1Milyeŋge 8 - Bible en Guidar

Akoti na wənmiyna məɗiyən addəv Gəla na Maŋgəlva

¹ Vini məlĩ Salomoŋ akkelet ɗiy məsɓet na Israyel, ɗiy gugriɗ na mahəlfaɗe dit migil gəla na Israyel pak azan a Yerusalem, vi kawgəm akoti na wənmiyna na Yawe sə walaŋgəla na Davit, va wənəh na Siyon.

² Zel na Israyel pak kakal əkkalaŋ aza məlĩ Salomoŋ pay na əzləra aka təla na Etanim, təla mabuhuloni.

³ Adan ɗiy məsɓet na Israyel azzoŋ gərakə, məsdəlveŋge hãy əslanən akoti.

⁴ Yas akanən akoti na Yawe gəm gizlirke nalma də Maŋgəlva dit zəgeɗ na matuya naddəvən pakə. Məsdəlveŋge dit mə Leviɗe dəkenini.

⁵ Məlĩ Salomoŋ dit ɗiy na Israyel en dəkkalaŋ azani, aziweŋgik aba akoti, azaɓaŋ-Maŋgəlva dit timeŋgiɗi, gilew gəm wasliɗe diyɗa, kawɓapiy əŋɗet ɓa, ya məsənni əŋɗa net ɓa sən diyɗa neti.

⁶ Məsdəlveŋge mah əkanən akoti na wənmiyna na Yawe a gəlani, addəv tuzoŋ gəla an salala day, ammba persleket kerubaɗe.

⁷ Vi kerubaɗe apparnənək persleket aka təki məɗɗan vi akoti na Yawe, vi kawzeŋ ara akoti dit zleŋɗe nawslan dənɗaŋgə.

⁸ Vi zezek neti, zleŋɗe vet tahəŋ ulaŋ yõ'õ an is tat addəv Gəlamatuya məs dəsan aba gəla məs dəsan salala dayə. Awlaŋ səppaka ɓa hara. Hã dəpaŋ pak tahəŋ adaka.

⁹ Akoti vani, zəga tay addəvən maɓɓan abbər ki kalaɓɗe sula en Moyis azi addəvən a Horeb pay Yawe aziwgin wənmiyna dit ɗiy na Israyel, dərɓaga əgilye net sə Eziptə ɓa.

¹⁰ Adan məsdəlvəŋge agilyoŋ sə təki salala, slaybuwən aknəhək gədəv Gəla na Yawe,

¹¹ məza məsdəlveŋge dəɓap əziweŋ naɗɗa wəza net ɓa sən slaybuna, vi gagdak na Yawe aknəhək Gəla na Yawe.

¹² Yaŋ Salomoŋ anahə: «Yawe aynanək nawsan addəv guzliyo!

¹³ Ya naw nərkə sukuk gəla təki nassa nok faɗə.»

Əpel nawkol ma gəla na Maŋgəlva

¹⁴ Mə Israyelɗe pak tahəŋ məkkelit ziwziwi, məlĩ kpaŋgən haran asoketi

¹⁵ Yaŋ amna: «Soko sən Yawe Maŋgəlva na Israyel! Məs dənah sən afu Davit sən mani, ndən də van dəknahan məs anah na:

¹⁶ “Səza nəgilgit mə Israyelɗe ɗiy naw sə Eziptə, nəwel walaŋgəla-metiŋ sə weleŋgit mahəlfaɗe na Israyel pak narka Gəla ka iya naw dəsangən adak ɓa; Davit nəwel dəsangən aket ɗiy naw na Israyel.”

¹⁷ Ya wən narka Gəla aka iya na Yawe Maŋgəlva na Israyel əɗɗum nan tay a makra Davit afuwa.

¹⁸ Yawe aɓsən afu Davit na: “Adan kəɗɗum a mokrok narkə su Gəla, moggoni kəgəɗ vi tay a mokroko.

¹⁹ Hara kan na, istə narka Gəla van ɓa, wutuk naddəvki yi: ndəni dədarka Gəla van aka iya nawa.”

²⁰ Yawe aknəhək an anahə: nəgəmək gəla afu Davit, nəsawək aka mazaŋga na məlĩ na Israyel va Yawe anahə, nərkak Gəla aka iya na Yawe Maŋgəlva na Israyel,

²¹ Adaki nəzaɓan təki nawɗi akoti məs wənmiyna asan addəvən an Yawe aziwgin dit afiŋgiɗim aka pay agilgit səka dələv na Eziptə.»

Əkkam na Salomoŋ

²² Salomoŋ ziw aba matuya na Yawe, haran sek aket ɗiy na Israyel məkkelti; van a disiŋ legini,

²³ yas amna: Yawe, Maŋgəlva na Israyel, a disiŋ may aka dəlvofuŋ Maŋgəlva tay va is narma wənmiyna də wəɗɗa moggon sit belemɗe nok mədawaŋ abok də mekret taka ɓa.

²⁴ An kiynə sən balam nok Davit afu də moko, kəknəhək də vok va dəpaŋka.

²⁵ Ya kakaŋ na, Yawe Maŋgəlva na Israyel, aɗɗa an kənah sən balam nok Davit afu məs kəpel dawnəh na: Ɗəf nok tay nakkpap dawsan abaw aka mazaŋga na məlĩ na Israyel an tay əganən əssa də wədaw net abaw va kədaw abaw ɓa.

²⁶ Ya kakaŋ na, Maŋgəlva na Israyel, kamə kəta əpel kəpel sən balam nok Davit afuwəŋ dərbə.

²⁷ «Gesiŋ Maŋgəlva waɓap əsan aka dəlvafuŋ sa? Disiŋ, təki an balsən disiŋ pak aɓapaŋ na ətafkun ɓa! Sasak Gəla nərkəŋka.

²⁸ Apak sləmok ammba əkkam də wəppu' na balam noko, Yawe Maŋgəlva nawa, aprəm vaŋvəl də wəkkam na balam nok adakkam abok dəpaŋka!

²⁹ Horok dəsan sekke dəfəɗ də kapay aka Gəlaŋka, təki məs kənah na: “Aŋki iya naw adawsani.” Kaprəm wəkkam an balam nok adakkam a təkiyəŋka!

³⁰ Kəprəmgən wəɓuh ma na balam nok dit ɗiy nok mə Israyelɗe dədakkamaŋ a təkiyəŋka! Nok kəprəmgən sə təki kəsok a disiŋ; kəprəmgəni, kəvvuyon səmgən mambray namə.

³¹ An ɗəf agəɗək mambray aza məlməni, an məssohõni dəswaygəni, an adek aswayək a matuya addəv Gəlaŋka,

³² nok, aprəm sə disiŋ; atawwən net gewleɗ noko, arban məs heslepe na, məs heslepe yi, də əkkpaŋgan mbərayən ka kini; arban ɗəf an man bartata na, bartatay yi, də əgəɗ sən zəga aza bartata nani.

³³ Pay məzuzel na Israyel askanən wəlet vi aɗɗaŋ mambray akoko, an amndoŋguk azoko, aɗiynənək kiyko, akkamokunək də uppu' suk addəv Gəlaŋka,

³⁴ nok, aprəm sə disiŋ, avvuyon mambray net ɗiy nok mə Israyelɗe, amndeget aka dələv məs kəpsit efiŋgiɗti.

³⁵ Pay təki na disiŋ adampa, buwən tay ɓa, vi ɗiy aɗɗaŋgək mambray akoko, an aziyənək heret dəka təkiyəŋ kakkama, an aɗiynənək kiyko, appannək mambray net vi kərbə sitik wili,

³⁶ nok, kəprəm sitgən sə disiŋ, kəvvuyon sitgin mambray net belemɗe noko gəm net ɗiy nok mə Israyelɗe, kərban sitgin tive moggon an adazbaŋgə, kəziygən buwən aka dələv nok məs kəpsit ɗiy nok ka neti.

³⁷ Pay may adaɗɗa, gəbaymərma adazzan, doŋgoyoŋ adampan haya, milif adaɗɗa, sesɓekeɗ dit zarayɗe adazzoŋgu, məzuzelɗe adampanən walaŋgəla-metiŋgin naka dəlva, zev wəray awandi pak, zev gəbaymərma awandi pakə,

³⁸ an ɗəfa awaniɓa ɗiy nok mə Israyelɗe dəwən neti, tay dəttəman tatwãh a makrani ade əppu' zev awandi pakə gəm əkkam zev awandi pakə, atələk van dəka Gəlaŋka,

³⁹ nok kəprəmgən sə disiŋ sə təki kəsoko, avvuyon siti, abbahə, agəɗ sən ɗəf va aza ədaw nani vi kəsənək makrani, vi istə takərguk kəsən mekret ɗiyi.

⁴⁰ Vi ɗiy na Israyel dəgeslne'eŋ sukungən pay ənziya egge net pak aka dələv kipsit efiŋgiɗmə.

⁴¹ Molhõyõ dayday, məza ɗəf naret ɗiy nok na Israyel ɓa zlaŋ, an adek sə guw faraɗa vi iya noko

⁴² vi kaprəmi əpel aka iya nok metiŋgini, gbogboŋ noko gəm na vok mətələn, an azzoŋguk wəkkam addəv Gəlaŋka,

⁴³ nok apak sləmok sə təki kəsok sə disiŋ, agəɗ va an molhõyõ assõh pakə, vi ɗiy naka dələv pak dəsənnəngən iya noko, dəgeslne'eŋ sukungəni va ɗiy nok mə Israyelɗe gəm dəsənəngən na sən iya nok nərka gəlaŋka.

⁴⁴ Pay ɗiy nok adaddoŋ əgay dit məzuzelɗe neti, də təki kəslin pak an akkamanənək Yawe heret dəka walaŋgəla-metiŋgin kəweləŋ gəm dəka Gəla an nərkə sən iya nokuŋka,

⁴⁵ kəprəmgən əkkam net gəm wəppu' net sə disiŋ, kulegin sãhə.

⁴⁶ An aɗɗaŋgək mambray azoko, vi ɗəf tay məza aɗɗa mambray ɓa ɓa, ya an kədək gədəv aketi gap kədeppet avet məzuzelɗe neti, gəm ɗiy dəskanən wəlet aketin aka balam aka dələv net məzuzelɗe net faraɗa awaniɓa go'o pakə,

⁴⁷ an aɗɗumonənək a mekreti aka dələv adassoŋ belemɗe adaka, an aɗiyaŋgək marava, amndoŋguk appu'oŋ sukunək aka dələv net ɗiy dəndenən aka balam, də ənəh na: Məgəɗək mambraya, məgəɗək heslepe, məraygənka na.

⁴⁸ An səka dələv net məzuzelɗe net en dəkenin adaka akkomokunək də mekret taka gəm də megenegenet pak heret sek aka dələv net an kəpsit efiŋgiɗti, heret sek aka walaŋgəla-metiŋ an kəweli, gəm aka Gəla an nərkə aka iya noko,

⁴⁹ aprəm sə disiŋ, sə təki an kəsok adaka, aprəm sit əkkam net də wəppu' neti, kulegin sãhə;

⁵⁰ avvuyon sit mambray net ɗiy nok aɗɗaŋ sukuni gəm əɓoŋ məs aɓoŋgoŋ akoko, kəɗɗagən ɗiy en dərmeninin ka belemɗe, dulanəngən sasẽhti.

⁵¹ Vi ɗiy nok nawray vokuŋ məs kəgilgit sə Eziptə səddəv movoro offo.

⁵² Akol horok aket ɗiy noko, aprəm əppu' na balam nok də əppu' net ɗiy nok na Israyel, kəprəm sitgən pay adawhəmaŋ sukun pakə.

⁵³ Vi istə kəwel səret ɗiy nammba dələv pak ka dəssoŋgən ɗiy noko. Va kənah də ma balam nok Moyis, pay kəgilgit efiŋgiɗim sə Eziptə, aw! Yawe Maŋgəlva.»

Salomoŋ assohũk wəzaɓ na Maŋgəlva

⁵⁴ Səza Salomoŋ agrak əkkam də wəppu' nan aba Yawe, asilik səba gəlamatuya na Yawe a təki agduku, van sulagən təlla a disiŋ.

⁵⁵ Ndən ziw, aprikgin əzaɓ aket ɗiy məkkelit na Israyel pak də wəlan koɓo' koɓo'u, dawnəh na:

⁵⁶ «Soko sən Yawe məs dəpsit təki naffet sit ɗiy nan mə Israyelɗe; wən moggon məs anah sən Moyis balam nan pak tay dəbət afuŋ ɓa.

⁵⁷ Kəta Yawe Maŋgəlva nam dəsan də mənam va asan dit efiŋgiɗmə; adappam ɓa, adazgam ɓa.

⁵⁸ Dəkkpaŋgangən makram kəlazan vi mədawgən aka tive nan təstəsə, mərmagən wəsəɓɗe nani, mahenziŋɗe nan dit tiveɗnanziya nan aɗi wən nan sit efiŋgiɗmə.

⁵⁹ Kəta wən naw nəppu' sən Yawe akanəŋka, dəfəɗ də kapay pak Yawe Maŋgəlva nam dəkə wən ammba balam nan dit ɗiy nan mə Israyelɗe aza wəray net an ɗayɗayə.

⁶⁰ Vi ɗiy nammba dələv gboŋ dəsənəngən na, Yawe, ndəni Maŋgəlva, maɓɓan tay ɓa.

⁶¹ Mokrokum dəsan aka Yawe Maŋgəlva namə, vi kədawaŋgən va mahenziŋɗe nan aŋglaŋgə, karme wəsəɓɗe nan va kədaɗɗaŋ dəpaŋkəŋka.»

Əzaɓ-Maŋgəlva sən Yawe

⁶² Məlĩ dit mə Israyelɗe pak azaɓaŋgək-Maŋgəlva aba Yawe.

⁶³ Salomoŋ ataw sənək wəla zəga sən Yawe nawki zazaya, wasliɗe gabal kaklaw sula kiyit sula, timeŋgiɗ dit gilew zit tahəŋ, gabal səkat də kaklaw sula. Vaski yi, məlĩ dit mə Israyelɗe, akolnən ma Gəla na Yawe.

⁶⁴ Pay dəpas vani yi, məlĩ asapan dadak daŋgla nama Gəla na Yawe, sən Maŋgəlva; vi adaki ada əvəl nawzla kurmbuɗuku, avəl sən də zəga na mabardaw gəm səlhã na əzaɓ-maŋgəlva nawki zazaya, vi matuya na təbəz pepreŋ naba Yawe, məffĩyãktə day naɗɗa əvəl nawzla kurmbuɗuku, əvəl na zəga na mabardaw gəm səlhã nawki zazay akata.

⁶⁵ Aka təla mabuhulonəski, Salomoŋ aɗɗa wəzləra net guɗukɗe sap dit mə Israyelɗe ŋgboŋ diyɗa; azzoŋ sə Lebo-Hamat gap məlpaŋgək na Eziptə. Azləraŋgək lumu taka, gəm lumu taka əmpa, aba Yawe Maŋgəlva, vasna, əvoŋ kəlaw kiyən poɗo yi aɗɗaŋgə.

⁶⁶ Aka pay madodopoɗoni Salomoŋ atəraygit ɗiyi. Asɗanənək məlyã, ambataŋgək a gizlirke anetda, zit paparə, də zit ənneke vi moggon an Yawe agəɗ sən Davit, balam nan dit mə Israyelɗe ɗiy nani.