1Piyer 2 - Bible en Guidar

Gərəm madaran dit ɗiy salala

¹ Vi vaski məppan mbərayən pakə, əmbəɗan ɗəfa, muluvuluvu, kotoroku gəm əpel mbərayən aka ɗəf pakə.

² Məssoŋ va kirin muwet kakaŋka, məŋglu momvo an saksakə, ana əpel na Maŋgəlva, vi kəɓayaŋgən dəndən hã gap aza əkõhõ.

³ An kulanənək na Daya moggoni na:

⁴ Məde azani, ndəni gərəm madarani, məs ɗiy azgaŋgə, ya məweley gəm na sləmay diyɗa ama hara Maŋgəlva.

⁵ Nokum van kpakə, va gərmeŋge medereti, məssoŋ mərkukum ka gəla nassa na Zeŋgile Salala, ka əsap net məsdəlveŋge salala napsən əzaɓ-Maŋgəlva na əmpəs sən Maŋgəlva məs adawtaf də Yesu Kristu.

⁶ Vi tay məpelin addəv Əver na: «Awle in tat əɗi gərəm na bezler a Siyon adaka, məwele iyi gəm na sləma diyɗa, ɗəf dəɗi ətaf nan akani, sessel wil adanən na ɓa.»

⁷ Azokum munokum məs kətafaŋ kan na, gərəm na sləmay sawɓa, ya azet ɗiy məs dətafaŋ ɓa na: Gərəm məs mərkaŋ gəla azgaŋgə, akkpaŋ gərəm kiwən naka bezler,

⁸ gəm əmpa na: Gərəm nawtaŋgbaygit ɗiyi, milɓe məzləb ɗəfa. Adaŋgbayaŋ na vi dətafən əpel na Maŋgəlva ɓa, aski dədawriti.

⁹ Ya nokum, mahəlfa an muwelin kənanaŋgə, məsdəlveŋge na məlyã, kirtindələv en salala, ɗiy məs Maŋgəlva abit kənanaŋgə, vi kərbanəngən wəza gagdak na məs dəyukum səra guzli ara əkeɗeɗe nani.

¹⁰ Lahəŋka, ɗiy na Maŋgəlva kənanaŋ ɓa, ya kakaŋka ɗiy nan kənanaŋgə: Lahəŋka, kərahaŋ ulasahã nan ɓa, ya kakaŋkana kərahaŋgək ulasahã nani.

Haran net məkristuɗe aka pay na əzəmsãhã ( 2:11—4:19 ) Əssa məzutaf awalaŋgit ɗiy məs dətafaŋ ɓa

¹¹ Bayneŋgiɗu na makrawa, molhẽɗ kənanaŋ, melekeɗ aka dəlvəŋka. Vini nədakkamokum kədapaŋ tive sən əsim zəga na gəɓa zə ɗəf ɓa, vi tay kay tive pay pak kawzan zeŋgilokum.

¹² Wədaw nokum dəsan moggon awaleŋgit ɗiy məs dəsənən Maŋgəlva ɓeŋki, vasna an aɗikumənək va məɗɗaŋ mambray daydayə, an tahəŋ ulanən wəza moggon nokum, wagagdakanən Maŋgəlva pay adazani.

¹³ Məɓe' sit ɗiy gugiriɗ na dəlva, vi wən na Daya, mãy sən məlĩ metiŋ vi gagdak nan adayək kiyit ɗiy meɓɓeti.

¹⁴ Mãy sit deyeɗe na kivadəlva va maslənɗe nan vi kazga' sit məɗɗaŋ mambray gəm vi kawgagdaket məɗɗaŋ moggoni.

¹⁵ Vi aŋki wəŋgla na Maŋgəlva də əɗɗa moggoni kəmsanəngən met dirweŋge gəm met ɗiy məs dəsənaŋ zəga ɓa.

¹⁶ Va ɗiy dəssoŋ na kiyti, kədakkpaŋganən əsso na kikum ka zəga nawsərət ki mambray ɓa, mədaw va məɗɗaŋ wəza na Maŋgəlva.

¹⁷ Məgagdeket ɗiy pakə, məŋliw milmiŋgiɗkum naddəv ətafa, məgeslne' sən Maŋgəlva, məgagdakan məlyã.

Wəzəmsahã va Kristu

¹⁸ Balamɗe, məprəm met deyeɗe nokum də wəgeslne' siti, sit en mogget gəm en mulaŋ sãhãy kaka ɓa, də sit en məsdarawɗe pak iyi.

¹⁹ Vi moggoni, an ɗəf aɓəsək əzəmsãhã dəka man bartata ammba əɓe' sən Maŋgəlva.

²⁰ Madawtər sukum an kəɓəsənək ərga aka mambray nokum di? Ya an kəɓəsənək əzəmsahã vi wəɗɗa moggoni, asna Maŋgəlva wagəɗ sukum mbəlembəle.

²¹ Sən aski Maŋgəlva ayukum, vi Kristu sən kiyən azəmək sahã vikum, arbəsukumək tive kəzbanəngən təlni.

²² Ndən məs dəgəɗ ɗah mambray ɓa. Ndən məs uwa wən dəgil ɗah sə man ɓa.

²³ Ndən məs mərani, məza ndən əmndan əra ɓa, dəzəmsãhã məza ndən əbaygagay sən ɗəf ɓa, appanək ki zən ava Maŋgəlva mətawwən də təstəsə.

²⁴ Ndən zək nan məs dəslet mambrayɗe nam addəv gəɓa zən aka wəlaŋga məzliwrihe vi məsamgən məmtəm kəlaza mambraya, məsamgən madaram dəza əɗɗa təstəsə. Vi huweɗ nani kərəhaŋ ənzaɗa.

²⁵ Lahəŋka munokum tat va timiŋgiɗ məzeti, ya kakaŋ na kəmilyoŋguk aza məzutaɗa məzuga zeŋgilokum.