1Piyer 3 - Bible en Guidar

Gil dit zeli

¹ Gili, nokum pak məprəm met zel nokum, vi an ɗiy meɓɓet səwaleŋgit dətafən wən na Maŋgəlva ɓa, kəta dətafnəngən sən ədaw nokum məza sən əpel ɓa,

² də ula ədaw nokum moggoni gəm də lumbu' lumbu' nokum.

³ Lelew nokum adawsan dəppaka ɓa: wətroɗ kiya, miypa'a na meleŋge, mãy lukutɗe na sləma ɓa,

⁴ ya dəsan də makrokum, lelew məs awray ɓa maɗɗula na zazaya, məs də sləma diyɗa aba Maŋgəlva.

⁵ Vaski lelew net gil en dətafən Maŋgəlva asan lahəŋ aka farə, aɗiyənək əga net aka Maŋgəlva, aprəmənək met zilŋgitti.

⁶ Va Sara təprəm ma Abraham zilta, təya na: «Daya nawa», kirtit kan kənanaŋ addəv əɗɗa moggoni, kədawgeslne'eŋ sən zəga maɓɓan ɓa.

⁷ Munokum zel tamə, məssoŋ dit gil nokum də wəsənən na ɗiy məddektiŋgə, məgagdeketi vi net pak warəhaŋ mbəlembəle na zeŋgile sap dəndukum, məgəɗ vaska vi əkkam nokum adattap ɓa.

Wəzəmsahã də wəɗɗa an təstəsə

⁸ Əbay man na: Məssoŋ də maɗɗula taka, wəɗɗum taka, məssoŋ də əŋgla na məlma, mulaŋ sahã aka zukum, məza əgagdakan zukum ɓa.

⁹ Kədamndaganən mambray də mambray ɓa, awaniɓa əra a gəla əra ɓa, kan dərəŋ na məgəɗ sit əzaɓa, vi aka aski Maŋgəlva ayukum ka kərəhaŋgən əzaɓa.

¹⁰ Vi, ɗəf an dəŋgəl zeŋgile gəm ərah ənziya nek addəv ənziya nan egge, aslək dətaɗgən hərzlumun səza əpel mbərayən, gəm dərma man də uwa wəna.

¹¹ Dəppan mbərayən gəm dəgəɗ moggoni, dəkayan əssa zay zən soksoku.

¹² Vi hara Daya tay sekke aket ɗiy en təstəsə. Sləman pakka ammba əkkam neti. Ya hara Daya tay totoŋtotoŋ aket məɗɗaŋ mambraya.

¹³ Naway nawgəɗ sukum mambray an kəppanənək ki zukum ammba əɗɗa moggon di?

¹⁴ Ya an wakəzəmaŋ sahã aka moggon məs kədaɗɗaŋ zlaŋgə, inyã inyã iyi azokum. Geslne adawdukum sit ɓa, maɗɗulokum adazlzlaɓ ɓa.

¹⁵ Ya Məgagdakan Kristu a makrokum ka Daya nokum. Pay pak məssoŋ məsla zukum nawzlan sit ɗiy məs dədassohokumən aka əga nokum.

¹⁶ Ya məzlan sit ɗiy məzəssohokumən də makra zazaya, də wəɓe'gən kikum, də wəɗɗum na makrokum moggoni, vi wil dədeningin məzupeleŋ mbərayən aka wədaw nokum moggon addəv Kristu əŋka.

¹⁷ Ɗəɗah əzəmsahã vi wəza moggoni, an aski Maŋgəlva aŋglə, ki əzəmsahã vi wəza mambraya.

¹⁸ Vi Kristu sən kiyən amtək tel taka mək vi mambray net ɗiyi, ndən məs salala amtək viyit məs mambrayɗe vi kakukum aza Maŋgəlva. Məbayni gəɓa zəni, ya madarani addəv Əmpəsa.

¹⁹ Ndəni kan ambat əpel Wən Nenek sit əmpəsɗe na fərsəna.

²⁰ Ndəɗaŋgə ɗiy dəɓoŋgoŋ lahəŋ aka Maŋgəlva aɓəs aka pay Nuwe adawzaɓ bəlay. Ɗiy siɗikkeŋ kaka addəvən, ɗiy dədopoɗo dəkõhoŋ səret iŋkile.

²¹ Vasna iŋkileŋki, ana baptem məs dədawkõhgukum kakaŋ arbaŋgə, əskoɓ haramba na gəɓa zə ɗəfi ɓa, əŋgla əssa makra babar səva Maŋgəlva yi, tay əkõhgukum də wəsilye na Yesu Kristu səka əmta.

²² Nan ateŋgik a disiŋ tay aka va dəzəŋ na Maŋgəlva, tay əzəm məlĩ aket maslayɗe də aket gagdakɗe, də aket əɓapɗe.