1Piyer 5 - Bible en Guidar

Əɓe'gən kiya net məkristuɗe gəm wəza ( 5:1-11 ) Əzga' sləma aka ngaɓa na Maŋgəlva

¹ Yaŋkəŋ kan na, in tat əsəɓ sit ɗiy məsɓet na walaŋkum, in ɗəf məsɓaw va ndəɗaŋ, miziwe na əzəmsãhã temtem na Kristu, in məs də haran naw addəv gagdak narban zəni.

² Mətaɗ ngaɓa na Maŋgəlva məs apəl sukum, də əzga sləma akani məza addəv gagay ɓa də əŋgla na mokrokum va Maŋgəlva aŋgələ; məza də mamayã narəh deleɗ ɓa, ya də əppan sən kizukum.

³ Kədawzəmaŋ məlĩ aket ɗiy en məppet avokuməŋ ɓa, məssoŋ ka ɗiy məs ngaɓa adawgəm ədaw neti.

⁴ Pay məzutaɗa an daya adazzan na, wakərəhaŋ mətərkiya an də gagdaka, məza awray ɓa.

⁵ Gewleɗi, nokum pak məprəm met ɗiy məsɓeti. Məɓe' sən zukum addəv ənziya a walaŋ zukum pakə. Va Əver anahə: Maŋgəlva tay əbay gagay sit məgagdakanən ki ziti, ya wapsit mbəlembəle sit ɗiy məɓe'gənən ki ziti.

⁶ Məvoŋgən ki zukum aba Maŋgəlva məs də əɓapa, vi dəsilgukumgən pay məs aɗiyə.

⁷ Məpsən əɗɗum nokum pakə, vi tay əzga sləma akokum.

⁸ Məzi zukum, məga, vi məzuzel nokum Satan, tay va ɓoolu adawhay dawkay zəga nawzəm nani.

⁹ Məɓoŋ akani, məssoŋ ɓəlɓəl addəv ətaf nokum də əsənən na əzəmsãhã vanəs tay viyit milmiŋgiɗkum məzutafaŋ nammba dələv pakə.

¹⁰ Ya Maŋgəlva afən mbəlembəle məs dəyukum addəv gagdak an faɗ addəv Kristu wasɓokum dəvani dərɓaga sãhã məs kəzəmaŋ ənziya siɗikke; waɓɓəlokum, wapsukum gbogboŋgo, waziwgukum ɓəlɓələ.

¹¹ Əzəm məlĩ nani hã faɗə. Amin.

Əbaymani ( 5:12-14 ) Əsɗa an bayma faɗə

¹² Nəver sukumək wən siɗikkes də əbbah na Silas, məs nədawɗi ka məlmu məziw aka təstəsə, vi dəsɓokumgəni, dərban sukumgən na addəv mbəlembəle na Maŋgəlva kpak kəziweŋgi.

¹³ Sap net muwele na Maŋgəlva na Babilon gəm wətu Markus asɗokumənko.

¹⁴ Məsɗan zukum də wəsɗa an na wəŋgla na məlma. Zazay dəsan akokum mənokum naddəv Kristu pakə!