1Samiyel 13 - Bible en Guidar

Wəgay dit mə Filistiɗe, heslepe na Sawlu

¹ Sawlu agəɗək wəzva. Pay asan məlyã, azəmək məlĩ əzva sula aka Israyel.

² Sawlu awelik ɗiy gabal hoku sə weleŋgit mə Israyelɗe, gabal sula dəssoŋ də Sawlu a Mikmas gəm aka gərəm na Betel, gabal meɓɓet tam assoŋ də Yonatan a Gibeya na Benyamin. Appetik madembirgit ɗiyi, naway pak alək a gizlirke ananda.

³ Yonatan abayək ŋgaɓa net məzəlpaŋ net mə Filistiɗe a Geba. Mə Filistiɗe aprəmənək wən nani. Sawlu affonək gozloro aka dələv nan pak dawnəh na: «Mə Ibriɗe dəprəməni.»

⁴ Mə Israyelɗe pak aprəmənək na, Sawlu abayək ŋgaɓa net məzəlpaŋ net mə Filistiɗe ndəni mə Israyelɗe tahəŋ lew aret mə Filistiɗe ɓa. Yaŋ zel nalpa akkalaŋ aza Sawlu a Gilgal.

⁵ Mə Filistiɗe akkalaŋgək kawgay də Israyel, tahəŋ dit mawteɗ nawgay gabal kaklaw hoku, məpeŋgeŋ pilseŋge gabal sləre, gəm ɗiy honyo' honyo' va hoyoŋko a məlpa. Addoŋ əɗi dibirgidik net a Mikmas, dəmmba pay nampum na Bet-Awen.

⁶ Ɗiy na Israyel awlanən na, ama əzaŋgə, vi məteketi yi, yas aɗamaŋ a bətəŋɗe, addəvit vovɗe, a popor net gərmeŋɗe, addəvit gəleɗe məso'ti, gəm addivit vovɗe net iŋkile.

⁷ Mə Ibriɗe aggaraŋ ki Yurden, dələv na Gad gəm na Galad. Sawlu nan tay a Gilgal tagay, ɗiy nammban pak ageslne'eŋke.

⁸ Sawlu agak pay buhul an məs Samiyel aŋgəɗ sən va, Samiyel dəde a Gilgal ɓa. Ɗiy təray səzani.

⁹ Sawlu amna: «Məki su əvəl nawzla kurmbuɗuku də əzaɓ-Maŋgəlva nawrəh zazaya.» Aɗɗak əvəl nawzla kurmbuɗuku.

¹⁰ Əgrak əɗɗa əvəl nawzla kurmbuɗuku, Samiyel pohu. Sawlu vit ələmsən kasɗani.

¹¹ Samiyel aɓsən na: «Miy kəgəɗəŋ di?» Yaŋ Sawlu aɓsən na: «Adan nula ɗiy atərayaŋ səzawa, is dəvok kəgap va pay kəŋgəɗ ɓa; ya mə Filistiɗe yeŋ məkkelit a Mikmas.

¹² Naw nəmna: “Kakaŋ mə Filistiɗe waderzeheŋ akaw a Gilgal məza nəffeten makra Yawe ɓa soko.” Yaŋ nəgəm wən nan akawa nəɗɗa əvəl nawzla kurmbuɗuk vani.»

¹³ Samiyel aɓsən Sawlu na: «Va dərway kəgəɗəŋka! Kərma wəsəɓ an Yawe Maŋgəlva nok aɗi suk ɓa, vi kakaŋ Yawe adasɓan məlĩ nok aka Israyel faɗ kəta.

¹⁴ Ya kakaŋ na, məlĩ nok aliy na ɓa. Yawe akayək ɗəf an na makrani, Yawe waɗi aket ɗiy nan nawdaw abeti, vi kərma an Yawe aɗi suk wən nan ɓa.»

¹⁵ Samiyel le' sə Gilgal mbat a Gibeya na Benyamin. Sawlu aŋɗetik ɗiy dəppaŋ azan tahəŋ zel gap səkat sləre.

¹⁶ Sawlu də Yonatan wətəni, gəm ɗiy en dəssoŋ dənɗaŋ a Geba na Benyamin. Mə Filistiɗe tam aɗiynən dibirgidik net a Mikmas.

¹⁷ Ngaɓeɗ agilyoŋgək hoku sə dibirgidik net mə Filistiɗe məraygənən təkiya. Ngaɓa maddaabəŋ aɗiyək haran a Ofra, aka dələv na Su'al,

¹⁸ masulan na, haran a Bet-Horon aziya, gəm mahoket tam an naket meŋge, haran sek a walaŋ net derzliŋgeɗ də kapta-muyã.

¹⁹ Məŋzla tay nawrəh aka dələv na Israyel təttaka ɓa, vi mə Filistiɗe aɓɗaŋ na: «Mə Ibriɗe adawvotoŋ masalam də tulhõ ɓa».

²⁰ Mə Israyel pak əpriken anet mə Filistiɗe da, wəɗelen bardaw nani, sokom, zlimbe awaniɓa slogoy nani.

²¹ Kawɗel mabardaw net wasliɗe an na va ɗəfi, dodohõ, məkkportəkiya, gəm zlimbe, wəpɗiw təbzaŋgək nawyã' zəga mamayã pak koɓo taka wəɗakgən hoku.

²² Vasna pay nalpa na, masalam də tulhõ tay avet ɗiy na Israyel ɓa, abbərki ava Sawlu, də Yonatan wətən ɓa.

²³ Ngaɓa net mə Filistiɗe taka, agilik əga təki nakəla Mikmas.