1Milyeŋge 20 - Bible en GuidarMəlĩ Akab na Israyel ( 20:1—22:40 ) Məlĩ na Aram tay əsərŋgəsl Samari 1 Ben-Hadad, məlĩ na Aram kakelgit məzəlpaŋ nan pakə: milyeŋge kaklaw hoku kiyit sula tahəŋ dəndən gəm pilseŋge dit mawteɗ nalpa. Ndən mbat asərŋgəsl Samari, awaksəni. 2 Yaŋ aslən maslənɗe aza Akab məlĩ na Israyel, a walaŋgəla-metiŋ, 3 aɓsən na: «An Ben-Hadad anah yaŋka: Təbəz babar də meleŋge nok pak nawəŋgə; gil nok dit kirtuk lelewɗe pak nawəŋgə.» 4 Məlĩ na Israyel azlan sən na: «Va əpel noko, aw daya məlĩ nawa; nok nan dit zəgeɗ naw pakə.» 5 Maslənɗe amndoŋgu, aɓɗaŋ na: «An Ben-Hadad anah yaŋka: Nəslən sukuk na: Təbəz babar noko, də meleŋge noko, gil nok dit kirtuk pak kipsiwgini. 6 Sessel mazayən va kakaŋkəs na, wanəslin gewleɗ naw azoko, vi kawtoɓoron gəla noko, də en net məɗɗaŋ wəza nok pakə. En mogget arok pak wandenini.» 7 Məlĩ na Israyel dah iye ɗiy məsɓet naka dələv nan pakə, amna: «Kamə haya mula va ɗəfəŋ adawkayan su mbərayni! Aslinik ɗiy azaw ammbet gil naw dit kirtuwa, may təbəz babar də meleŋge naw pak nəɓoŋ sən ɓa.» 8 Ɗiy məsɓet dit ɗiy pak aɓɗaŋ na: «Kəprəmwən nan ɓa, kədawtafən ɓa!» 9 Aɓsit maslənɗe na Ben-Hadad na: «Mənah sən daya məlĩ naw na: An məs kəslən gawla nok na maddaabənəŋ na, wanəɗɗa kəta, ya kakaŋ na, əpeləs na nəɓap na əɗɗan ɓa.» Maslənɗe addoŋ aka sənənək əpel vani. 10 Ben-Hadad slən azani, yaŋ amna: «Meŋgilveɗ dəɗɗaŋ suwən an naɗɗa pakə, an burɗuk na Samari waknəh vet məzəlpaŋ naw ɗapɗapə!» 11 Məlĩ na Israyel azlani, amna: «Mənah sən na: Miynə maslapa nagzen awkaɓ va məzupələn ɓa!» 12 Də wəprəm əpeləska, tay əsa dit milyeŋge meɓɓet addəvit guɗukɗe, aɓsit gewleɗ nan na: «məzzəŋgə!» Azzəŋgaŋgək ki walaŋgəla-metiŋ kawwak səni. Əska wəla na məlĩ Akab 13 Yaŋ məskəleŋ maɓɓan azar go'o aza Akab məlĩ na Israyel, amna: «An Yawe anah yaŋka: Kulak vandayəŋ ɓa sa? Wanəpsuk avok dəpaŋka, wakəsən na, intə Yawe.» 14 Akab amna: «Də va nawa, kədepsiw di? Yaŋ amna: “An Yawe anah yaŋka: Də vet gewleɗ mətektek net deyeɗe nakki vaɗe.”» Yaŋ amna: «Naway nawtəŋ əgay di?» Amna: «Istə!» 15 Ndən toŋ əŋɗet məzəlpaŋ en deyeɗe andaŋ səket ki vaɗe neki: tahəŋ səkat sula də kaklaw hoku kiyit sula. Dərɓegeti, ndən toŋ əŋɗet ɗiy pakə, məzəlpaŋ na Israyel pak tahəŋ zel gabal buhulu. 16 Də tataŋ pay atəŋgən əgaya, Ben-Hadad tay əsa kiyən viwwe addəvit guɗukɗe, ndəni gəm milyeŋge kaklaw hoku kiyit sula naskaŋ sənən neki. 17 Gewleɗ məzəlpaŋ net deyeɗe naket ki vaɗe dəwak sitin daabəŋ; Ben-Hadad slən ula an dədawtoŋgo, məprəman sən na: «Ɗiy agulyoŋguk sə Samari.» 18 Amna: «An ammba zazay azzoŋgu, mərme madareti, an sən əgay yi azzoŋgu, mərme madareti!» 19 En dəgilyoŋ sə walaŋgəleŋki, gewleɗ net deyeɗe naket ki vaɗe andeŋ nekiŋ, məzəlpaŋ tahəŋ əzbetini. 20 Naway pak əbay məzuzel nani. Mə Aramɗe ɓakə, mə Israyelɗe gebbet gəmə. Ben-Hadad, məlĩ na Aram, kõh də pələs dit məŋkoroŋ pilseŋge meɓɓeti. 21 Sissiŋ məlĩ na Israyel viti, abey məpeŋgeŋ pilseŋge dit mawteɗ nawgaya; arbə sən Aram hã tay va nawpel wən nan ɓa. 22 Məskəleŋ zar go'o aza məlĩ na Israyel, aɓsən na: «Asok zuk dok abe abe, aɗɗumon an kədaɗɗa hara, vi dukki na, məlĩ na Aram wasil akoko.» Əska wəla na Akab masulani 23 Məɗɗaŋ wəza na məlĩ na Aram, aɓsənən na: «Maŋgəlva netiŋ, Maŋgəlva naket gərmeŋge yi: Vini yi, mə Israyelɗe askanən wəlamə. Ɗaɗah mədam əgay dənɗaŋ a təki pəliyya, sessel waməska wəleti. 24 Yaŋ an kədaɗɗa: azergit milyeŋgeŋ pak sə gəleti, kəɗigin guvernerɗe a gəleti. 25 Is sən kiyuk andə məzəlpaŋ meɓɓet diyɗa, daykiyit en məbeytiŋki, vaski an dəwəl sit pilseŋge dit mawteɗ nawgay dəssoŋ daykiyit lahəŋka, vasna waməgay dənɗaŋ a təki məpəlayya, sessel waməska wəleti.» Yaŋ aprəm meti, aɗɗa vaska. 26 Vasna, dukki nan na, Ben-Hadad aŋɗetik məzəlpaŋ na Aram, ndən tek a Afek, vi kawgay də Israyel. 27 Məŋɗeti məzəlpaŋ na Israyel, məpsiti zəgeɗ nalpa, ndəɗaŋ mbat kalmaŋgə. Mə Israyelɗe aziynənək dibirgidik net abeti, ŋgbəra' va widik net gilew gəlet sula, mə Aramɗe, net tahəŋ dələv kənəhə. 28 Ɗəf na Maŋgəlva zar go'o, aɓsən məlĩ na Israyel na: «Vaŋ Yawe anahə: Adan mə Aramɗe anahaŋ na: Yawe Maŋgəlva naket gərmeŋge yi, na təki məpəlayya yi ɓa, va wəday net adayaŋgəŋ pak wanipsuk ammba voko, vasna wakəsənnən na, intə Yawe.» 29 Ndəɗaŋ dibirgidik net heret aza zit seksek əziynin gap əvoŋ buhulu. Aka pay mabuhulon na, wəlpa agapka, mə Israyelɗe abayaŋgək məpeŋgeŋ pilseŋge net mə Aramɗe, gabal səkat aka pay taka kaka'ə. 30 En dəmbraŋ ɓak ənzoŋ a Afeki. Yaŋ zlava na walaŋgəla nak aɓəzl aket en mederet dəmbraŋ gabal kaklaw sula kiyən buhulu. Ben-Hadad sən kiyən ɓak ənzan a walaŋgəla-metiŋ, adawɗam addəvit giziŋɗe, kulo' ahã, kulo' ahã'ə. Akab dəbay məlĩ na Aram ɓa 31 Gewleɗ nan aɓsənən na: «Məprəmək na milyeŋge na Israyel, milyeŋge mulaŋ sasãhəŋgə. Məgul səm lukut na sakə, məvãh səm aka kiymə, məlgən ələmsən məlĩ na Israyel. Kuzuŋ wappok modorok soko.» 32 Aynanənək sak agzeti, avãnən helege aka kiyti, ndəɗaŋ pay aza məlĩ na Israyel, aɓɗaŋ na: «Balam nok, Ben-Hadad amna: Kamə, kədawbayu ɓa.» Akab, amna: «Mbara tay madarani'e sa? Məlmuwi yi!» 33 Zel nek agəmnən wən nan va walə, zit gəgəm ətaf wən nani, aɓɗaŋ na: «Ben-Hadad məlmuki mbara!» Amna: «Məddoŋ məkiya.» Ben-Hadad vit azani, Akab peŋgin aka mawta nani. 34 Ben-Hadad aɓsən na: «Walaŋgəleɗe gugriɗ en afu amõh səva afukiŋ wanəmndegeti; kəɗigən zəgeɗ nawvəl nok a Damas, va afu aɗi a Samari lahəŋka.» Də wənmiynas nədappok əmbata, yaŋ aynə wənmiyna dəndəni, appan ambatə. Maŋgəlva atawək wən naddak na Akab 35 Ɗəf taka səret məyakaŋ kəleŋ anah sən galan də an Yawe apel na: «Kamə, arguwa!» Yaŋ ɗəf nak aɓoŋ dərgani. 36 Yaŋ aɓsən na: «Adan kəprəm ma Yawe ɓa, səza kədawzar səzaw aŋka, ɓoolu wabayko.» Adan abit səzani, ndən tek gas ərəh ɓoolu, ɓoolu bay əbayni. 37 Ndən gas ɗəf maɓɓani, yaŋ amna: «Kamə, arguwa!» Ɗəf nak du' ərgani, ta' sən vaŋviya. 38 Məskəleŋ nak tek ziw aba məlĩ aka tive, ndən kpaŋgən zən də gabaga aka haran sərətə. 39 Pay məlĩ adawtoŋgo, yaŋ aŋgəsl vaŋvəl sən məlyã, amna: «Gawla vit addəv əgaya, ɗəf agil sə weleŋgit ɗiy mədorit məzugayaŋgə, aki su ɗefa, amna: “Aga su ɗəfəŋka! An akõhko, asna zeŋgiloki a gəla zeŋgileni, awaniɓa wakəfaɗ təbəz babar gabal hoku.” 40 Ya awle, adan gawla nok tay təwəltəwələ, yaŋ ɗəf nak anzani!» Məlĩ na Israyel aɓsən na: «Vaski is kətawwən nan sən kiyko.» 41 Məskəleŋ nak tor zəga səka haran də kakara, məlĩ na Israyel asənək na, taka səret məskəleŋɗe yi. 42 Məskəleŋ nak anah sən na: «Yawe amna: Adan kəppan ɗəf an məs nətawwən namta akan nəpsuk avok ndən teki, vasna zeŋgiloki a gəla zeŋgileni, ɗiy nok a gəlet ɗiy nani.» 43 Məlĩ na Israyel mbat a Samari eŋgil ananda, zən baybay, gədəvən mədani. |
All right reserved
Bible Society of Cameroon