1Milyeŋge 21 - Bible en Guidar

Guli na megezlembirke na Nabot

¹ An dəgəɗ dərɓeget zəgeɗis yeŋki. Nabot na Yizrel, tay də guli net megezlembirkeɗi, a maŋgava gəla na Akab, məlĩ na Samari.

² Akab anah sən Nabot, amna: «Apsu guli net megezlembirkeɗ nokuŋka, nəzləkgən zəgeɗ məs meɗmeɗ adaka, vi go'o yi də gəla nawa; nəpsukgən guli net megezlembirkeɗ moggon day ki aŋka. An wakətafa, nəpsuk koɓeɗ akan va dədawsla aza əlbəh nani.»

³ Nabot aɓsən Akab na: «Henziŋgi azaw aba Yawe nəgəmgən zəga net migilu kapsuko.»

⁴ Akab mbat eŋgil ananda, zən baybay, gədəvən mədan aka wəpel na Nabot na Yizrel apel sən na: «Nəpsuk na guli net efiŋgiɗu ɓaŋka.» Ndən aka zəga nafna nan ɗufu, haran kpaŋgəni, məza nam way ɓa.

⁵ Guluk nan Izabel pay azani, təɓsən na: «Vimi gəduvuk adə kəzəm way ɓaŋ di?»

⁶ Aɓsət na: «Vi nəpel sənək Nabot na Yizrel, nəɓsən na: “Apsu guli net megezlembirkeɗ nokuŋ nəlbaha, an mok aka guli maɓɓani, wanəpsuk na megezlembirke a gəlani.” Yaŋ amna: “Nəpsuk na guli na megezlembirke naw ɓa.”»

⁷ Guluk nan Izabel təɓsən na: «Istə məlĩ aka Israyel! Asil azəm waya, mokrok dəvoŋgu; intə nədapsuk guli na megezlembirke na Nabot na Yizrel!»

⁸ Ndət ɗerewelɗe verver aka iya na Akab, təɗi vat aket də ndama nan tusso; təslin ɗerewelɗe nek aket ɗiy naba məlyã, ɗiy məsɓet na walaŋgəla-metiŋ nani, məs dəssoŋ a təki taka də Nabot.

⁹ Təver addəvit ɗerewelɗe, təmna: «Mətəl ma naɗɗa meme, məɗi Nabot aka wədor net ɗiy en daabəŋ.

¹⁰ Məɗi məklopoɗe sula abani, dənahaŋgən akan na: “Kəranək Maŋgəlva, gəm məlyã.” Məgilgini, məska dit gərmeŋge, dəmtəgəni!»

¹¹ Zel na walaŋgəla-metiŋ nani, ɗiy məsɓet dit en gugriɗ naba məlĩ en na walaŋgəla-metiŋ nani, aɗɗanənək va Izabel təslən azeti, va təver addəvit ɗerewelɗe təslən siti.

¹² Atəlaŋgək ma naɗɗa meme, yaŋ aɗiynən Nabot aka wədor maddaabəŋ net ɗiy,

¹³ Məklopoɗe sula nek payaŋ gurom abani. Məklopoɗe nek atəŋgən uwawən aka Nabot abet ɗiy naka, aɓɗaŋ na: «Nabot aranək Maŋgəlva gəm məlyã.» Ndəɗaŋ vitgin sə walaŋgəla-metiŋ, askanən dit gərmeŋge, ndən zamə.

¹⁴ Yaŋ aslənaŋ sət Izabel dawnəh na: «Məskani Nabot, amtəka.»

¹⁵ Adan Izabel təprəm na məskani Nabot, amtəka, təɓsən Akab na: «Asil agəm guli net megezlembirkeɗ na Nabot na Yizrel, məs aɓoŋ dawvəl suk naka, vi Nabot tay madaran ɓa, amtəka.»

¹⁶ Adan Akab aprəm na Nabot amtəka, ndən le' tek a guli net megezlembirkeɗ na Nabot na Yizrel nak vi kawgəmən ka nani.

Maŋgəlva dənan nek də ədaw na Akab gəm an nat Izabel ɓa

¹⁷ Əpel na Yawe ade sən məskəleŋ Eliya na Tisbe dawnəh na:

¹⁸ «Asil aprik kələmsəngən Akab, məlĩ na Israyel a Samari. Tay addəv guli net megezlembirkeɗ na Nabot, vi kawgəmən ka nani.

¹⁹ Kənah səngəni, is na: An Yawe anah yaŋka: Adan kəbay ɗəfa, wəɗɗum nok guli nan dəsangən ka nok sa? Kənah səngən dawnəh na: An Yawe anah yaŋka: A təki kirɗe aterne'nin mbel na Nabot iŋki, adak kirɗe adawterne'nin mbel nok tamə.»

²⁰ Akab aɓsən Eliya na: «Mbara kərəhwək sa məzuzel nawa!» Ha'aw: «Nərəhkuko, adan kəvəl kiyuk də wəɗɗa zəga mbərayən ama hara Yawe,

²¹ wanəki wəray akoko; wanəfaɗuk palkatə, wanəzet zel nana Akab da kakãh sə Israyel, balamə də ɗəf an dəsan na kiyən pakə.

²² Wanekkpaŋgan gəla nok va na Yerobo'am, wətən Nebat, gəm va gəla na Ba'esa, wətən Ahiyya, aka wən na mambray kəgəɗəŋka gəm vi kətoŋgit mə Israyelɗe əɗɗa mambraya.»

²³ Gəm Yawe apelək aka wən nat Izabel na: «Kirɗe wampərtən Izabel aba zlava na Yizrel.

²⁴ Ɗəf neŋgil ana Akab da dədamta a walaŋgəla-metiŋgin pak kirɗe dədampirnini; an dədamta awra pak biŋgeɗ na disiŋ dədawzəməni.»

²⁵ Mərəhi ɗah ɗəf va Akab, dəppan zən sən mambray ama hara Yawe va nan ɓa, vi guluk nan Izabel təreɗe.

²⁶ Agəɗək zəga daryaw diyɗa sawɓa, də əzbet tuyeŋge va net mə Amorɗe məs Yawe arɓehet səbet mə Israyelɗe.

Akab atafək mambray nani

²⁷ Səza Akab aprəm wənəska, aŋgeretik lukutɗe nani, ndən kulo' lukut na sakə, ndən giɗe' meme, ndən ɗuf də sak, ndən ədaw tele' tele'.

²⁸ Əpel na Yawe, ade sənək Eliya na Tisbe, dawnəh na:

²⁹ «Kulak va Akab ataf mambray nan abaw sa? Adan avoŋgən kiyən abawa, nəki na wəray aka pay nan ɓa; aka pay na wətəni nədawki wəray aka gəla nani.»