1Milyeŋge 5 - Bible en Guidar

Mərkani gəla na Maŋgəlva ( 5:1—8:66 )

¹ Salomoŋ gi məlĩ aket milyeŋge pakə, təŋ səka məlpa metiŋ, aka dələv net mə Filistiɗe, gap aket meŋge na Eziptə. Sən Salomoŋ adawki sənən nzalaka, sən adaɗɗaŋ sənən wəza pay ənziya nan egge pakə.

² Zəgeɗ nawzəm na Salomoŋ na, addəv əsɓəta pak hay miŋgriwin kilo gabal vaytakə, gəpa mətakaɗən kilo gabal kəlaw kiyən dodopoɗo;

³ wasliɗe məzgəlit kəlaw, en məndet sə ma wətaɗa, tahəŋ kaklaw sula, gəm timeŋgiɗ dit gilew səkatə, məŋɗetiŋ muneŋge, budeɗi may metgilew nawra dit gimndeɗ məzgilit ɓa.

⁴ Adan ndəni dəzəm məlĩ aka dələv nammba pay na moskoy kəla ma məlpa na Efrat, sə Tifsa gap a Gaza, aket milyeŋge nammba pay na moskoy na Efrat pakgiti. Zazay tay a walaŋgən dit dilveŋge meggeŋgiɗin pakə.

⁵ Ɗiy na Yuda dit en na Israyel pak assoŋguk addəv zazay pay ənziya na Salomoŋ egge təŋ sə Dan hã gap a Ber-seba, naway pak tay də maɗɗulan ammba megezlembirke nani gəm ammba sokoyo nani.

⁶ Salomoŋ tay dit gəleɗe net mawteɗ net pilseŋge nawgay nan gabal kaklaw poɗo, gəm məpeŋgeŋ pilseŋge gabal kəlaw kiyit sula.

⁷ Deyeɗe na bərzləŋna-kivadələv dədawkiyaŋ əzəm sən məlĩ Salomoŋ dit ɗiy en məzəmaŋ ana məlĩ Salamoŋ da pakə. Ɗəf pak də təla nani, zəga tay adappaŋ dəkkpapgən ɓa.

⁸ Dəwəlsən Haykəmari pepreŋge də marbaza sit pilseŋge nawpeŋge aketi gəm nagdəh mawteɗ nawgaya, ɗəf pak tay əkiyən va mənah sən a təki məlĩ asani.

Salomoŋ adayək kiyit ɗiy pak də maɗɗula

⁹ Maŋgəlva apsənək maɗɗula, də wəsən sən Salomoŋ diyɗa sawɓa, zəgeɗ en kiyən akol aket tahəŋ va hoyoŋko a məlpa.

¹⁰ Maɗɗula Salomoŋ awanək zən day ki maɗɗulet ɗiy nammba pay nampum dit en na Eziptə pakə.

¹¹ Məs maɗɗulani daykiyit ɗiy pakə, day ki Etan mə Ezrah, ki Heman, ki Kalkol, gəm Darda, kirtin Mahol; iya nan agilik aket dəlveŋge na maŋgavan tərwəslə.

¹² Apelik wən məkkpaŋgaɗe gabal hoku, gəm wəŋɗa net gilyeŋge nan aɗɗaŋgək gabal də sle'i.

¹³ Apelik aket wəleŋɗe: Təŋ səka wəlaŋga ɓəɓəl na Liban gap aza isop məzugilyen aka zlava na dəlva; apelik aket zəgeɗ memeyẽɗi, aket biŋgeɗi, vẽvẽɗe, gəm kilfeŋge.

¹⁴ Ɗiy nammba dələv gboŋgu gəm milyeŋge naka dələv beymet en dəprəmən wən na maɗɗula məlĩ Salomoŋ, azzoŋguk kaprəm maɗɗula nanəŋka.

Salomoŋ tay əzaɓan wən narka gəla na Maŋgəlva

¹⁵ Huram, məlĩ na Tir, slən gewleɗ nan aza Salomoŋ, vi aprəmək na, məɗini məlĩ a gəla afəni; Huram van bayna Daviti.

¹⁶ Salomoŋ slən ənah sən Huram na:

¹⁷ «Nok kəsənək na Davit afu dəɓap ərka Gəla aka iya na Yawe Maŋgəlva nan ɓa, vi əlpaɗe dətərwəslnən hã gap Yawe apsən əska wəla aketi.

¹⁸ Kakaŋ kan na, Yawe Maŋgəlva naw, avayək əffet də təki pakə, məzuzele gəm əray tay ɓa.

¹⁹ In tat ənəh na, wanərkə Gəla aka iya na Yawe, Maŋgəlva nawa, va Yawe anah sən afu Davit na: “Wutuk, an nədawɗi aka mazaŋga a gəloko, ndəni narka Gəla aka iya nawa.”

²⁰ Ya kakaŋ aɗi wən nan dəbəlaŋ suwəngən muguguleɗ na Liban, məɗɗaŋ wəza naw wassoŋ dit en noko, wanəfaɗ sit məɗɗaŋ wəza noko, va kədawnəh pakə, kəsənək anamda aŋ na, ɗiy tahəŋ dəsənən əbəl wəleŋɗe va mə Sidonɗe ɓa.»

²¹ Səza Huram aprəm əpel na Salomoŋ ləŋgə, zən annekik diyɗa amna: «Soko yi dəpaŋ sən Yawe məs dəpsən wiyən də maɗɗula sən Davit, ka dəsangən məlĩ aka ɗəf titir gbaŋkəŋka!»

²² Huram slən aza Salomoŋ na: «Nəprəmək an kəslən azawa. Wanipsuk wəleŋɗe lelewɗe dit tayneŋge gərəm pak va kəŋgələ.

²³ Məɗɗaŋ wəza naw waprikgitin sə Liban gap a pehe; naw, wanəpek ama zit aket iŋkile na pehe, gap a təki kədarbə suwa. Adak nədawɗoheti, kəkegini. Nok kəɗɗa sugən əŋgla nawa, kəvaygən zəga nawzəmgən gəla nawa.»

²⁴ Yaŋ Huram, akaysən muguguleɗ dit wəleŋɗe lelewɗe nek sən Salomoŋ va aŋgələ.

²⁵ Salomoŋ tah sən haykəmari sak gabal kaklaw sləre sən Huram ka zəga nawzəm na gəla nani, mẽl na hereme məɗotən moggon litir gabal dodopoɗo. Vas salomoŋ adapsən aza əzva pakə.

²⁶ Yawe apsənək maɗɗula sən Salomoŋ, va anah sən farə: wəsler moggon agəɗək aweleŋgit may Huram də Salomoŋ; aynaŋgək wənmiyna a weleŋti.

Salomoŋ azaɓanək wən na wəza na vavyakə

²⁷ Salomoŋ asilginik wəza na vavyak aket ɗiy na Israyel pakgiti: ɗiy en dədaɗɗanən tahəŋ gap gabal kaklaw hoku.

²⁸ Va təla amə' pak, tay əslənaŋ ɗiy səret aka gərəm na Liban, gabal kəlawə, təla taka, a Liban, təla sula tam anetda. Adoniram yi daya na wəza na vavyak vani.

²⁹ Salomoŋ tay dit məzuslaŋ zəga aket gabal kaklaw buhulu, məbaslaŋ gərmeŋge tam, gabal kaklaw dodopoɗo aka mossorgo na Liban,

³⁰ mbəksa deyeɗe məs deyeɗe na bərzləŋna-kivadələv na Salomoŋ aɗiyaŋ aka wəza, ɗiy gabal hoku də səkat hoku dədadawgitin ɗiy məɗɗaŋ wəza.

³¹ Məlĩ aɗi sit wən nan dəweleŋgən gərmeŋge gugriɗe, gərmeŋge moggeti gəm məslmeti nawɗi gabba Gəla na Maŋgəlva.

³² Məɗɗaŋ wəza na Salomoŋ, na Huram, gəm ɗiy na Gebal, ezeɓetinik wəleŋɗe dit gərmeŋge narka Gəla na Maŋgəlva.