1Samiyel 12 - Bible en Guidar

Əpel na Samiyel sit mə Israyelɗe

¹ Samiyel aɓsən Israyel dəwənnan na: «Yaŋ na nəprəm sukumuk an kənahaŋ suwən pakə: Nəɗi sukumək məlĩ akokum.

² Kakaŋ na məlĩ yaŋ dədawdaw abokum, naw nəgalka, kiyu barə, kirtu yeŋ də mənokum. Naw nədawək abokum təŋ səka sawa naw hã gap pay dəpaŋka.

³ In yakəŋkə məpel akaw aba Yawe gəm aba mesiya nani: Wasli na naway nəgəm di? Koro na naway nəgəm di? Nawa nəsər man di? Naway nəzəmgən sahã di? Səva nawa nəmõh zəga di? Vurum aza zəga na naway nəgəɗ di? Mənah suwa, wanəmndagan sukum.»

⁴ Aɓɗaŋ na: «Kəzəmgəm sãhã ɓa, kəsər mam ɓa. Kəgəm zəga səva ɗəf ɓa'a.»

⁵ Aɓsit na: «Miziwe naw abokum na, Yawe yi gəm mesiya nan dəpaŋka, vi zəga tay kərahaŋ avaw ɓa.» Aɓɗaŋ na: «Dəsan miziwe.»

⁶ Samiyel aɓsit ɗiy na: «Yawe məs dəgəɗ wəza də Moyis gəm də Aron, ndəni dəgilgit efiŋgiɗkum səka dələv na Eziptə.

⁷ Kakaŋ na, məde aba Yawe mətawangən wən nani. Nəŋɗetgin zəgeɗ mogget məs Yawe agəɗ sukum gəm sit efiŋgiɗkum pakə.

⁸ Gala Yakob agap a Eziptə na, efiŋgiɗkum aɓuhənək met sən Yawe. Yawe aslinik may Moyis də Aron, agilgitinik efiŋgiɗkum sə Eziptə, yaŋ ezi a təkiyəŋka.

⁹ Yaŋ azgətaŋ ki Yawe Maŋgəlva neti. Yaŋ avil sən Sisera, daya net məzəlpaŋ na Hasor, sit mə Filistiɗe gəm sən Məlĩ na Mo'ab məs dəgayaŋ dənɗaŋgə.

¹⁰ Yaŋ ahəmaŋ sənən Yawe, Aɓɗaŋ na: “Məgəɗək mambray vi məppanək Yawe, məzbetik Ba'alɗe dit tuyeŋge Astereɗi. Kakaŋ na, atərəm səvet məzuzelɗe namə, məgəɗ sukgən wəza.”

¹¹ Yaŋ Yawe aslin may Yerub-Ba'al, Bedan, Yefte, gəm in Samiyel. Atərkumək səvet məzuzelɗe nokum en dəssoŋ kiykum tərwəslə. Kəssoŋguk fendeŋgi.

¹² Ya səza kulanənək Nahas, məlĩ net mə Ammonɗe ade əwak sukum, kənahaŋ səwən na: Owwo dəɗah məlĩ dəsan akamə: Də as pak mbaraka Yawe Maŋgəlva nokumi yi məlĩ nokumu.

¹³ Ya kakaŋ na, məlĩ an kəweleŋ yaŋka, məs kəssõhoŋgu, Yawe apsukumək məlĩ vani.

¹⁴ An mənokum tat əgeslne'eŋ sənən Yawe, munokum tat əgəɗ sən wəza də wəprəm mani, kəggbakən ma Yawe ɓa, asna mənokum də məlĩ dəsan akokum pak wakəzbanən Yawe, Maŋgəlva nokum.

¹⁵ An kəprəmən ma Yawe ɓa, an kəggbakənək ma Yawe, asna Yawe waslan van akokum va aket efiŋgiɗkum.

¹⁶ Kakaŋ əmpa na, miziw mula zəga metiŋgin məs Yawe adaɗɗa ama horokum.

¹⁷ Pay nawtaw haykəmari yi kakaŋ ɓa sa? Dəpaŋ wanəkkaman Yawe wahãyə, buwən waziyə. Məsəna, mula əday na mambray nokum an kəɗɗaŋ ama hara Yawe də wəssõh məlĩ avani.»

¹⁸ Samiyel akkamanək Yawe, pay dəpas ləŋ, Yawe ahãygənək buna, aziyə. Yaŋ ɗiy pak ageslne'eŋ diyɗa sən Yawe gəm sən Samiyel.

¹⁹ Ɗiy pak anahaŋ sənən Samiyel na: «Akkaman Yawe Maŋgəlva nok ammbet belemɗe noko, vi mədamta ɓa, vi də wəssõh məlĩ namə məzleɓək mambray aket mambrayɗe nam pakə.»

²⁰ Samiyel aɓsit ɗiy na: «Kəgeslne'eŋ ɓa. Vaski yi, mənokumtə kəraygənəni, ya kədaktuhnən gəɓokum səza Yawe əmpa ɓa, məgəɗ wəza sən Yawe də mokrokum taka.

²¹ Kədawzaraŋ səzan ɓa, as əzbet zəgeɗ ɗar məs atəraŋ na wəray ɓay, aɓapaŋ na wəkõhgənən ɗəf ɓa, adan zəgeɗ mekeleŋ ɗarəŋgə.

²² Yawe azget na ɗiy nan ɓa ammba iya nan metiŋginiŋka, vi Yawe armak a makran ka kəssoŋgən ɗiy nani.

²³ Kəlazaw anaw na, dədah nəgəɗgən mambray aza Yawe, nəppangən əkkam ammbokum ɓa; waniyogokum tive moggon sarra.

²⁴ Hara na, məgeslne' sən Yawe, məgəɗ sən wəza təstəs də mokrokum taka, mula va aɗɗe zəgeɗ gugriɗ vikum.

²⁵ An kəɗɗaŋgək mbərayən hara na, kawzokumi yi də məlĩ nokum pak kəkəɗə.»