1Samiyel 11 - Bible en Guidar

Əzva maddaabəŋ na Sawlu aka məlyã ( 11:1—15:35 ) Sawlu tay əska wəlet mə Ammonɗe

¹ Nahas, məlĩ net mə Ammonɗe, adek əsərŋgəsl walaŋgəla-metiŋ na Yabes, addəv Galad. Ɗiy na Yabes pak anahaŋ sənən Nahas na: «Miynə səm wənmiyna awalaŋmə waməgəɗ suk wəza.»

² Nahas, mə Ammon aɓsit na: «Vaŋki nədaynan wən də mənokum, də wəɓəh horokum dəzəŋ taka taka pakə, wanərbə sən wil sən mə Israyel pakə.»

³ Ɗiy məsɓet na Yabes aɓɗaŋ na: «Apəlsəm əvoŋ buhulu, məsləngən metiveɗ aka va na Israyel pakə. An ɗəf tay nazza wətərəm ɓa, asna waməgil azok kawvoŋgən suk kiymə.»

⁴ Metiveɗ addoŋguk a Gibeya, a walaŋgəla na Sawlu, aboton sitin wən nan a sləmet ɗiyi. Ɗiy pak aslanənək wəlet ahəmaŋka.

⁵ Aka payəs Sawlu agap səzet wasliɗe nan sura, amna: Miy dərih ɗiy pak əhəmaŋgəŋ di? Məboton səni əpel net ɗiy na Yabes.

⁶ Adan Sawlu aprəm wənəska, Əmpəs na Maŋgəlva aprikik akani, gədəvən adək diyɗa sawɓa.

⁷ Andək wasliɗe mezeŋgleket sula, apiwetike, sissiŋ aslin metiveɗ dit sluɗe aka va na Israyel pakə, də wənah sit ammban na: «Ɗəf an dəzbet may Sawlu də Samiyel a təki əgay ɓa na, kaɗɗeti wasliɗe nan vaska'e.» Geslne na Yawe armek ɗiyi, agilyoŋguk va ɗəf taka.

⁸ Aŋɗetik ɗiy a Bezek: Mə Israyelɗe tahəŋ gabal səkat hoku, ɗiy na Yuda, gabal kaklaw hoku.

⁹ Anah sitin metiveɗ en dəzzoŋ na: «An kədawnahaŋ sitin ɗiy na Yabes na Galad yaŋka: Mazayən aka pay sla'sla' wakərəhaŋ wəbbaha.» Metiveɗ addoŋguk ənah sit wənəs sit ɗiy na Yabes, zit annekke.

¹⁰ Ɗiy na Yabes aɓɗaŋ na: «Mazayən waməgil azokum, kəɗɗaŋgən də mənam va kəŋglaŋ pakə.»

¹¹ Vit pumpum nani, Sawlu awɗeket məzəlpaŋ nan ngaɓeɗ temtem hoku. Atoŋgoŋ a dibirgidik a bapummo, abeynin mə Ammonɗe hã gap pay sla'sla'ə. En dəkõhoŋ pak atərayaŋka, kawrəhi ɗiy sula a təki taka ɓa.

¹² Yaŋ mə Israyelɗe anahaŋ sənən Samiyel na: «Aŋgaŋ məs dəŋgəmaŋ Sawlu dəsangən məlĩ akam ɓaŋ di? Məpsim ɗiy vetiski məbeygini.»

¹³ Sawlu amna: «Ɗəf tay nawbay dəpaŋkəŋ ɓa, vi dəpaŋki yi Yawe apsən əska wəla sən Israyel.»

¹⁴ Samiyel anah sit ɗiy na: «Məde, mədam a Gilgal məsɓangən wən na məlĩ adaka.»

¹⁵ Ɗiy pak addoŋguk a Gilgal. Aɗiynənək Sawlu ka məlĩ aba Yawe a Gilgal adaka, azaɓaŋgək-Maŋgəlva nawrəh zazay aba Yawe adaka, Sawlu dit ɗiy na Israyel pakgit annekenənək zit diyɗa adaka.