1Milyeŋge 2 - Bible en GuidarDavit amanək man bayma faɗə 1 Pay namta na Davit gapə, aɗi wən nan sən Salomoŋ wətən dawnəh na: 2 «Naw wanəmbat va ɗiy naka dələv adaddoŋ pakə; asɓu zuko, asok va ɗəfa! 3 Kərmagən an Yawe Maŋgəlva nok aɗi naɗɗa, adaw aka tive nani, arme mahenziŋɗe nani, wəsəɓɗe nani, ətawwən nani, gəm miziweɗe nani, va məverit addəv mahenziŋ na Moyis. Vasna, wakərəh gabba zəga an kəŋgəl naɗɗa də an kədaɗɗum akan pakə; 4 Vi Yawe dəknəhgən əpel nan an anah su dawnəh na: “An kirtuk tahəŋ əganən ədaw neti, tahəŋ ədawaŋ abaw təstəs də mekret taka, də zlem zit pakə, uwa nok tay nakkpap dəssa aka mazaŋga na məlĩ na Israyel ɓa.” 5 Is pak kəsənək va Yo'ab wətət Seruya agəɗ suwa, agəɗ sit deyeɗe net məzəlpaŋ na Israyel suleŋki, sən Abner wətən Ner, gəm sən Amasa wətən Yeter: abeyike, aggbo'ik mbel məza pay nawgay yi ɓa; vaski attəpet mbel nawgay aza maslapa negzen dit hensekɗe naka təlni. 6 Kəziygən zuko, kədappan əpriken a təki net mimtit də magalagala ɓa hara. 7 Agəɗ moggon sit kirtin Barzillay na Galad hara, dəssoŋgən aret məzuzəmaŋ anokda, vi net aɗɗaŋ suwənək moggon pay nədanzaw sən mulmuk Absalom. 8 Simey, wətən Gera, mə Benyamin na Bahurim, arawək nassa tuɗok tuɗok pay nedawmbat a Mahanayim; yas aprik ələm su ama məlpa na Yurden, nəsway sənək də iya na Yawe dawnəh na: “Nəbayuk na də masalam ɓa.” 9 Ya kakaŋ na, kədawɗiyən ka bartata ɓa, ɗəf məs maɗɗulok kənani; wakəsən va kədawgəɗ səni: kətoŋgəngən wəgal nanəs addəvit mbel a təki nanziya net mimtiti.» Davit amtəka, Salomoŋ agəmək gəlani 10 Davit amtəka, məndəkni a walaŋgəla-metiŋ na Daviti. 11 Davit azəmək məlĩ aka Israyel, əzva kaklaw poɗo: əzva buhul azəm məlĩ a Hebron, kaklaw hoku kiyən hoku a Yerusalem. 12 Salomoŋ asanək aka mazaŋga na Davit, afəni, məlĩ nan tay əgagdak diyɗa. Salomoŋ asanək məlyã ( 2:13-46 ) Salomoŋ abayək Adoniya 13 Adoniya, wətət mə Hagit ade azat Batseba, ma Salomoŋ. Təɓsən na: «Aka zay yi kəde sa?» Amna: «Zay yi». 14 Yaŋ amna: «Wən naw tay nawnoh suko». Təɓsən na: «Apele!» 15 Amna: «Kəsənək na, məlĩ nawi kəta, mə Israyelɗe pak akaw aziynən heret ka nəsawgən məlyã. Yaŋ məlĩ akkpaŋ səkaw sən məlmuwa; də wəŋgla na Yawe yi arəha. 16 Kakaŋ na, maw aka əssohõk wən taka; kədawɓoŋ su ɓa.» Təɓsən na: «Apele!» 17 Aɓsət na: «Kamə, anah sən məlĩ Salomoŋ na, adakkpaŋgan haran səkok ɓa, dəpsuwət Abisag, mə Sunemək ka gulku.» 18 Batseba təmna: «Lewi yi! Wanəpel sən wən nok sən məlĩ vani.» 19 Batseba, toŋ aza məlĩ Salomoŋ, kawnah sən wən na Adoniya. Məlĩ le' ələm səta, ndən guduk a bata; ndən həmsak ɗew aka mazaŋga a gəlani, aɗi mazaŋga maɓɓan dəka dəzəŋ nan sət mani; ndət ɗew akani. 20 Təmna: «Maw aka əssohõk siɗikke; kədawɓoŋ su ɓa.» Məlĩ anah sət na: «Assohũ əmma! Nəɓoŋ suk na ɓa.» 21 Yaŋ təmna: «Kəta napsənti Abisag mə Sunemək sən məlmuk Adoniya ka gulku.» 22 Məlĩ Salomoŋ azlan sət man na: «Vimi kədassohõt Abisag mə Sunemək sən Adoniya lah di? Ɗaɗah assohõn sən məlĩ dərəŋ, adan ndəni məlmu an daya! Səni, sən məsdələv Abiyatar gəm sən Yo'ab wətət Seruya!» 23 Məlĩ Salomoŋ səway də Yawe, dawnəh na: «Maŋgəlva dəgəɗ su an naɗɗa! Kawzan kini Adoniya apel wənəska! 24 Kakaŋ na, Yawe an məs dəɗiyu gək aka mazaŋga na afu Davit madarani, dətoŋgu addəv gabba məlĩ va apeli, dəpaŋ dəpaŋ Adoniya adamta.» 25 Məlĩ Salomoŋ slən Benaya, wətən Yoyada; ndən bay əbayən zamə. Salomoŋ arɓahanək Abiyatar sə Yerusalem 26 Na məsdələv Abiyatar, məlĩ anah sən na: «Dok a Anatot, aka guli noko, vi namta kənani; ya dəpaŋ na nəbayuk na ɓa, vi kəslanək akoti na Yawe Maŋgəlva, aba afu Davit gəm kəzəmək sahã də əbba va azəm sahãŋ pakə.» 27 Salomoŋ arɓahanək Abiyatar səka wəza na məsdələv na Yawe, vi an Yawe anah aka gəla na Eliya, a Silo dəgəɗgəni. Salomoŋ tay əbay Yo'ab 28 Wən nan agapək Yo'ab vi Yo'ab azbanək Adoniya, dəzban Absalom ɓa. Ambatək əɗam addəv Gizlirke na Yawe, ndən kãw ərma mohõ gəlamatuya. 29 Mənah sən məlĩ Salomoŋ na: «Yo'ab alək əɗam addəv gizlirke na Yawe; tay a maŋgava gəlamatuya.» Salomoŋ slən Benaya, wətən Yoyada, də wənah sən na: «Dok abaya!» 30 Benaya tek a gizlirke na Yawe, anah sən na: «Məlĩ amna, agili.» Yaŋ amna: «Owwo! Aŋki nədamta.» Benaya amndan sən məlĩ dawnəh na: yaŋ an Yo'ab apeli, vas azlan suwa. 31 Yaŋ məlĩ aɓsən na: «Aɗɗa va anah suko; abaya, kəndəkgəni. Mbel en Yo'ab azi ɗariŋ dəkkpaŋgaŋgən səkawa gəm səka gəla na əbba. 32 Yawe wakkpeŋget mbel nan akani, ndən məs dəbey ɗiy sula təstəs gəm mogget day kiyən, abey də masalam məza afu Davit əsənən ɓa: Abner, wətən Ner, daya net məzəlpaŋ na Israyel gəm Amasa wətən Yeter, daya net məzəlpaŋ na Yuda. 33 Mbel net dəssoŋ aka Yo'ab də mazlalwã nan hã faɗə! Ya na Davit də mazlalwãn gəm gəla nan də mazaŋga na məlĩ nani, zazay səza Yawe wassan sit hã faɗə.» 34 Benaya, wətən Yoyada, peŋ tek bay əbayni; məndəkni eŋgil ananda, a kapta-muyã. 35 Məlĩ aɗiyək Benaya, wətən Yoyada, aket məzəlpaŋ a gəlani; ndən ta' Sadok ka məsdələv a gəla Abiyatar. Salomoŋ atoruk Simey səzani 36 Məlĩ slən iya Simey, aɓsən na: «Arkə gəla nok a Yerusalem; a walaŋgəla-metiŋ kəsokgən aŋka, kəzar na səŋ piɗik piɗik ɓa. 37 Pay kəgil kəggar kiyət lolohõk na Kedron, asən akok na, əmta kədamta; mbel nok wamndoŋ akoko.» 38 Simey aɓsən məlĩ na: «As əpel moggoni yi. Va kənahə daya naw məlyã, vas balam nok adaɗɗani.» Simey ɗew əzva diyɗa a Yerusalem. 39 Ama əzva hoku na, sula səret belemɗe na Simey ɓak ənzoŋ ana Akis məlĩ na Gat wətən Ma'aka da; mənah səni Simey na: «Belemɗe nok tahəŋ a Gat». 40 Simey le', mazaŋga na koro nan deŋgi, ndən tek a Gat ana Akis da, kamndet belemɗe nani. Simey, mbat aki belemɗe nan sə Gat. 41 Mənah səni Salomoŋ na, Simey ambatək sə Yerusalem a Gat, amilik adeke. 42 Məlĩ slən iya Simey, aɓsən na: «Nəswayguk də Yawe ɓa sa? Nənoh suk dafsən na: “Pay kəgil sə walaŋgəla-metiŋ kawmbat a təki maɓɓani, asən akok na, əmta kədamta ɓa sa?” Kənah su na, əpelis moggoni nəprəməka. 43 Ya vimi kəzban əsway kəsway də Yawe əŋ gəm wəsəɓ nəɗi suk wən nanəŋ ɓa di? 44 Yaŋ məlĩ aɓsən Simey na: Kəsənək də mokrok va mbərayən kəgəɗ sən Davit əbba əŋka; Yawe wakkpaŋgan mbərayən nok akoko. 45 Ya məlĩ Salomoŋ wazaɓə, mazaŋga na məlĩ na Davit wasan gək aba Yawe hã faɗə.» 46 Məlĩ anah sən Benaya, wətən Yoyada; ndən vit, aka Simey hõs, bay əbayən zamə. Vaski məlĩ na Salomoŋ asɓan zən a vani. |
All right reserved
Bible Society of Cameroon