1Milyeŋge 16 - Bible en Guidar

¹ Əpel na Yawe ade sənək Yehu wətən Hanani, aka wən na Ba'esa, dawnəh na:

² «Adan nəttu' hologudum səzoko, nəɗiyuk məlĩ aket ɗiy naw na Israyel, yaŋ kəgəm təl Yerobo'am, is toŋgit ɗiy naw mə Israyelɗe addəv mambray ka dədan suwəngən gədəvu dit mambrayɗe neti,

³ wanəpalkat Ba'esa də gəla nani gəm wanəkkpaŋgan gəla nok va na Yerobo'am wətən Nebat.

⁴ Ɗəf neŋgil ana Ba'esa da dədamta a walaŋgəla-metiŋ pak kirɗe dədampərnəni; an dədamta awra pak biŋgeɗ na disiŋ dədawzəməni.»

⁵ Madembirgit wəzeɗe na Ba'esa, en agəɗə gəm wəzeɗe gagdak nani, məvertiŋ addəv ɗerewel na wəza net milyeŋge na Israyel ɓa sa?

⁶ Ba'esa amtəka, azbetik efiŋgiɗni, məndəkni a Tirsa. Ela wətən dəgəm məlĩ a gəlani.

⁷ Də ma məskəleŋ Yehu wətən Hanani yi, Yawe, apel sən Ba'esa də gəla nan pak aka wən sula: Taka, sən mambray agəɗ sən kiyən ama hara Yawe, adan sən gədəvən də zəga naɗɗa nan səɗek va Yerobo'am agəɗə, masulani, vi aŋgroɓ zev Yerobo'am vanəŋka.

Ela, məlĩ na Israyel

⁸ Aka wəzva makaklaw sula kiyən sləre na Asa aka əzəm məlĩ a Yuda, Ela wətən Ba'esa agəm məlĩ aka Israyel a Tirsa agəɗ wəzva sula.

⁹ Zimri gawla nan, daya na wərasl net mawteɗ nawgay nan atuvur wən akan nawbayən. Dasək na, məlĩ tay a Tirsa, eŋgil ana Arsa da, daya naka gəla na məlyã, tay əsa mbazla kiyən gərəŋgərəŋgə.

¹⁰ Zimri toŋ bay əbayən zamə, ndən ɗew məlĩ a gəlan aka əzva makaklaw sula kiyən buhul na Asa, aka əzəm məlĩ a Yuda.

¹¹ Səza ateŋ aka məlĩ ləŋgə, asan aka mazaŋga na məlĩ nani, azanək zev Ba'esa kakãhə, dəmbər sən ɗəf taka dayday mizilin ɓa, məzəmgəla ɓa, may baynan dayday ɓa.

¹² Zimri azetik ɗiy na Ba'esa pak kakãhə, va əpel na Yawe, anah də ma məskəleŋ Yehu, aka Ba'esa.

¹³ Aka mambray na Ba'esa agəɗ pak gəm an na Ela wətən agəɗə, mambray an aɗɗaŋ sən kiyti, dit en atoŋgitin mə Israyelɗe addəvit kawdan sən gədəv Yawe Maŋgəlva na Israyel, dit zəgeɗ net en ɗariŋki.

¹⁴ Madembirgit wəzeɗe na Ela, en agəɗ pak məvertiŋ addəv ɗerewel na Wəza net milyeŋge ɗayɗay na Israyel ɓa sa?

Zimri, məlĩ na Israyel

¹⁵ Aka wəzva, makaklaw sula kiyən buhul na Asa aka əzəm məlĩ a Yuda, Zimri agəɗək lumu taka aka məlĩ a Tirsa. Məzəlpaŋ azaɓanənək zit kadda wəmõh Gibeton səvet mə Filistiɗe.

¹⁶ Məzəlpaŋ nek aprəmənən na: «Zimri atuvuruk wən aka məlyã, abayəka.» Dəpaska'e a dibirgidik mə Israyelɗe pak aɗiynən Omri, daya net məzəlpaŋ ka məlĩ na Israyel.

¹⁷ Omri, dit mə Israyelɗe pak apeŋgeŋgik sə Gibeton, asərŋgəslnən Tirsa.

¹⁸ Adan Zimri, awla na, məgəmni walaŋgəla mətiŋ səkay, ambat əgul addəv giziŋ taka naddəv gəla na məlyã, ndən offo ta' sən gəla na məlĩ akan dəvan dəvani, ndən zamə.

¹⁹ Aka batam mambray an agəɗə, agəɗək zəga daryaw ama hara Yawe, azbanək wədaw na Yerobo'am, azbanək mambray nan də an atoŋgit mə Israyelɗe addəvni.

²⁰ Madembirgit wəzeɗe na Zimri, də wən an atuvur na, məvertiŋ addəv ɗerewel na Weza ɗayɗay net milyeŋge na Israyel ɓa sa?

²¹ Yaŋ mə Israyelɗe awɗakaŋ gəlet sula: pəɗak net ɗiy meɓɓet ammba Tibni wətən Ginat, dəsangən ka məlĩ aketi; pəɗak meɓɓet ammba Omri.

²² Ɗiy dəzbanən Omri, adayaŋgək kiyit en dəzbanən Tibni wətən Ginat. Tibni zamə, Omri akkpaŋ məlyã.

Omri, məlĩ na Israyel

²³ Gala wəzva makaklaw hoku kiyən taka na Asa aka əzəm məlĩ a Yuda yi Omri asan məlĩ aka Israyel wəzva kəlaw kiyən sula. Wəzva sləre azəm məlĩ a Tirsa,

²⁴ ndən ləbəh ki gərəm na Samari səva Semer aka təbəz babar gabal sləre. Arka ki gərəm naka, alvan walaŋgəla-metiŋ arkə nak va iya na Semer, daya na ki gərəm na Samari.

²⁵ Omri agəɗek mbərayən ama hara Yawe, daykiyit en dəssoŋ daabəŋ kiyən pakə.

²⁶ Ndən daw aka tive na Yerobo'am wətən Nebat dekdeki, azbanək mambray an atoŋgit mə Israyelɗe addəvən, hã gap nawdan sən gədəv Yawe Maŋgəlva na Israyel, dit zəgeɗ net ɗariŋki.

²⁷ Madembirgit wəzeɗe na Omri, an agəɗə gəm wəzeɗe gagdakɗe nani, məvertiŋ addəv ɗerewel na Wəza ɗayɗay net milyeŋge na Israyel ɓa sa?

²⁸ Omri zamə azbetik efiŋgiɗni, məndəkni a Samari. Akab, wətən dəgəm məlĩ a gəlani.

Akab, məlĩ na Israyel

²⁹ Akab, wətən Omri, ɗew məlĩ aka Israyel, aka əzva na Asa makaklaw hoku kiyən dodopoɗo, aka məlĩ a Yuda. Akab, wətən Omri, azəmək məlĩ, əzva kaklaw sula kiyən sula, aka Israyel a Samari.

³⁰ Akab, wətən Omri, agəɗek zəga mbərayən ama hara Yawe, daykiyit en daabəŋ kini.

³¹ Wəzban təl Yerobo'am wətən Nebat addəv mambray nanəŋ pak gəsi azani, yaŋ ambat agəmət Izabel, wətən Etba'al, məlĩ net mə Sidonɗe ka goni, ndən mbat agəɗ sən wəza sən Ba'al, appu' abani.

³² Arkək gəla sən Ba'al a Samari aziwgin gəlamatuya sən Ba'al addəvən.

³³ Akab ampək Astera: An adaɗɗa pak nawdan sən gədəv Yawe Maŋgəlva na Israyeli yi, daykiyit milyeŋge en dəssoŋ daabəŋ kiyən pakə.

³⁴ Aka pay nan na, Hiyel na Betel, Arkan walaŋgəla na Yeriko: aɗi gabba zlava na walaŋgəla van ka əmta na Abiram wətən an daya, azi maddambeɗe nan ka əmta na Segub wətən an sawã va Yawe anah də ma Yosuwa, wətən Nun.