1Milyeŋge 18 - Bible en Guidar

Eliya, wanəh wəgrak na koloy

¹ Əvoŋɗe diyɗa atoŋgoŋko, yaŋ əpel na Yawe ade sən Eliya, aka əzva mahokon na koloy dawnəh na: «Doko, arban zuk aza Akab; wanəzi buwən aka dəlva.»

² Eliya mbat ərban zən aza Akab. May agəɗək vakvak a Samari.

³ Akab dah iya Obadiya, daya naka gəla na məlyã. Mbara Obadiya, məgeslne' sən Yawe diyɗa yi.

⁴ Gala pay Izabel təbey məskəleŋɗe na Yawe na, Obadiya hãs məskəleŋɗe səkat tek haɗam kaklaw sle' sle' addəv bətəŋ pakə, ndən əkəsit peŋ adak dit iŋkile.

⁵ Akab aɓsən Obadiya na: «Dok əbbalan dəlva, də təki met iŋkile assoŋ gəm dit lolohẽɗ pakə. Kuzuŋ wamərah marbaza, napsit pilseŋge dit koropilseŋge, vasna, zəgeɗ memeyẽɗ nam wappaŋ səməni, waməbey zəgeɗ memeyẽɗ nam gərak ɓa.»

⁶ Ndəɗaŋ wəɗakgənən dələv nabbalani. Akab mbat dəka tive nan takərgəni, Obadiya tam mbat dəka tive maɓɓan takərgəni.

⁷ Adan Obadiya agəm tive, Eliya yaŋ əzzan kawləm səni. Obadiya asənəka; ndən kiyən tək afuŋ, amna: «Istə akəŋ sa daya naw Eliya?»

⁸ Aɓsən na: «Intə! Dok ənah sən daya nok na: Eliya yaŋka!»

⁹ Yaŋ amna: «Mambray miy nəgəɗ gbas hara kapsən balam nok ava Akab dəbayugən di?

¹⁰ Va Yawe Maŋgəlva nok asan madarani, dələv də ki va na məlĩ tay məza daya naw dəslən əkoyok ɓa ɓa; an anahaŋgək na: “Ɗəf vas tay aŋ ɓa,” ndən əswaygən kiyva məlĩ vani, may dələv van na məruhki ɓa.

¹¹ Yaŋ kakaŋ kənah sugən na: “Dok ənah sən daya nok na: Eliya yaŋka'ə!”

¹² Ya in əzar səzok aŋ na, Əmpəs na Yawe wagəmuk kawkuk a təki məs nəsən ɓa; in kan kadawnah sən Akab, ya aruhuk na ɓa, asna wabaywa. Gawla nok na, tay əgeslne' sən Yawe far səka gawlani.

¹³ Mənoh suki wən naw an nəgəɗ, gala Izabel tədawbey məskəleŋɗe na Daya əŋ ɓa sa? Nəɗametik səret məskəleŋɗe na Daya ɗiy səkatə, addəv bətəŋ pak ɗiy kaklaw sle' sle'i, nəpsitik peŋ dit iŋkile.

¹⁴ Yaŋ kakaŋ kəmna: “Dok ənah sən daya nok na: Eliya yaŋka'ə!” Ya wabaywa!»

¹⁵ Eliya amna: «Va Yawe Məzuɓappak na disiŋ məs nədawziw abani asan madarani, dəpaŋ kpak wanərban zu azani.»

Eliya arbanək zən aza Akab

¹⁶ Obadiya tek ələmsən Akab, aprəman səni; Akab tek ələmsən Eliya.

¹⁷ Adan Akab awla Eliya, aɓsen na: «Is məki wəray aka Israyeləŋ tə sa?»

¹⁸ Yaŋ amna: «Intə nəki wəray aka Israyel dərəŋ ɓa, istə də gəla na afuko, vi kəppanən wəsəɓ na Yawe, kəzbet Ba'alɗe.

¹⁹ Ya kakaŋ na, akkelet su ɗiy na Israyel azaw dəwənnet aka gərəm na Karmel, dit məskəleŋɗe na Ba'al səkat də kaklaw sle' gəm məskəleŋɗe na Astera səkat poɗo məzuzəmaŋ dət Izabel iŋki.»

Eliya dit məskəleŋɗe na Ba'al a Karmel

²⁰ Akab slən əye mə Israyelɗe beymeti gəm akkelet məskəleŋɗe aka gərəm na Karmel.

²¹ Eliya zar azet ɗiy dəwənnet go'o, yaŋ amna: «Hã dewe kədappanən ndosndos nokuməŋ di? An Yawe yi Maŋgəlva, məzban anani, ya an Ba'ali yi, məzbani!» Ɗəf tay dəzlan sən wən taka ɓa.

²² Eliya aɓsit ɗiy na: «Intə nəpəl məskəleŋ na Yawe matakərgu kaka'ə, məskəleŋɗe na Ba'al tahəŋ səkat poɗo də kaklaw sle'i.

²³ Dəpsəmən medgeɗgeɗe sula: dəweleŋgən medgeɗge net taka, dəpuwenəngəni, dəpakəngən aket sesemeɗi, məza əɗi sən offo ɓa hara, naw pak nəɗɗagən medgeɗge taka, nəpakgən aket sesemeɗi, nəɗiysən na offo ɓa.

²⁴ Kəkkamaŋgən də iya na maŋgəlva nokum, naw tam, nəkkamgən də iya na Yawe. Maŋgəlva an dəzlan də offo, ndəni yi, Maŋgəlva.» Ɗiy pak azlanən na: «Əpeləs moggoni yi.»

²⁵ Eliya anah sit məskəleŋɗe na Ba'al na: «Məwel medgeɗge nokum, mətəŋ daabəŋ kiywa, vi dik kənanən daykiywa; məkkaman maŋgəlva nokum, kədawɗi sənən offo ɓa hara.»

²⁶ Ndəɗaŋ gəm medgeɗge an məpsiti, ndəɗaŋ piwpiwgəni, akkamaŋ də iya na Ba'al, təŋ dəmpummo, hã tataŋ paya, də wənəhaŋ na: «Ba'al, azlan səmə!» Ɓaɓəlma tay ɓa, ɗəf tay dəzlan sit ɓa'a. Askəlaŋgək a matuya məɗɗaŋ naka.

²⁷ Tataŋ pay gəɗe'i, Eliya amas aketi, amna: «Məŋgəzl vaŋvəl dayadaya! Adan maŋgəlva yi na: gəgərəŋɗe nan tahəŋ diyɗa, may tay eŋgil ɓa, may tay aka tive soko; mbərən ɓa na, aleŋgik soko, dəfɗahgəni.»

²⁸ Aŋzlaŋgək vaŋvəl koɓo' koɓo'u, antaranənək zit va assərəkaŋ dit masalam gəm dit tulhõŋɗe, zit pak mbel biyoho.

²⁹ Adan tataŋ pay atoŋgu, maɗɗulet zlazlaɓ, hã pay nawzaɓ-Maŋgəlva gapə. Dəprəmənən wəla ɗəf ɓa, ɗəf tay dəzlan sit ɓa, zəga tay dərbə ɓa.

³⁰ Eliya aɓsit ɗiy dəwənnet na: «Məzar azaw aŋ go'o!» Ɗiy dəwənnet zarzar go'o azani. Yaŋ azaɓan matuya na Yawe, məɓzluwən naka:

³¹ Eliya hãs gərmeŋge kəlaw kiyit sula, va əŋɗa na mahəlfa net kirtin Yakob, an məs əpel na Yawe ade azan dawnəh na: «Iya nok Israyel adawsan naka.»

³² Eliya arkanək matuya aka iya na Yawe dit gərmeŋge neki, siske na, aso' təki sulək ki matuya mərkan nak dədawɓap wətaf gagiyeɗ net iŋkile sula,

³³ azaɓetik sesemeɗi, apiwenək medgeɗge naka, ndən pak pak əpakən aket sesemeɗ neki.

³⁴ Yaŋ amna: «Məknih hinziŋgiɗ net iŋkile poɗo, məzlif aka slu nawzla kurmbuɗuku gəm aket sesemeɗi!» Yaŋ amna: «Məɗɗa masulani.» Ndəɗaŋ gəɗe' masulani; amna: Mahokoni! Ndəɗaŋ gəɗe' mahokoni.

³⁵ Iŋkile zlalbay sulək ki matuya, vovəŋ aknahək dit iŋkile.

³⁶ Adan Pay nawvəl agapə, məskəleŋ Eliya azarək go'o, amna: «Yawe Maŋgəlva na Abraham, na Isak gəm na Israyel, aɗɗa, dəsənkungən dəpaŋ na, istə Maŋgəlva a Israyel, gəm intə məgəɗ wəza noko, dəka əpel noki yi, nəɗɗe zəgeɗiŋ pakə.

³⁷ Azlan suwa Yawe, azlan suwa: ɗiyiŋ dəsənnəngən na, istə, Yawe Maŋgəlva, istə kədawki mekret ɗiy nok azoko.»

³⁸ Offo na Yawe abətka, ahhətək sluwa, sesemeɗi, gərmeŋge neki, burɗuku, gəm akorɓetik iŋkile sə vov neki.

³⁹ Adan ɗiy awlanən vaska, naway pak kiyən tək afuŋgu, aɓɗaŋ na: «Yawe yi, Maŋgəlva! Yawe yi Maŋgəlva!»

⁴⁰ Eliya aɓsit na: «Mərme məskəleŋɗe na Ba'al! Təttaka, dayday adawkõh ɓa!» Mərmetiŋgə. Eliya akek a lolohõ na Kison, ataw wəlet adaka.

Buwən amilke

⁴¹ Eliya, anah sən Akab na: «Apeŋgi, azəmə, asə! Vi in tat əprəm əhãy na maŋgalaw wuuwa.»

⁴² Akab apeŋgik kawzəma, gəm kawsa, Eliya nan apeŋ a dadwar ki Karmel, agdukuk afuŋ, haran awalaŋ tələn kulo'u.

⁴³ Aɓsən gawla nan na: «Apeŋ kamə, awəl kəla pehe!» Apeŋke, ndən haran seki, amna: «Zəga tay ɓa.» Eliya anah sən na: «Amndoko, amndoko», təl buhulu!

⁴⁴ Mabuhulon kan na, gawla nan nak amna: «Slaybuwnaŋgək yakəŋ, təsil səka pehe, təɗappa gba va ɗəfa.» Eliya azlan səni: «Dok ənah sən Akab na: Diynan mawta net pilseŋge nan gu'u, maŋgalaw adawtokuk ɓa.»

⁴⁵ Təki a disiŋ attirik ndiɗim ndiɗim sən slaybuwən də səmyã, maŋgalaw atəŋgək əmet iŋkile. Akab peŋ aka mawta net pilseŋge nani, ndən mbat a Yizrel.

⁴⁶ Yawe aɗiyək van aka Eliya aynanək maslapa nagzen kawmbat a Yizrel, anzanək aba Akab, hã gap nawtoŋ a Yizrel.