1Milyeŋge 17 - Bible en Guidar

Məskəleŋ Eliya ( 17:1—19:21 ) Məskəleŋ Eliya tay ərban wən na koloy

¹ Eliya, mə Tisbe naret ɗiy na Galad aɓsən Akab na: «Va Yawe Maŋgəlva na Israyel məs nədawziw abanəŋ asan madarani, in tat ənaha: Wəzvaɗe dədazzoŋ iŋki, minɗe aziyaŋ na ɓa, buwən azi na ɓa'a, an in nənah ɓa ɓa.»

Eliya ama lolohõ na Kerit

² Əpel na Yawe adek sənək dawnəh na:

³ «Dok səŋka, aɗi horok kəlammba pay nampum, kəɗamgən a lolohõ na Kerit, dəmmba pay nampum na Yurden.

⁴ Kəsəngən iŋkile a lolohõ vani, nəɗi sitik wən nan sit gaŋgrekeɗ dəkisukungən əzəm adaka.»

⁵ Ndən mbat gəɗe' va əpel na Yawe, mbat ɗew əsan a lolohõ na Kerit, dəmmba pay nampum na Yurden.

⁶ Gaŋgrekeɗ əkiyaŋ sənən peŋ də slu də mompummo gəm peŋ də slu də moskoyo; a lolohõk adawsa iŋkile.

Eliya anat gagəbay da a Sarepta

⁷ Addəv pay siɗikke na, lolohõ nak kpa'ə, vi buwən dəzi aka dələv ɓa.

⁸ Əpel na Yawe ade sən dawnəh na:

⁹ «Asili, dok a Sarepta na Sidon, kəsokgən adaka; nəɗi sətək wən nan sət guluk gagəbay sədak nawzəmguko.»

¹⁰ Ndən le' tek a Sarepta, agap a maddamba walaŋgəla-metiŋ, guluk gagəbay yakəŋ adak əkraw seseme, ndən dah iyəta, amna: «Kamə ambaɗ su iŋkile siɗikke sə hinziw anokda, nəsəgəni.»

¹¹ Ndət tek əmbaɗa, ndən dah iyəta, amna: «Kamə, akay su peŋ vurŋgbu' avoko!»

¹² Yaŋ təmna: «Va Yawe Maŋgəlva nok asan madarani, zəga mədan tay ɓa, gəpa aza vaw nduɗuki kaka' a mozgoy anawda, gəm malək təɗək a bəbər anawda vani; in yakəŋ əkraw sesemek sula na, wanəmbat eŋgil kadawdət su də wətuwa; məzəmətgən kawga əmta kana.»

¹³ Eliya aɓsət na: «Kəgeslne' ɓa! Dok aɗɗa va əpel noko; agəɗ su peŋ-məslepreke tagay kaka'ə, kəki suwətgəni; kəmbatgən əda nok də wutuk ba'ə.

¹⁴ Vi vaŋki Yawe Maŋgəlva na Israyel anahə: Gəpa agrak na sə mozgoy ɓa, mel akkpa' na sə bəbər ɓa, hã gap pay Yawe adawzi buwən aka dəlvafuŋ.»

¹⁵ Ndət tek gəɗe' va əpel na Eliya; azəmaŋgə, ndəta, ndəni gəm ɗiy nata hã gap pay ɓaɓayə.

¹⁶ Gəpa dəgrak sə mozgoy ɓa, mẽl dəkkpa' sə bəbər ɓa, va əpel na Yawe anah də ma məskəleŋ Eliya.

Eliya ahhurgənək wətət gagəbaya

¹⁷ Dərɓeget alabaraɗeski: wətət guluk ma-gəla nak azəgək gbəgba'a. Gbəgba' nan armak dərwadərwa, hã gap əmpəs nan ɗe'i.

¹⁸ Yaŋ təɓsən Eliya na: «Miy a walaŋgu də is di ɗəf na Maŋgəlva? Kəde anawda əfɗahan mambray naw sən Maŋgəlva ka wətu dəmtəgən sa?»

¹⁹ Aɓsət na: «Apsu wutuk van ɗa!» Atafək səvata, ambatək addəv gəla məzarŋgasla, a təki adawvoŋgo, ndən ɗufgən aka zəga nawvoŋ nani.

²⁰ Yaŋ ahəm sən Yawe, amna: «Yawe Maŋgəlva nawa, mok aka əgəɗ sət mbərayən sət gagəbay məs nəde molhõyõ anatda kəŋ, kawbay wətət sa?»

²¹ Ammaɗək təl hoku aka wiyən naka, ahəm sən Yawe, dawnəh na: «Yawe Maŋgəlva nawa kamə, kəta wiynəŋ dəhhuru!»

²² Yawe pərəm wəla Eliya, muzliya nak adderke, ambəlka.

²³ Eliya wiyən nak gəm, apirikgin səddəv giziŋ na məzarŋgasla nak addəv gəla an nafuŋ, apsət mani; Eliya amna: «Wutuk yaŋ madarani.»

²⁴ Guluk nak təɓsən Eliya na: «Ha'aw, kakaŋ nəsənək na, ɗəf na Maŋgəlva kənani, wəpel na Yawe yi amok gesiŋ gesiŋgi.»