1Milyeŋge 3 - Bible en Guidar

Əzəm məlĩ na Salomoŋ ( 3:1—11:43 ) Əzvaɗe en dətəŋgaŋgə 3:1—4:20 Salomoŋ akayək wətən Farawən

¹ Salomoŋ akkpaŋgək dəhən Farawən, məlĩ na Eziptə; ndən gəm wətən Farawən, mah əkiyət a walaŋgəla-metiŋgin na Davit, hã gap pay agrak ərka gəla nani, Gəla na Yawe, də zlava tərwəsl ki Yerusalem.

² Ɗiy addivit gəleɗe-nettuyeŋge adawzaɓaŋ-Maŋgəlva kaka'ə, vi hã gap pay dəpas mərkay Gəla aka iya na Yawe ɓa.

³ Salomoŋ aŋgluwək Yawe, adawək aka tive nan va Davit afən aɗi sən wən nani, addivit gəleɗe-nettuyeŋge adawzaɓ-Maŋgəlva gəm əzla tursan kaka'ə.

Salomoŋ assõhũk maɗɗula nawzəm məlĩ ava Maŋgəlva

⁴ Məlĩ mbat a Gabawən kawzaɓ-Maŋgəlva adaka, vi adaki təki nawzaɓ-Maŋgəlva metiŋgini, Salomoŋ adək əvəl nawzla kurmbuɗuk aka matuya van dit zəgeɗ memeyẽɗ gabal.

⁵ A Gabawən Yawe arban zən aza Salomoŋ, də dəfəɗ addəv issine; Maŋgəlva aɓsən na: «Assõhũ! Miy kəŋgəl nəpsukgən di?»

⁶ Salomoŋ amna: «Kəgəɗ sənək moggon metiŋgin sən gawla nok Davit, əbba, vi adawək abok gesiŋ gesiŋgi, təstəsə, makran taka də isi, kərban sənək moggon nok metiŋginiŋka, kəpsənək wiyən dəsan aka mazaŋga na məlĩ nan va dəpaŋka.

⁷ Ya kakaŋ na, Yawe Maŋgəlva nawa, istə kəɗi gawla nok aka məlĩ a gəla Davit afuwa, ya naw muzliya nan ɗarə, nəsən va nədaɗɗa ɓa.

⁸ Gawla nok tay aweleŋgit ɗiy nok məs kəweli, ɗiy nok diyɗaŋ, kawɓapi əŋɗet ɓa, vi əday neti.

⁹ Apsən maɗɗula naprəm sən gawla noko, vi kawtawwən net ɗiy noko, kawgo'on moggon də mbərayni; vi naway nawɓap wətawwən net ɗiy nok diyɗeŋ di?»

¹⁰ Zəga an Salomoŋ assohũs lewi amahara Yawe.

¹¹ Maŋgəlva aɓsən na: «Adan kəssohõn zəga əska, kəssõh əssa egge zek ɓa, kəssõh arya sən kiyuk ɓa, kəssõh əmta net məzuzelɗe nok ɓa, maɗɗula nawtaw wən təstəs kəssõhũ,

¹² Wanəɗɗa suk va əpel noko: wanəpsuk maɗɗula ɗeŋŋge, ɗəf tay dəsan daabəŋ kiyuk ɓa, tay nazzan va is dərɓogok ɓa.

¹³ An məs kəttokon ɓa zlaŋ, wanəpsuko; arya də gagdaka, pay nanziya nok egge pakə, kawrəhi məlĩ aka dələv va is ɓa.

¹⁴ An is tat əzban tive nawa, də wərma mahenziŋɗe nawa, dit wəsəɓɗe naw va na afuk Davit, wanəzzeken ənziya nok egge.»

¹⁵ Salomoŋ fəɗahə; vaski issine nani. Ambatək a Yerusalem, ndən ziw aba akoti na wənmiyna na Yawe. Ndən de' əvəl nawzla kurmbuɗuk gəm azaɓ-Maŋgəlva na zazaya, ndən de' waynabaya sit gewleɗ nan pakə.

Salomoŋ tay ətawwən də maɗɗula

¹⁶ Yaŋ gil məpolkoyeɗ sula azzoŋ əziw aba məlyã.

¹⁷ Guluk taka təmna: «Kamə daya nawa, aprəm suwa; in dət guluk kəŋkə addəv gəla taka mənani, nəwə na tatə.

¹⁸ Əvoŋ hoku dərɓaga nəwə, ndət tam boku. Mənam tat matakə, malaka tay azam eŋgil adak ɓa; abbərki mənam suleŋ addəv gəla van ɓa.

¹⁹ Wətət ɗakkəŋ zam də dəfɗa, vi təkəɗəŋgələk akani.

²⁰ Ndət le' teteŋgit sini, ndət wətu səlɓew hembit əslani, balamək nok tat məleŋta, ɗufgən a bata; wətət məmtən nak ɗufgən abawa.

²¹ In le' də pummo kawwaɗgən na, gas ərəhən məmtəni. Təki dadaŋ na, in səŋglək səŋgləkgəni, wətu an nəwi yi ɓa.»

²² Ɗak maɓɓat nak təmna: «Owwo! Wətuwiy madarani, wətukiy dəmtə»; akən maddaabəŋ nak təmsak əgəm əpel na: «Owwo! Wətukiy dəmtə, nawi madarani.» Vas apeleŋ aba məlyã.

²³ Məlĩ amna: «Akəŋ təmna: “Wətuwi yi madarani, wətuki yi dəmtə;” akəŋ əmpa na: Owwo! “Wətukiy məmtən, nawi madarani.”»

²⁴ Məlĩ amna: «Məki su masalam!» Məkiyi masalam sən məlyã.

²⁵ Yaŋ məlĩ amna: «Mərslan wiyən madaranəŋ sek sula, məpsit pəɗak nan sət akəŋkə, pəɗak maɓɓan sət akənə.»

²⁶ Guluk ma muzliya madaran tənah sən məlĩ na: «Vi tulak sasãh wətəta, təmna: Kamə, daya nawa! Məpsət mepriŋge madaranəŋka, kəbayən ɓa!» Maɓɓatkəŋ təmna: «Kərəh na ɓa, nərəh na ɓa, mərslani!»

²⁷ Yaŋ məlĩ azlani, amna: «Məpsət muzliya madaranəŋ sət ɗak maddaabəŋ, kəbaynən ɓa; ndəttə mani.»

²⁸ Mə Israyelɗe dəwənnet aprəmənək va məlĩ ataw wəna, ageslne'eŋ sənənək məlyã, awlanənək na, maɗɗula na Maŋgəlva yi addəvən nawtaw wəna.