1Milyeŋge 6 - Bible en Guidar

Wərka Gəla na Maŋgəlva

¹ Wəzva səkat poɗo də makaklaw dodopoɗon dərɓaga əgilye net mə Israyelɗe sə Eziptə, də təla na Ziw, təla masulani addəv əzva mopoɗon na əzəm məlĩ na Salomoŋ aka Israyel, arka Gəla sən Yawe.

² Gəla məs məlĩ Salomoŋ arkə sən Yawe vani, zezek nan metər kaklaw hoku, slosloprok nan metər kəlaw, əɓay nan metər kəlaw kiyən sle'i.

³ Memeŋgle na Gəla na Maŋgəlva vani, zezek nan tay metər kəlawə dakadaka də slosloprok na gəla vani, gədəvən tay metər sle'.

⁴ Məɗɗay təkifoŋgo foŋgo tuzlumit poɗo poɗo aza Gəla na Maŋgəlva van də gazway na təbza.

⁵ Arkək gəleɗe mətawan gidivit ki gəla salala gəm gəla an salala day tərwəslə, gəleɗe vet aslereŋgik də gəla na Maŋgəlva vani.

⁶ Gəla an nammbet afuŋ faɗə, slosloprok nan tay metər sula də meŋgeslni, məddak təkiya, metər hoku, an na disiŋ kiyit pak tay metər hoku də meŋgeslni. Vi Gəla na Maŋgəlva van gbigbis nan na kəlappaka tay məstaka hã gap a disiŋ ɓa, gbigbim nan tay əkkaf aza əɓay na gəla, vi marzeɗ adawtoŋgoŋ addəv dələv na gəla na Maŋgəlva ɓa.

⁷ Mərka Gəla na Maŋgəlva van dit gərmeŋge va məkiyit sə təki əbeslti, vini ɓaɓəlma ndəvəl tay may galama ɓa, təbəz na wəza maɓɓan dayday tay pay adarkanən ɓa.

⁸ Maddamba na gəla məzarŋgasla an naddak təki nak na, dəka dəzəŋ na Gəla na Maŋgəlva yi. Kawpeŋ dəka hara tive yi nawtoŋ addəvən, kawpeŋ sədak əmpa, kawmbat addəv an mahokoni.

⁹ Dərɓaga Salomoŋ arka Gəla, abaymani, aɗɗak plafoŋ dit wəleŋɗe slosloprokɗe ɓəɓəl na Liban.

¹⁰ Gəla məzarŋgasla mərkan a maŋgava Gəla na Maŋgəlva nak na, əɓay nan metər sula də meŋgeslni, bəlaŋɗe na wəlaŋga ɓəɓəl məvoŋgit aka Gəla na Maŋgəlva.

¹¹ Yawe apel sənək Salomoŋ dawnah an:

¹² «Gəla kədarkaŋka! An is tat ədaw aka mahenziŋɗe nawa, an is tat əzban tiveɗnanziya nawa, an is tat ərme wəsəɓɗe nawa, də wəzbet va anahaŋgə, asna wanəzban əpel naw va nənah aka wən nok sən Davit afuko.

¹³ Wanəsaw aweleŋgit mə Israyelɗe, nəppet na ɗiy naw mə Israyelɗe ɓa.»

Əbay gawla sən gədəv Gəla na Maŋgəlva

¹⁴ Salomoŋ agrakək ərka Gəla.

¹⁵ Asərətək zə gəla diŋgil dit muguguleɗ, təŋ səfuŋ hã gap azet bəlaŋɗe a disiŋ, məpekti wəleŋɗe lelewɗe afuŋgu.

¹⁶ Asərətək zə gəla nammba təki an salala day na metər kəlaw dit muguguleɗ, təŋ səfuŋ hã gap disiŋ. Azaɓanək gədəv gəla na Maŋgəlva dit wəleŋɗe minterit slosloprokɗe moggeti təŋ səfuŋ hã gap disiŋ.

¹⁷ Gəla, va ənəh na, Gəla na Maŋgəlva nawmbat ərəh təki salala day, tay metər kaklaw sula.

¹⁸ Wəleŋɗe ɓəɓəlɗe məɗɗet addəv Gəla vani, məkseɗit va kirtin tassaka na bekne gəm va uffuyeɗ məkolti. Dit muguguleɗ məɗɗan pakə, gərəm tay dədawla ɓa.

¹⁹ Arkək tuzoŋ addak Gəla vani, vi kawɗiy akoti na wənmiyna na Yawe adaka.

²⁰ Gəla salala van zezek nan tay metər kəlawə, slosloprok nan metər kəlawə gəm əɓay nan metər kəlawə, akkəɗək də meleŋge saksakə, aba gəla vani yi gəlamatuya asan məsərət zən dit muguguleɗ məkkəɗ sit meleŋge.

²¹ Salomoŋ akkəɗək gədəv Gəla də meleŋge saksakə, alawək məzlzlara net ŋgiyamɗe na meleŋge ama gəla salala məs akkəɗ də meleŋge naka.

²² Akkəɗək Gəla dəwənnan də meleŋge gərakə; akkəɗək gəlamatuya na ma gəla salala də meleŋge.

²³ Ndən gəɗe' kerubaɗe sula addəv Gəla salala nak dit wəleŋɗe na hereme; əɓay net metər sle' sle'i.

²⁴ Persleke keruba taka pak tay: metər sula də meŋgeslni, gəm persleke maɓɓan əmpa: metər sula də meŋgeslni; səza metteɓ ma persleken aŋkəŋ də anda, metər sle'i.

²⁵ Na keruba masulan tay metər sle'i; əsla də əzaɓ net kerubaɗe sulegit pak məstakaŋ.

²⁶ Əɓay na keruba maddaabəŋ, tay metər sle'i; əɓay na masulan pak məstakayi.

²⁷ Addak Gəla nak məɗi kerubaɗe nek kəleŋgili. Kerubaɗe vet, persleket məpparni: keruba maddaabəŋ, persleken tay əne' aza gəla, persleke masulet tam tay əne' aza gəla dahã; persleket sula meɓɓet naddak təki tay əne'eŋ aza ziti.

²⁸ Akkiɗik kerubaɗe vet də meleŋge.

²⁹ Aza zə gəla van pakə, dəppaka gəm dəddəvən tərwəslə, akseɗik kerubaɗe va gogozlo gəm va uffuyeɗ məpokti.

³⁰ Gədəv Gəla van səfuŋ pak məkkəɗni də meleŋge, dəŋgil də dəppaka pakə.

³¹ Aɗɗek maddambeɗe na gəla salala dit wəleŋɗe na hereme nawra; ki maddamba də maŋgavan pak agəɗək təkzlumən sle'i.

³² Aket maddambeɗe sula net wəleŋɗe na hereme nawra nek məkseɗi kerubaɗe gəm va gogozlo dit uffuyeɗ məpokti, akkəɗ sitik meleŋge; aɗɗak meleŋge aket kerubaɗe gəm aka va gogozlo.

³³ Aɗɗak dədəkeɗ net wəleŋɗe na hereme nawra na maddamba na Gəla metiŋgin məs tuzlumun poɗo,

³⁴ maddambeɗe sula məɗɗet dit wəleŋɗe lelewɗe; maddamba pak dit wəleŋɗe məpɗekit sloprok sloprok sula, zəgeɗ məs adakkpaŋ aketi gəm məzlzlaraɗe sula; maddamba masulani dit zəgeɗ məs adakkpaŋ aketi.

³⁵ Məkseɗi kerubaɗe, va gogozlo, gəm uffuyeɗ məpokit akkəɗ meleŋge aketi.

³⁶ Arslanək gədəv daŋgla dit gərmeŋge məslmet də mabəl, wədor hoku gəm muguguleɗ wədor taka.

³⁷ Aka wəzva mapoɗon də təla adawyaŋ na Ziw, məɗi gabba Gəla na Yawe.

³⁸ Aka wəzva makəlaw kiyən taka, aka təla na Bul, təla mododopoɗoni, məgrak ərka Gəla van kpekpe' va aza məziwgin narkani. Wəzva buhul məɗɗa aka ərkani.