1Piyer 4 - Bible en Guidar

Ənziya meleketeni

¹ Vaski, va Kristu azəmsahã addəv gəɓa zəni, nokum pak məssoŋ məsla zukum də əɗɗum vaska vi ɗəf məs dəzəmsahã addəv gəɓa zəni, awɗakək də mambraya.

² Addəv pay dəpəlsukum nanziya nokum egge pakə, təŋ kakaŋka, aslək kədawaŋgən va aza əŋgla na Maŋgəlva məza va aza əŋgla na gəɓa zə ɗəf ɓa.

³ Vi, pay məs kəzanən lahəŋ də əɗɗa an nannek zit ɗiy məs dəsənən Maŋgəlva ɓaŋ məkki. Kəssoŋguk addəv əɗɗa ɗarɗarə, wəsim mbərayən, əbay na mbazla, əsmay mbərayən, wəsa mbazla diyɗa də wəzaɓ zəgeɗkamaŋgəlva.

⁴ Kakaŋ kan na, ɗiy məs dəsənən Maŋgəlva ɓa, tahəŋ əggətaŋgə vi kawsapaŋ dənɗaŋ addəv wədaw net mbərayən də wəsmay net mbəraynəŋ ɓa, vini adawrokuməni.

⁵ Ya waŋɗanən an məs adaɗɗaŋ pak aba Maŋgəlva məs dəsla zən nawtawwən aket ɗiy mederet dit mimtiti.

⁶ Sən wən nani məpel alabara nenek sit ɗiy mimtit daydayə; vasna, də mətawwən eket addəv ənziya egge net va eket ɗiy pak zlaŋ, arəhaŋgək tive gəgaŋ də mbəlembəle na Zeŋgile salala nanziya va Maŋgəlva aŋgələ.

Maŋgəlva tay əvəl sən ɗəf pak va an dəslə

⁷ Wəgrak na zəga pak go'oy. Vasna, məssoŋ də maɗɗula ɗeŋge vi kəɓapaŋgən əkkama.

⁸ Ya an dəday pak na, məŋglu zukum mokrokum taka, vi wəŋgla awsərət kiyit mambrayɗe diyɗa.

⁹ Mətaf zukum eŋgil anokumda va melekeɗi, məza də wərwər amban ɓa.

¹⁰ Məbbah sən zukum də wəza naway pak va an Maŋgəlva apsəni. Vasna wakəssoŋ məsənaŋ əɗɗa wəza də əvəl temtem na Maŋgəlva.

¹¹ An ɗəf wapeli, dəpel wən na Maŋgəlva; an ɗəf tay əɗɗa wəza, dəɗɗa də gbəgboŋ an Maŋgəlva apsəni, vi addəv zəga pak Maŋgəlva dərahgən gagdak də Yesu Kristu məs gagdak də əɓap pak asan nan hã faɗə. Amin!

Wəzəmsahã də Kristu

¹² Bayneŋgiɗəw na makrawa, kədassoŋ gərəŋ an mənokum tat addəv offo na əzəmsahã naslukum, va kəmna zəga məs də tiveni ɓa ɓa.

¹³ Ya mənneken zukum, vi kəsapaŋgək də Kristu addəv wəzəmsahã nani, kərəhaŋgən wənneken zukum, pay adarban zən də gagdak nani.

¹⁴ Va məzəmgukum sãhã aka wən na Kristu pak mənneken zukum vi Əmpəs na Maŋgəlva məs də gagdak tay akokum.

¹⁵ Ɗəf səmbokum adawzəmsahã aka wəbaygəbay ɓa, aka əhal ɓa, awaniɓa aka əɗɗa mambray ɓa, mãy aka wətoŋ wən na ɗəf ɓa,

¹⁶ Ya an vi asan məkristuwi wil adawdanən ɓa, dəgəɗ soko sən Maŋgəlva dərəŋ vi asan də iyaska.

¹⁷ Vi pay agapək məs ətawwən adawtəŋ də gəla na Maŋgəlva. Ya an atəŋgək də mənam na, mbari əgrak net ɗiy məs dətafən Wən Nenek na Maŋgəlva ɓa di?

¹⁸ Va Əver anah na: An ɗəf an təstəs akõhuk sãhãsãhã na, mbar adawsan sən ɗəf məs dəsən Maŋgəlva ɓa gəm sən məgəɗ mambray di?

¹⁹ Vasna, məzəmaŋ sahã dəka əŋgla na Maŋgəlva dəzbanən əɗɗa moggoni, dəppanən zeŋgilet ava məs dəzəməɗ zəga, akkpaŋgan man ɓa.