1Milyeŋge 22 - Bible en GuidarAkab tay əkay əmõh Ramot ( 2AL 18:1-3 ) 1 Wəzva hoku dəgəɗə, Aram də Israyel assoŋ məza əgay a weleŋgit ɓa. 2 Aka wəzva, mahokoni, yaŋ Yosafat məlĩ na Yuda ade ula Akab məlĩ na Israyel. 3 Məlĩ na Israyel, aɓsit gewleɗ nan na: «Kəsənənək na, walaŋgəla-metiŋ na Ramot aka va na Galad əŋ namiyi lahəŋka, yaŋ mədaɗɗa gərət gərət dəmnda wətafən səva məlĩ na Aram sa?» 4 Yaŋ aɓsən Yosafat na: «Wakəl də in a təki əgay a Ramot naka va na Galad əŋ sa?» Yosafat azlan sən məlĩ na Israyel na: «Ina istə, ɗiy nawa nokəŋgə, pilseŋge nawa nokəŋgə.» Məskəleŋɗe məkayaŋ əzəm tay əɗɗaŋ kəleŋ na wahhar ammba məlyã 5 Yaŋ Yosafat aɓsən məlĩ na Israyel əmpa na: «Kamə, assohõn Yawe tagay.» 6 Məlĩ na Israyel akkelet məskəleŋɗe waɗɗaŋ səkat poɗo, aɓsit na: «Nəmbat əgay də Ramot na Galad sa, awaniɓa nəbewi?» Aɓɗaŋ na: «Doko! Yawe wapsuk avoko məlyã.» 7 Yosafat amna: «Məskəleŋ na Yawe maɓɓan tay aŋ məssohõngən Yawe səman əmpa ɓa sa?» 8 Məlĩ na Israyel aɓsən Yosafat na: «Ɗəf maɓɓan taye'e nassohõn Yawe aman kəta, ya naw in tat əzel wən nani, vi aɗɗa kəleŋ akaw moggon ɓa abbər mbərayən ɓa. Mika wətən Yimla yi.» Yosafat amna: «Məlĩ anah vas ɓa!» 9 Yaŋ məlĩ na Israyel ayə daya net məzəlpaŋ taka, amna: Dok əkayan Mika wətən Yimla gu'u! 10 Məlĩ na Israyel də Yosafat məlĩ na Yuda, tahəŋ gurom gurom aket mazaŋgeɗ na məlĩ dit lukutɗe na məlĩ azet a memeŋgle na Samari, məskəleŋɗe pakgit, tay əɗɗaŋ kəleŋ abeti. 11 Ɗəf tay adawyaŋ na, Sedekiya, wətən Kena'ana, avotuk gozloreɗ na təbza, amna: «An Yawe, anah yaŋka: “Dit gozloreɗiŋ kədawsleŋgit mə Aramɗe hã gərakə!”» 12 Məskəleŋɗe pakgit kəleŋ net məstakayi, aɓɗaŋ na: «Dok a Ramot na Galad, wahhar ammboko, Yawe wapsuk ammba voko məlyã.» Məskəleŋ Mika agəɗək kəleŋ na ɗiy wanzoŋ səma əgaya ( 2AL 18:12-27 ) 13 Maslən dəmbat iya Mika nak aɓsən na: «Awle, əpel net məskəleŋɗe yaŋka met taka yi adawpeleŋ moggon aka məlyã. Kamə əpel nok dəsan va taka nereti, kəpelgən moggoni!» 14 Mika amna: «Va Yawe asan madarani, an Yawe adawnah suwa, anan nədawpele!» 15 Ndən pay aba məlyã, məlĩ aɓsən na: «Mika, məmbat əgay a Ramot na Galad sa, məbewi?» Aɓsən na: «Doko, wahhar ammboko! Yawe wapsuk avoko məlyã!» 16 Məlĩ aɓsən na: «Təl gbaŋgbari nədaswayguk kənah sugən wən gegesiŋ də iya na Yawe di?» 17 Mika, amna: «Nulak Israyel dəwənnan aket gərmeŋge təray təray va timeŋgiɗ dit gilew ɗəf tay məzuteɗit ɓa; Yawe, amna: Ɗiyiŋ daya net tay əmpa ɓa. Ɗəf pak dəgəm tive nan dəl ananda zayə!» 18 Məlĩ na Israyel aɓsən Yosafat na: «Nənoh suk ɓa! Nan aɗɗa kəleŋ moggon akaw məza an mbərayni ɓa ɓa!» 19 Amna: «Aprəm əpel na Yawe dərəŋgə. Nulak Yawe tay ɗewwe aka mazaŋga nan dit məzəlpaŋ na disiŋ ziwziw a maŋgavani, dəka dəzəŋ gəm dəka zlaɓay. 20 Yawe amna: “Naway nawmbəɗaŋ Akab, vi dəlgən dəskotgən a Ramot na Galad di?” Naway pak əki an nan temtemi. 21 Yaŋ əmpəs agil aziw aba Yawe, amna: “Naw wanəmbəɗani.” Yawe aɓsən na: “Mbarmbar di?” 22 Amna: “Wanəgil kpaŋ ka əmpəs na uwawən a met məskəleŋɗe nan pakgiti.” Yaŋ amna: “Wakəmbəɗani; agili, wakəɓap əɗɗani. Dok aɗɗa vaska.” 23 Ya kakaŋ Yawe aguluk əmpəs na uwawən a met məskəleŋɗe nokiŋ pakə, Yawe apelik wən nawray akoko.» 24 Sedekiya, wətən Kena'ana zar azani, du' ərga Mika aka tapaslayni, amna: «Dəŋga əmpəs na Yawe agil səzaw kan nawpel suk di?» 25 Mika amna: «Ha'aw! Wakula, pay kədaddok egziŋ ãhã kulo' ãhã kulo' əɗama.» 26 Məlĩ na Israyel amna: «Agəm Mika, aka sən Ammon daya na walaŋgəla-metiŋ gəm aza Yo'as, wətən məlyã, 27 kənahgən na: “An məlĩ anah yaŋka: Məgul ɗəfəŋ a fərsəna, kədapsənən wəzəm diyɗa ɓa, iŋkile diyɗa ɓa, hã gap pay nədazzaw zeŋgleŋge.”» 28 Mika, amna: «An gesiŋ kəmilik zeŋgleŋge, asna Yawe dəpel su ɓa.» Sissiŋ amna: «Ɗiy məprəm pakə!» Əmta na Akab 29 Məlĩ na Israyel də Yosafat, məlĩ na Yuda addoŋguk ama wəgay a Ramot na Galad. 30 Məlĩ na Israyel, aɓsən Yosafat na: «Wanəkkpaŋgan zu nətoŋgən əgaya. Nok agul lukut na məlĩ noko.» Məlĩ na Israyel akkpaŋganək zəni, ndən toŋ a təki nawgaya. 31 Məlĩ na Aram aɗi sit wən nan sit deyeɗe nalpa net mawteɗ nawgay nan kaklaw hoku kiyit suleŋ amna: «Kədawbayaŋ muzliya ɓa, də ɗəf metiŋ ɓa, abbər ki məlĩ na Israyel ɓa.» 32 Adan deyeɗe net mawteɗ nawgay awlanən Yosafat, aɓɗaŋ na: «Sessel, məlĩ na Israyel yi», aziynənək heret akan kawgay dəndəni; Yosafat vaŋvəla. 33 Adan deyeɗe net mawteɗ nawgay nek awlanən na, məlĩ na Israyeli ɓa, ndəɗaŋ buryok səmmbani. 34 Yaŋ ɗəf ahõn har aka makapal ɗarə, har ambat əteh aka məlĩ na Israyel a walaŋ əsler na lukut na təbəz nawgaya. Məlĩ aɓsən ɗəf məzuka mawta nawgay nan na: «Akkpaŋgan wawar net pilseŋge, agilgu səma wəgaya, vaŋvi aɗiyək azawa.» 35 Pay dəpas, wəgay aɗəmka, məlĩ tay ziwwe addəv mawta nawgay nan abet məzəlpaŋ na Aram; yaŋ amtə də moskoyo. Mbel na gəla vaŋvi aymaŋgək addəv mawta nawgaya. 36 Pay gimbil gimbil na, vaŋvəl aŋgəzlək a dibirgidik na: «Naway pak dəl a walaŋgəla-metiŋ nani, gəm aka dələv nani!» 37 Yaŋ məlĩ amtə, məki kigəbayən a samari, andəknən a Samari. 38 Səza məskoɓ mawta nawgay a bobok na Samari, kirɗe atarne'ninik mbel na Akab, gil məpolkoyeɗ aslslayaŋgək va əpel na Yawe anahə. 39 Medembirgit wəzeɗe na Akab, də an agəɗə, gəla arkə na slay bekne gəm waleŋgəleɗe gugriɗ arkə pak məvertiŋ addəv ɗerewel na Wəza ɗayɗay net milyeŋge na Israyel ɓa sa? 40 Akab amtəka azbetik efiŋgiɗni. Akaziya wətəni dəgəm məlĩ a gəlani. Yosafat na Yuda gəm Akaziya na Israyel ( 22:41-54 ) Yosafat, məlĩ na Yuda ( 2AL 20:31—21:1 ) 41 Yosafat, wətən Asa asan məlĩ na Yuda na, aka əzva na Akab mapoɗon aka əzəm məlĩ a Israyeli yi. 42 Yosafat, tay də wəzva kaklaw hoku kiyən sle' aka agəm məlyã, azəmək məlĩ a Yerusalem, wəzva kaklaw sula kiyən sle'i. Iya nat man na, Azuba wətən Silhi. 43 Adawək aka tive na Asa afən dekdeki, dəkoro koroh sa səka tive ɓa, təstəs adaɗɗa ama hara Yawe. 44 Də as pak na, gəleɗe-nettuyeŋge dəzan kakãh ɓa'e: ɗiy tay əzbanən əzaɓ-Maŋgəlva, wəzlaŋ tursan addivit gəleɗe-nettuyeŋge. 45 Yosafat aslerik də məlĩ na Israyel. 46 Medembirgit wəzeɗe na Yosafat, wəzeɗe gagdakɗe en agəɗə, wəgayɗe en agayə, məvertiŋ addəv ɗerewel na Wəza ɗayɗay net milyeŋge na Yuda ɓa sa? 47 Akkporik zel məɗɗaŋ polkoyo də zit a matuya səka dələv nan pakə, en dəppaŋ aka pay na Asa afəni. 48 Məlĩ tay məɗiyən a Edom ɓa, abbər ki daya na bərzləŋ-nakivadələv məlĩ na Yuda aɗi ɓa. 49 Yosafat, azaɓək bəlayɗe gugriɗ na Tarsis, vi kawmbat ədawkay meleŋge a Ofir; dəɓap əddan ɓa, vi bəlayɗe vet akrapaŋgək a Esiyon-Geber. 50 Yaŋ Akaziya, wətən Akab, anah sən Yosafat na: «Məɗɗaŋ wəza naw dəddoŋgən dit en nok dit bəlayɗe!» Ya Yosafat dətaf ɓa. 51 Yosafat zamə, azbetik efiŋgiɗni, məndəkən azet efiŋgiɗin a walaŋgəla-metiŋ na Davit. Yoram wətəni, dəgəm məlĩ a gəlani. Akaziya, məlĩ na Israyel 52 Akaziya, wətən Akab kpaŋ məlĩ aka Israyel a Samari, aka əzva makəlaw kiyən buhul na Yosafat aka əzəm məlĩ a Yuda. Wəzva sula azəm məlĩ aka Israyel. 53 Agəɗək mbərayən diyɗa ama hara Yawe, azbanək təl afəni, tələt mani, gəm təl Yerobo'am wətən Nebat, məs dətoŋgit mə Israyelɗe əɗɗa mambraya. 54 Agəɗ sənək wəza sən Ba'al, appu'uk abani, yaŋ adan sən gədəv Yawe, Maŋgəlva na Israyel, səɗek va afən agəɗə. |
All right reserved
Bible Society of Cameroon