dəda ndaka.» Dəzgə meŋ nan sən afən ɓa hara.

² Sawlu tay ɗewwe aket meŋge na Gibeya, ɗewwey ammba tonzok a Migron, dit məzəlpaŋ gap səkat sləre.

³ Ahiyya wətən məlmən Ikabod adawyaŋ na Ahitub wətən Pinhas dəhən Eliya, məsdələv na Yawe dəsan a Silo aguluk lukut na məsdəlva. Ɗiy dəsənnən na Yonatan ambatka ɓa.

⁴ Təki nawtoŋ məs Yonatan adawgay naggar aza ngaɓa net mə Filistiɗeŋ na, mirbizit milɓeɗ sula tay dahãdahã, məs iya net na, Boses gəm Senne;

⁵ Mirbiz an taka kəla tapaslay pay na disiŋgi, haran sek aka Mikmas, maɓɓan kəla dohoŋ haran sek aka Geba.

⁶ Yonatan anah sən məndə gulom nan nak na: «Ade, dam ŋgbu' aza ngaɓa net gẽyẽɗiŋki. Mbərən ɓa na Yawe wagay vimə. Zəga tay nawtak Yawe dapsəm əska wəla dit ɗiy diyɗa awaniɓa dit siɗikke ɓa.»

⁷ Məndə gulom nan nak aɓsən na: «Agəɗ an mokrok aɗɗum naɗɗa pakə, in yakəŋ də is va mokrok aŋgələ.»

⁸ Yonatan amna: «Kakaŋ areɗ səm kəlaket ɗiyiŋki, mərbangən zəm azeti.

⁹ An anahaŋ səmənək na: “Miziw mədegən azokumu,” məziwgən agəlamə, mədawpeŋ azet ɓa.

¹⁰ An anahaŋgək na: Məpeŋ azam aŋka na, məpeŋgin azeti, vasna Yawe dipsim avamə, aski zəga narban səmə.»

¹¹ Sulegit pak arbanənək zit aza ngaɓa net mə Filistiɗe naka, mə Filistiɗe aɓɗaŋ na: «Awle mə Ibriɗe tahəŋ əgilyoŋ səddəvit vovɗe məs aɗamaŋ naka.»

¹² Ɗiy naddəv ngaɓa anahaŋ sənənək Yonatan də məndə gulom nan nak na: «Məpeŋ azam aŋka! Mərban sukumgən zəga naddəv torsoku.» Yaŋ Yonatan anah sən məndə gulom nan nak na: «Azbawa, vi Yawe appetik ammba va mə Israyel.»

¹³ Yonatan apeŋgik də əgivoŋgo, məndə gulom nan nak ammbani. Askotoŋguk aba Yonatan, məndə gulom nan tam əgreket sə dərɓagani.

¹⁴ Əlpa maddaabəŋgəska, Yonatan də məndə gulom nan abayaŋgək gap zel kaklaw sula, a təki hurɗukko ləŋgə.

¹⁵ Ɗiy na dibirgidik, na muyã, naddəv ngaɓa gəm məzetin ɗiy pak ageslne'eŋke, dəlvafuŋ aɓəlka; akkpaŋgək geslne səza Maŋgəlva.

¹⁶ Məgaŋ təki na Sawlu sə Gibeya na Benyamin, awlanən vanday ətəray koyaya.

¹⁷ Sawlu anah sit ɗiy en dəndəni: «Mule ɗiyi kamə, naway dəmbat səzam di?» Məyeti, mulan na Yonatan də məndə gulom nan tahəŋ ɓa.

¹⁸ Sawlu anah sən Ahiyya na: «Aki akoti na Maŋgəlva.» Vi pay nan dəpas na, akoti na Maŋgəlva tay aweleŋgit mə Israyelɗe.

¹⁹ Gala Sawlu adawnah sən məsdəlva, gogoyo awanək zən a dibirgidik net mə Filistiɗe. Yaŋ Sawlu anah sən məsdələv na: «Appan wən nan lahə.»

²⁰ Sawlu dit ɗiy pak akkalaŋ addoŋ ama wəgaya, arihnin məzuzelɗe net tahəŋ əbayanən ziti, geslne adek diyɗa sawɓa.

²¹ Mə Ibriɗe en nammba vet mə Filistiɗe lahəŋ nek dəpeŋgeŋ dənɗaŋ ama wəlpa neki, asapaŋgək azet mə Israyelɗe məs dəssoŋ də Sawlu gəm Yonatan.

²² Ɗiy na Israyel pak en dəɗamaŋ aka gərəm na Efrayim aprəmənək na, mə Filistiɗe anzoŋko. Ndəɗaŋ tam ammbet ɓa' arɓehetin də wəgaya.

²³ Yaŋ Yawe apsit əska wəla sit mə Israyelɗe dəpaska. Wəgay alək gap balsən Bet-Awen.

Məzəlpaŋ na Israyel tay əkõhgənən Yonatan

²⁴ Pay nan dəpaska, ɗiy na Israyel azəmaŋgək sahã, vi Sawlu atekik də wəpel na mefɗeke na: «An ɗəf azəmək way tak moskoy dəgəɗ ɓa, tak nəska wəlet məzuzelɗe naw ɓa na, dəray kuɗupu!» Ɗəf tay dənan way ɓa.

²⁵ Ɗiy naka dələv pak atoŋgoŋ addesl muyã, amama tay adak diyɗa, iyma aka dəlvafuŋ.

²⁶ Səza ɗiy atoŋgoŋ addesl muyã, awlanən amama yaŋ məziyma aka dəlvafuŋ; ɗəf taka tay dəka van aman səmmbet dayday ɓa, vi geslne armek sən mefɗeke adarmeti.

²⁷ Yonatan dəprəm na, afən aswaygitik ɗiyi ɓa. Atələk zleŋge navani, ayop addəv seɓe na amama, aka van a mani. Haran akol bodoŋgu.

²⁸ Ɗəf səret ɗiy amna: «Afuk aswaygitik ɗiy dawnəh na: “Wəray dəsan aka ɗəf an dəzəm way dəpaŋka.” Ya ɗiy ayaŋka.»

²⁹ Yonatan amna: «Afu akiyək tatwãh aka dəlva! Mula ɗa kamə, haraw akol bodoŋ vi nənen amama siɗɗikkeŋki.

³⁰ Va dəpaŋ ɗiy azəmaŋgək an arahaŋ səvet məzuzelɗe na, addeketin na mə Filistiɗe day ki aŋ kəta ɓa sa?»

³¹ Dəpas arbaŋsitinik mə Filistiɗe, sə Mikmas gap a Ayalon. Ɗiy ayaŋgək diyɗa sawɓa.

³² Ɗiy anzoŋguk surro aka zəga neti, almetinik gilewi, kirit wasliɗe dit wasliɗe, atawinik wəlet afuŋ, ampirnənik aket mbeli.

³³ Mənah səni Sawlu na: «Ɗiy tahəŋ əɗɗaŋ mambray aka Yawe, də wəmpər slu aket mbeli.» Amna: «Məzəmaŋ kiya kənanəni, məkəɗəŋgəl su gərəm metiŋgin azaw aŋ dəpaŋka.

³⁴ Sawlu amna: Mətəray aweleŋgit ɗiy kənahaŋ sitingən na: Ɗəf pak dəki wasli nan an time yi abaw aŋka, kətewningin wəlet dahã kəmpərnəngini. Kədaɗɗaŋ mambray aka Yawe də wəmpərən aket mbel ɓa.» Ɗiy pak akininik də dəfɗəs naway pak wasli navani, atewinik wəlet adaka.

³⁵ Sawlu arkək gəlamatuya sən Yawe. Ndəni gəlamatuya an arkə maddaabəŋ sən Yawe.

³⁶ Sawlu amna: «Miprikgən də dəfɗəŋ ammbet mə Filistiɗe məmõhẽtgən hã pay viti, mədappa ɗəf taka dayday səret ɓa.» Aɓɗaŋ na: «Agəɗ an dəwəl lew arok pakə.» Məsdələv amna: «Məssohõn səm ma Maŋgəlva tagay aŋ vanəŋka.»

³⁷ Yaŋ Sawlu assohõn Maŋgəlva na: «Nəzbet mə Filistiɗe wakipsin Israyel avan sa?» Maŋgəlva dəzlan sən dəpas ɓa.

³⁸ Yaŋ Sawlu amna: «Məzar aŋka, mənokum deyeɗe net ɗiy pakə, məkosson lewlewi, mambray miy dəgəɗ dəpaŋ di?

³⁹ Va Yawe məkõhgən Israyel asan madarani, dəsan Yonatan wətu dəraygən daydayə, wamtə.» Səret ɗiy pak ɗəf tay dəzlan sən ɓa.

⁴⁰ Sawlu anah sit mə Israyelɗe pak na: «Nokum məziw də təki taka, naw də wətu Yonatan məsamgən də təki taka.» Ɗiy aɓsənən Sawlu na: «Aɗɗa an kəwəl arok lewi.»

⁴¹ Sawlu akkamanək Yawe na: «Maŋgəlva na Israyel, arban ɗəf nan watə.» Abətək aka Yonatan də Sawlu, ɗiy pak wən tay aket ɓa.

⁴² Sawlu amna: «Məgəɗ vẽpəlu akam də wətu Yonatan.» Yaŋ abət aka Yonatan.

⁴³ Sawlu aɓsən Yonatan na: «Arban suwa, miy kəgəɗ di?» Yonatan aboton səni, amna: «Ha'aw, ənan nənan amama siɗikke səza metteɓ ma zleŋge na vawa. In yakəŋkə, nəmtə.»

⁴⁴ Sawlu amna: «Maŋgəlva dəgəɗ su an naɗɗa, sessel əmta kədamta Yonatan.»

⁴⁵ Ɗiy azlan sənən Sawlu na: «Yonatan məs dəkõhgit ɗiy metiŋ-metiŋ a Israyeləŋ dəmtəgəni? As ula gəbay yi! Yawe madarani, muhur kiyən abət na təttaka afuŋ dayday ɓa, vi də Maŋgəlva yi aɗɗa wəza dəpaŋka.» Vaski ɗiy abitnən Yonatan dəmtə ɓa.

⁴⁶ Sawlu appanək əzbet mə Filistiɗe, mə Filistiɗe amndoŋgək aka dələv neti.

Əska wəla na Sawlu, daŋgla nani

⁴⁷ Adan Sawlu ataf məlĩ aka Israyel, atəŋgək əgay dit məzuzelɗe nan en kiyən tərwəslə pakə, mə Mo'abɗe, mə Ammonɗe, mə Edomɗe, dit milyeŋge na Soba gəm mə Filistiɗe. Də təki aɗi haran pak tay əska wəla.

⁴⁸ Arbanək makra nani, arbəsitik mə Amalekɗe, vaski akõhgit mə Israyelɗe səvet ɗiy məzəppitini.

⁴⁹ Kirtin Sawlu yeŋki: Yonatan, Yiswi, Malki-Suwa. Iya net muguluŋgit sulegit tam yaŋka: Iya nat daya na, Merab, akən sawã tamə, Mikal.

⁵⁰ Iya nat guluk na Sawlu na, Ahino'am wətən Ahima'as. Iya na daya net məzəlpaŋ nan na Abner, wətən Ner, madiya Sawlu.

⁵¹ Kis, afən Sawlu yi, Ner tam afən Abner wətən Abiyel.

⁵² Əgay aləɓək aket mə Filistiɗe pay na Sawlu asan aka məlyã. Sawlu awələk ɗəf məs makran pak, an ɓərsəki ndən əsapən azani.