1Samiyel 10 - Bible en Guidar

¹ Samiyel agəmək bəbər na mẽl aman aka kini, yaŋ arma slakatə, amna: «Yawe sən kiyən dəppay suk mẽl nawɗiyuk ka daya net ɗiy nan ɓa sa?

² Dawmbat dəpaŋ sənawda, wakərah ɗiy sula a Selsa go'o də magamas nat Rakel, aket meŋge na Benyamin, wanahaŋ sukun na: “Korɗe kəmbat əkeyet nek mərihtiŋgə; ya afuk appanək wən net korɗe makran tay əzlah vikum. Tay ənəh na: Mbar nədaɗɗa vi wətuwəŋ di?”

³ Kəlgən ɓuh sədaka, kəlgən hã aza wəlaŋga adawyaŋ na Elon na Tabor, zel hoku məzəddoŋ addəv gəla na Maŋgəlva a Betel warəhkun adaka, taka net tay dit porsokɗe hoku, masulet dit peŋɗe hoku, mahoket tay də kwenekwene na mbazla.

⁴ Wassohõnən zazay na gəɓa zuko, wapsukun peŋɗe sula kətefgən səveti.

⁵ Sə dərɓagan Kəgapgən a Gibeya na Maŋgəlva, adak guvernerɗe net mə Filistiɗe assoŋgu. Pay kədawgap adak a walaŋgəla-metiŋ na, wakələm də ngaɓa net məskəleŋɗe dədaprikeŋ sə təki nawzaɓ-Maŋgəlva dit məbayaŋ gəzləŋtəndəŋɗe, məbayaŋ dəgəleɗi, məffoŋ pozloroɗe gəm dit məbayaŋ gaŋgaraɗe abeti; net sən kiyit tay əɗɗaŋ kəleŋgi.

⁶ Əmpəs na Yawe waprik akoko, nok pak wakəgəɗ kəleŋ sap dənɗaŋgə, wakəkkpaŋ ka ɗəf temme.

⁷ An zəgeɗis pak aɗɗaŋka, kəɗɗagən an məs vok arah naɗɗa pakə, vi Maŋgəlva tay də isi.

⁸ Kəprikgən a Gilgal daabəŋ kiywa; in tat əpirkew azok adaka, kawda əvəl nawzla kurmbuɗuk də əzaɓ-Maŋgəlva nawrəh zazaya. Kəgugən pay buhul hã gap pay an nədazzaw əruhko, nərban sukgən an kədaɗɗa.»

⁹ Səza aktoh gəɓan kawmbat səza Samiyel ləŋgə, Maŋgəlva kpaŋgən makrani, an Samiyel apel sən pak arbək pay dəpas kpekpe'i.

¹⁰ Azzoŋguk adak a Gibeya, ngaɓa net məskəleŋɗe adek ələmsəni, əmpəs na Maŋgəlva asanək akani, agəɗək kəleŋ sap dənɗaŋgə.

¹¹ Masənkeɗ nan far awlanənka: tay dit məskəleŋɗe, tay əɗi zən ka məskəleŋ, ɗiy əssohõnən ziti, aɓɗaŋ na: «Miy dəgəɗ aza wətən Kisiŋ di? Sawlu van məskəleŋgi tam sa?»

¹² Ɗəf taka səret adak azlani, amna: «Ya naway efit di?» Vas əpel van asan ka wən məkkpaŋga: «Mbara Sawlu van məskəleŋgi tam sa?»

¹³ Səza agrak əɗɗa kəleŋ, alək a gəlamatuya.

¹⁴ Yaŋ madiya Sawlu anah sit də gawla nan na: «Aŋga kəddoŋ di?» Amna: «Wəkeyet korɗe, mirih dayday ɓa, yaŋ məmbat aza Samiyel»

¹⁵ Madiya Sawlu amna: «Kamə anah su ɗa, miy Samiyel van anah sukum di?»

¹⁶ Sawlu aɓsən madiyan na: «Anah səm na mərihtiŋ korɗe veti.» Dəboton sən wən na məlĩ məs Samiyel anah sənəŋ ɓa.

Tay əɗiynən Sawlu aka məlĩ də vẽpəlwa

¹⁷ Samiyel ayek ɗiy aba Yawe a Mispa.

¹⁸ Aɓsit mə Israyelɗe na: «An Yawe, Maŋgəlva na Israyel anah yaŋka: “Intə nəgilgukum mənokum mə Israyelɗe sə Eziptə; nəkõhgukum səmmba vet ɗiy na Eziptə, gəm səvet milyeŋge meɓɓet məs dəsərnən mokum.”

¹⁹ Yaŋ dəpaŋ kəzganən Maŋgəlva nokum, məs dəkõhgukum səddəvit tatwãhɗe də wəzəmsahã nokum, kənahaŋ sənən kan na: “Apsəm məlyã!” Kakaŋ na, məde miziw aba Yawe, va mahəlfaɗe gəm va məlma nokum assoŋgu.»

²⁰ Samiyel ayek zeŋvit mə Israyelɗe baymet dətoŋgoŋgəni, yaŋ zev Benyamin arbə.

²¹ Atoŋgitik mahəlfaɗe na Benyamin, abətək aka zev Matri. Səddəv zevnəs əmpa na, aka wətən Kis adawyaŋ na Sawlu abətə. Akayanənka, mərəhni ɓa.

²² Assohõnən Yawe əmpa: «Sawlu van adek aŋkay dərəŋ sa?» Yawe azlan sit na: «Yaŋ haɗamma awaleŋgit zəgeɗi.»

²³ Anzoŋ agəmnən sədaka, aziwik a weleŋgit ɗiy: Tay piyok daykiyit ɗiy pakə.

²⁴ Samiyel anah sit ɗiy pak na: «Kulanənək ɗəf məs Yawe aweləŋ sa? Vi səret ɗiy pak na ɗəf tay va ndən ɓa.» Ɗiy pak arganənək veti, aɓɗaŋ na: «Azəm kirim məlyã!»

²⁵ Samiyel aŋɗanək an dəwəlsən məlĩ sit ɗiyi, siske aver addəv ɗerewel, aɗi addəv gəla aba Yawe. Samiyel appetik ɗiy əmbataŋgə, naway pak ananda.

²⁶ Sawlu tam alək ananda a Gibeya, məzəlpaŋ en Maŋgəlva arəŋgən mekret addoŋguk dəndəni.

²⁷ Məs taggbelemɗe aɓɗaŋ na: «Mbari ɗəfəŋ adawkõhgəm di?» Azelenənka, dəkiyaŋ sənən əvəl ɓa, ya nan asanək ɓatɓatə.