1Piyer 1 - Bible en Guidar

Ətoŋ addəvən ( 1:1-2 ) Əsɗa

¹ Piyer, maslən na Yesu Kristu sit ɗiy məs Maŋgəlva aweli, məs dətrayaŋ aket dəlvəŋge, a Pon, Galat, Kappados, Asiya gəm Bitiniya.

² Kəkkpaŋgaŋgək muwelkum vi wən na əŋgla na Maŋgəlva Afəni. Əmpəs nan aɗɗukumuk kəsoŋgən kəɓe'eŋ sənəngən Yesu Kristu vi mbel nan dəskoɓkuməngəni. Mbəlembəle də zazay dənzlər sukum.

Əɗɗumon əkõh na Maŋgəlva sit ɗiyi ( 1:3-12 ) Əga an gegesiŋ

³ Məgəɗ sən soko sən Maŋgəlva, Afən Daya nam Yesu Kristu. Aɗɗak moggon nan azəmə, apsəmək zeŋgile meleketeni, vi asilgən Yesu Kristu səret ɗiy mimtiti. Aknahək makram də əga madarani,

⁴ vi kawrəh zəga nawzəmgəla məs aŋgəna ɓa, argã' ɓa, arduf ɓa, məzaɓan a disiŋ vikum,

⁵ mənokum məs əɓap na Maŋgəlva adawga də ətaf vi əkõh məs dəsan go'o aza ərban zən də pay naggraka.

⁶ Mənneken zukum dəndəni, də kədawɗəkaŋ kakaŋ addəv əsla temtem dayday zlaŋgə.

⁷ Vi ətaf nokum məs məslan dəsan na sləma dayki meleŋge məs dəsan zəga nawray məslan də offoŋ dərahgən əɗikiya, gagdaka gəm sləma pay Yesus Kristu adarban zəni.

⁸ Kəŋglunənka məza kulanən ɓa, kulanən yaŋkəŋ ɓa, kətafnənka. Vini kədannekenən zukum də ənnek metiŋgin na sləma,

⁹ də ərəh zəga məs kətafaŋ vini, ndəni əkõh na zeŋgilokum.

¹⁰ Əkõh vanəski məskəleŋɗe akayanən gabbani, akosonəni, aɗɗaŋ kəleŋ aka wən na mbəlembəle məɗiyən ammbokum.

¹¹ Aziyənək zit aza əkayan na dewɗe awaniɓa pay awani Əmpəs na Kristu dəsan dənɗaŋ adarban sit ta' na Kristu wazəmsahã, dərɓagan na warah gagdakaŋ di.

¹² Maŋgəlva arban sitik na, wənəs sit aneti ɓa, sukumi. Məɗɗaŋ wəza na wənəskəŋ məs kakaŋ mərban sukum də met ɗiy en dəki sukumən Alabara Neneke də gagdak na Zeŋgile Salala məs məslənən sə disiŋ. Maslayɗe dayday aŋglaŋ dəsənnəngən wən vanəŋka.

Əzga aka ənziya salala ( 1:13—2:10 ) Əssa addəv salala

¹³ Vi vaski məzaɓan əɗɗum nokum naɗɗa wəza! Məzi zukum lewlew də əɗi əɗɗum nokum pak aka mbəlembəle məs dədazan sukum pay Yesu Kristu adarban zəni.

¹⁴ Məssoŋ va kirin məprəmaŋ ma, kədazbanən əsim zəga nokum an lahəŋ aka gabba zəga tay kəsənaŋ ɓaŋ ɓa.

¹⁵ Ya, va məs dəyukum asan salala, nokum pak məssoŋ salala addəv ədaw nokum pakə.

¹⁶ Vi məverni na: Məssoŋ salala, vi salala nənani.

¹⁷ Ya an munokum tat iya mətaw wən aka ɗəf va aza wəza nan na əbba, asna mədaw də geslne addəv pay məs kəssoŋ kakaŋkəŋka.

¹⁸ Kəsənənka, də zəga məs nawray yi va təbəz babara awaniɓa meleŋge məmokum səddəv ədaw nokum məs nawtər wərayə ɓa məs kərahaŋ səzet efiŋgiɗikuməŋ ɓa.

¹⁹ Ya də mbel na sləma na Kristu iyi, məs dəssoŋ va na ndargayã məs heslepe tay azan ɓa gəm tay məs dəray azan ɓa.

²⁰ Məs məwelin daabəŋ ki əzəməɗ na dəlva, mərban aza pay na əgrak na dələv vikum.

²¹ Dəzani kətafən Maŋgəlva məs dəsilgən səret ɗiy mimtiti, apsənək gagdaka, vi ətaf nokum də əga nokum dəsangən aka Maŋgəlva.

²² Kubburunək megenegenekum də əɓe' sən gegesiŋ vi kaŋgliw milmiŋgiɗkum məs dətafaŋgə məza muluvuluvu ɓa. Məŋglu zukum də mokrokum bar pay pakə.

²³ Nokum kuwaŋgək meleketekum, məza də zeŋvə məzəŋgəna ɓa, də zeŋve məs aŋgəna ɓa iyi, də əpel madaran na Maŋgəlva dəsan faɗi.

²⁴ Vi tay məverin na: Ɗəf pak va kevile yi, gagdak nan pak tay va uffiyo na kevile, kevile wakələ, uffiyo nan wabətə.

²⁵ Ya əpel na Daya wasan hã faɗə. Əpel vani, ndəni Alabara Nenek məs mənah sukum.