1Milyeŋge 19 - Bible en Guidar

Eliya tay ənzan sət Izabel

¹ Akab aboton sətək Izabel, an Eliya agəɗ kpekpe'i, də an abey məskəleŋɗe pak də masalam.

² Izabel slən maslən aza Eliya dawnəh na: «meŋgilveɗ dəɗɗaŋ suwən an naɗɗa pakə, an mazayən va kakaŋkəŋ nəgəɗ də zeŋgilok va kəgəɗ də zeŋgile na taka neretəŋ ɓa!»

³ Adan awla vaska, ndən le' tek kawkõhgən zeŋgileni; pay a Ber-Seba, aka va na Yuda, ndən mbəgən gawla nani.

⁴ Ndən mbat a kapta-muyã hurruɓ aka wədawa. Səza agapə, ndən tek ɗew ammba mewrewre tuɓollo. Assõh əmta, amna: «Mək Kakaŋka Yawe, agəm zeŋgilewa, moggow nan daykiyit efiŋgiɗu ɓa.»

⁵ Ndən ɗuf leŋ ammba mewrewre tuɓollo. Maslay pay rəŋgəni, aɓsən na: «Asil azəmə!»

⁶ Ndən təm na, peŋ-məslepreke mədan aket gərmeŋge duroɓduroɓu gəm bəbər net iŋkile tahəŋ disiŋ kini; ndən nam namə, ndən iŋkile rəhə, ndən həmndak ɗufu.

⁷ Maslay na Yawe, həmndak masulani, rəŋgəni amna: «Asil azəmə, vi tive zeki diyɗa aboko.»

⁸ Ndən le' nam namə, iŋkile rəhə, ndən teki, də gbogboŋ na əzəməska agəɗək əsɓəta kaklaw poɗo, əvoŋ kaklaw poɗo, aka wədawa, hã gap aka gərəm na Maŋgəlva a Horeb.

Maŋgəlva amndak əɓɓəlan Eliya

⁹ Ndən pay toŋ a bətəŋ adaka, ndən kim adaka. Əpel na Yawe yaŋ azani, aɓsən na: «Miy nok aŋ di Eliya?»

¹⁰ Yaŋ amna: «Əŋglu nəŋglu Yawe Maŋgəlva net məzəlpaŋ na disiŋ: vi mə Israyelɗe azganənək wənmiyna noko, aɓzluwinik matuyaɗe noko, gəm abeyinik məskəleŋɗe nok də masalam, in takərgu nəpələ, naw van zlaŋ met aka əzan zeŋgilewa.»

¹¹ Yaŋ amna: «Agil aziw aka gərəm aba Yawe; Yawe yaŋka watoŋgu.» Barkataŋ metiŋgin mbiwmbiw aɓletik gərmeŋge, awiɗihik milɓeɗ aba Yawe; Yawe tay addəv barkataŋgəs ɓa. Sədərɓaga barkataŋ, əɓla na dəlva, Yawe tay addəv əɓla na dələv ɓa.

¹² Dərɓaga əɓla na dəlva, offo dəde, Yawe tay addəv offos ɓa. Dərɓaga offo, səmyã ferre.

¹³ Adan Eliya aprəma, ndən lukut nan sərət aka harani; ndən vit ziw a ma bətəŋ. Wəla ɗəf yaŋ apel sənəka: «Miy nok aŋ di Eliya?»

¹⁴ Yaŋ amna: «Əŋglu nəŋglu Yawe Maŋgəlva net məzəlpaŋ na disiŋ: vi mə Israyelɗe azganənək wənmiyna noko, aɓzluwinik matuyaɗe noko, gəm abeyinik məskəleŋɗe nok də masalam, in takərgu nəpələ, naw van zlaŋ met aka əzan zeŋgilewa.»

¹⁵ Yawe aɓsən na: «Amndok dəka tive nok nawmbat kəla kapta-muyã na Damasə. An kəgapəka, Kəpeslgən mẽl aka Hazayel, ka məlĩ aka Aram.

¹⁶ Gəm Kəpeslgən mẽl aka Yehu, wətən Nimsi, ka məlĩ na Israyel; Kəpeslgən Elisa wətən Safat na Abel-Mehola, ka məskəleŋ a gəloko.

¹⁷ Ɗəf an dəlkõh səma masalam na Hazayel, Yehu wabaya, ɗəf dəlkõh səma masalam na Yehu pak Elisa wabaya,

¹⁸ nəpələk ɗiy a Israyel gabal buhul məs agagdakanən Ba'al ɓa, məza dəfyokonən ɓa.»

Eliya aɗiyək Elisa a gəlani

¹⁹ Ndən tek sədaka, gas ərəh Elisa wətən Safat, tay inse dit wasliɗe mətəpit dit bardawɗe kəlaw kiyit sula abani, məkəlaw kiyit sula yi avan sən kini. Eliya toŋ də maŋgavani, ndən firik əzgan lukut nan akani.

²⁰ Ndən mbəgit wasliɗe neki, ndən ɓak ammba Eliya, amna: «Maw aka əsɗet may əbba dət əmma, nəzbokgəni.» Eliya aɓsən na: «Doko kədegəni! Zəga tay nəssohõk sa?»

²¹ Elisa buryok səmmbani, hãs ənde wasliɗe ŋgba' sula, wəlet taw a matuya, də wəlaŋga nawlet wasliɗe sula nek ada slu naka, apsit ɗiy azəmaŋgə. Ndən le' azban Eliya, asanək aka wəza nani.