1Milyeŋge 7 - Bible en Guidar

Wərka gəla na məlyã

¹ Əzva kəlaw kiyən hoku Salomoŋ agəɗ aka ərka gəla nani; agrak gəla kpekpe'i.

² Arka gəla adawyaŋ na: wəleŋɗe ŋgərəɓ na Liban, zezek nan metər kaklaw sle'i, slosloprok nan, metər kaklaw sula kiyən sle'i, gəm əɓay nan metər kəlaw kiyən sle'i. Məɗɗan net dədəkeɗ na gbuŋgburiɗ muguguleɗ wədor poɗo gəm bəlaŋɗe net muguguleɗ mərsleti məzi məziyeɗ aketi.

³ Tay də plafoŋ nawɗemet wəleŋɗe məpɗekit slosloprokɗe naket bəlaŋɗe kaklaw poɗo kiyit sle' məs ədor na taka pak wəleŋɗe kəlaw kiyit sle' sle' neki.

⁴ Aza Gəla vani məppay təki foŋgo foŋgo, wədor hoku hoku, təki foŋgo pak haran sek aka mbərən.

⁵ Təki məppan foŋgo foŋgo nawkol dəkol pak tay də tukzlumun poɗo, təki foŋgo foŋgo vet tahəŋ ədor hoku heret seksek aza ziti.

⁶ Agəɗək təki dit dədəkeɗi, zezek nan metər kaklaw sula kiyən sle'i, slosloprok nan metər kəlaw kiyən sle'i. Gəla nawtoŋ dəddəvən a daŋglay gəm mesepeneɗ amani.

⁷ Arkək gəla nawɗi mazaŋga nawtaw wən adaka məs adawyaŋ na, gəla nawtaw wəna; ndən gəɗe plafoŋ net muguguleɗ na Liban afuŋ də a disiŋ.

⁸ Daŋgla na gəla məs asan addəvən məstakay də gəla məs mazaŋga nawtaw wən asan addəvən ɓa; ərka net hara na məstakayi. Salomoŋ arkək gəla sət wətən Farawən məs akay nak məstaka də gəla nawtoŋ a daŋgla.

⁹ Gəleɗes pak mərket dit gərmeŋge məwelit moggeti; mənterit də slohõ məs man tonyonyo tukzlumit dahã dahã pakə. Məɗɗet təŋ səza gabbani hã gap aza kiyən məvãhni, sə kəlappaka hã gap aza daŋgla metiŋgini.

¹⁰ Nawɗi gabba gəla zəknani: gərmeŋge məwelit gugriɗ na metər sle' sle'i gəm na metər poɗo poɗo.

¹¹ Aka gabba gəla məɗini, gərmeŋge mənterit tahəŋ gəm dədəkeɗ na wəlaŋga ɓəɓəl na Liban.

¹² Tərwəsl ki daŋgla gərmeŋge mənterit tahəŋ zleɓzleɓ wədor hoku gəm wədor net bəlaŋɗe na wəlaŋga ɓəɓəl na Liban taka, daŋgla na gədəv gəla na Yawe də gəla nawtoŋ a daŋgla məstakayi.

Wəzeɗe məppet ava Huram

¹³ Məlĩ Salomoŋ slən a Tir, kawgəm Huram aka wəza,

¹⁴ wətət gagəbay yi, mahəlfa na Neftali, afən ɗəf na Tir yi. Məgəɗ wəza na təbəz pepreŋgi, tay də maɗɗula diyɗa, kiyən tay, məsən wəza na təbəz pepreŋ diyɗa. Ndən pay aza məlĩ Salomoŋ, eɗɗe wəzeɗe nan pakə.

Dədəkeɗ na təbəz pepreŋge

¹⁵ Aɗɗek dədəkeɗ na təbəz pepreŋ sula; əɓay na dədəka taka pak tay metər vaytakə, helege na təbəz pepreŋ metər sləre nawtuwəɗ aka masulani.

¹⁶ Aɗɗek daŋgbargeɗ na təbəz pepreŋ mənweslit sula nawɗup aket dədəket veti. Əɓay na an maddaabəŋ, tay metər sula də mani, əɓay na masulan pak məstakayi.

¹⁷ Agəɗək zəga nawbay gawla maɓɓan sit deŋgbergeɗ naket dədəkeɗ nek dit təbzeŋge pepreŋɗe muhẽti, na daŋgbarga maddaabəŋ buhulu, na masulan buhulu'e.

¹⁸ Agəɗək motondoloŋɗe wədor sula aka helege mətuwəɗən aket deŋgbergeɗ naket dədəkeɗ neki. Vaski aɗɗa aka daŋgbarga maɓɓan naka'e.

¹⁹ Deŋgbergeɗ naket dədəkeɗ na gəla nawtoŋ a daŋgla naka, agilyoŋguk va uffuyo na darŋgbayã, tahəŋ metər sula.

²⁰ Azet deŋgbergeɗ naket dədəkeɗ sula nek də disiŋ bal sit zəgeɗ muhẽt neki, motondoloŋɗe mugulet hontorro səkat sula sula tahəŋ tərwəsl ki daŋgbarga masulani.

²¹ Aziwgitik dədəkeɗ sula nek go'o də gəla nawtoŋ a daŋgla na Gəla na Maŋgəlva; aziwginik dədəka naka dəzəŋ məyan na Yakin, aziwgin an naka zlaɓay, məyan na Bo'az.

²² Dadwar kiyit dədəkeɗ aɗɗaŋgək va darŋgbayã. Vaski wəza net dədəkeɗ agrakə.

Ŋgefleŋ na təbəz pepreŋ

²³ Huram Ahəsək ŋgefleŋ məhurzluŋgo na təbəz pepreŋge; slosloprok na gədəvən agəɗək metir sle'i, əɓay nan agəɗək metir sula də man, tərwəsl nan agəɗək metər kəlaw kiyən sle'.

²⁴ Wəla ŋgefleŋ nak məvereni də zəga va uwa na tassaka na bekne tərwəslə; aza metər taka pak tahəŋ kaklaw sula, məɗɗeti vas ɓəlot ɓəlot sula sulək məhisit məstaka də ŋgefleŋ vani.

²⁵ Məkrəkni yi ŋgefleŋ van aket medgeɗgeɗe kəlaw kiyit sula, məzeɓit də təbəz pepreŋge. Hoku səmmbeti, heret sek kəla disiŋ, hoku mbrit ulaŋ dəmmba pay na moskoyo, hoku meɓɓet heret kəla dohoŋ, hoku əmpa ulaŋ dəmmba pay nampum. Gebbet pak diŋgili, ŋgefleŋ metiŋgin aket kərəkka.

²⁶ Gbigbim nan agəɗək gba slosloprok na va ɗəfa, Məvãni man va əffuyõ na darŋgbayã. Ŋgefleŋ van wataf litər gabal kaklaw dodopoɗo.

Mawteɗ na təbəz pepreŋge

²⁷ Aɗɗak gabban nawkəɗəŋgəl kəlaw də təbəz pepreŋge. Gabban pak zezek nan tay metər sula, slosloprok nan tay metər sula, əɓay nan tay metər taka də mani.

²⁸ Vaŋki məɗi gabbani: Təbzeŋge slepreke slepreke nawɗi gabbani gəm təbzeŋge slepreke slepreke məziwgit aza mani,

²⁹ azet təbzeŋge məziwgit neki, ɓooliɗi, wasliɗe gəm kerubaɗe tahəŋ; vaska'e də disiŋ də kəlafuŋ net ɓooliɗi gəm wasliɗe neki, helegeɗ məɗəmit tahəŋ kiyoh kiyohu.

³⁰ Gabban pak tələn kuɗuŋgul kuɗuŋgul tay poɗo na təbəz pepreŋge, zleŋɗe na təbəz pepreŋ dəziwgitini. Zleŋɗe veti məgulti addəv tələn də ədoɗ nan poɗo. Zəga digil va təlnəŋka, məhəsən məstaka dəndəni, ya dətoŋgoŋ bal sit helegeɗ məɗimit kiyoh kiyoh nek ɓa hara.

³¹ Aka daŋgbarga naka man nakol hurzluŋgo naka, gbigbis na zəga nawɗit ŋgefleŋ tay wəɗak na metər, gədəvən tay ɓa siɗikke səddəv metər. Wəlaŋ zə zəga nawɗi ŋgefleŋ van na hurzluŋgoy ɓa, tukzlumun poɗoyi.

³² Tələn kuɗuŋgul kuɗuŋgul poɗo ammba wəlaŋ zən net təbzeŋge slesleprekɗe məziwgit də zəga narma tilit ammbeti. Əɓay na təlen kuɗuŋgullo pak tay ɓa siɗikke naɗɗa metər;

³³ tələn tay va tilit mawteɗ nawgaya: Kaɗasar na təlni, zaŋtə, mamayən, gəm teter nan pak na təbəz məhəsnəŋgə.

³⁴ Təbzeŋge poɗo va təlen naza ədoɗ poɗo naza gabban neki tahəŋ sler də gabbani.

³⁵ Aza gabbani, zəga nawɗiyən tay va ɗəf ɓa' taka hurzluŋgo akani, aka gabbani, zəgeɗ narman gəm təbzeŋge nan məɗɗet tahəŋ sler dəndəni.

³⁶ Aket pəlayɗe neti, aket zəgeɗ narmani gəm təbzeŋge nan neki, averetik dit kerubaɗe, ɓooliɗi gəm va gogozleɗ piyõ' va batam asani; helegeɗ məɗimit kiyoh kiyoh tahəŋ tərwəslə.

³⁷ Vaski aɗɗa gabban kəlaw pak əhəs net məstaka, əsla net məstaka gəm əzaɓ na zit məstaka.

³⁸ Arkək ŋgefleŋɗe na təbəz pepreŋ kəlawə. Ŋgefleŋ pak wataf məbbere kaklaw poɗo, əɓay na taka tay metər sula. Aka gabban kəlawiŋ pak ŋgefleŋ tay taka taka.

³⁹ Aɗiyik gabban sle' dəka dəzəŋ na Gəla na Maŋgəlva, sle' əmpa dəka zlaɓay nani; Ŋgefleŋ an metiŋgin gidili'e naka, məɗiyən dəka dəzəŋ na Gəla na Maŋgəlva, də dohoŋ nammba pay nampum.

Sap na əŋɗa net zəgeɗ na təbza

⁴⁰ Huram agrakək əzeɓ mesteɓeɗi, ziginɗe nawnda moŋglo may hiliŋgiɗ nakso' zəga. Huram agrakək wəza net zəgeɗ nawgəɗ sən məlĩ Salomoŋ addəv Gəla na Daya pakə:

⁴¹ dədəkeɗ sula dit daŋgbargeɗ aketi, gəm gazwayɗe sula nawsərət aket daŋgbargeɗ naket dədəkeɗ neki,

⁴² weweɗe səkat poɗo, məgulet azet gazwayɗe sula neki, ədor net weweɗe sula aza gazway taka pak kawsərətit aket daŋgbargeɗ nemet dədəkeɗ neki,

⁴³ gabban kəlawə, ŋgefleŋɗe kəlaw məɗiyit aket gebbeti,

⁴⁴ Ŋgefleŋ taka pak medgeɗgeɗe kəlaw kiyit sula ammbani,

⁴⁵ Ŋgefleŋɗe, ziginɗe gəm kasliɗe, naksu' mbeli. Zəgeɗ Huram agəɗ sən məlĩ Salomoŋ addəv Gəla na Yawe pakə, na təbəz pepreŋ məkkẽhtin.

⁴⁶ Aka va na Yurden, awalaŋ Sukot də Sartan, adaki məlĩ ahis zəgeɗ vet addəv vov a dərma.

⁴⁷ Salomoŋ sek əzi zəgeɗis addəv gəla na Maŋgəlva, əŋɗa net diyɗa yi sawɓa, kawɓapi əsla gagdak na təbəz pepreŋ məs məɗɗet ɓa.

⁴⁸ Salomoŋ aɗɗek zəgeɗ naddəv Gəla na Yawe pakə: gəlamatuya na meleŋge, tabəl nawɗi peŋɗe məki əvəl sən Maŋgəlva na meleŋge,

⁴⁹ Zəgeɗ nawɗi lalamɗe aketi, sle' dəka dəzəŋ, sle' meɓɓet dəka zlaɓay, aba gəla an salala day məɗɗet na meleŋge saksakə, uffuyeɗi, lalamɗe dit zindaraɗe pak na meleŋge məɗɗeti,

⁵⁰ Kasliɗe, zindaraɗe, kasliɗe naksu' mbeli, hiŋgiɗ net iŋkile, kasliɗe nawzla tursan, məɗɗet də meleŋge saksakə, zəgeɗ nawbay gawla aka ki maddamba na Gəla an salala day, gəm net maddambeɗe na Gəla na Maŋgəlva pak na meleŋgeŋ.

⁵¹ Adan məlĩ Salomoŋ agrak wəza na Gəla na Yawe dit zəgeɗ naddəvən pakə, akiyik zəgeɗ en Davit, afən apsən Daya: təbəz babara, meleŋge, may zəgeɗ temtemi, aɗi addivit mehẽɗ naddəv Gəla na Yawe.