1Milyeŋge 15 - Bible en Guidar

Abiyam, məlĩ na Yuda

¹ Aka əzva makəlaw kiyən dodopoɗo'o na Yerobo'am wətən Nebat, aka məlĩ yi, Abiyam agəm məlĩ a Yuda.

² Əzva hoku azəm məlĩ a Yerusalem. Iya nat man na, Ma'aka wətən Absalom.

³ Azbanək əɗɗa mambray an afən agəɗ daabəŋ kiyən pakə; makran dəziw aka Yawe Maŋgəlva nan va na Davit afən ɓa.

⁴ Ammba Davit yi, Yawe Maŋgəlva nan apsən lalam a Yerusalem, apsən wiyən mizilin dərɓagani, dərmagən Yerusalem:

⁵ vi Davit agəɗək zəga təstəs ama hara Yawe, dədder səka an aɗi sən wən nan siɗikke dayday pay asan egge ɓa, abbər aka wən na Uri mə Hitti.

⁶ Wəgay asanək a weleŋgit may Robo'am də Yerobo'am, pay ənziya nan egge pakə.

⁷ Medembirgit wəzeɗe na Abiyam, an agəɗ pak məvertiŋ addəv ɗerewel na Wəza net milyeŋge na Yuda ɓa sa? Wəgay asanək a weleŋgit may Abiyam də Yerobo'am.

⁸ Abiyam amtəka, azbetik efiŋgiɗni, məndəkni a walaŋgəla-metiŋ na Davit; yaŋ Asa wətən agəm məlĩ a gəlani.

Asa, məlĩ na Yuda

⁹ Aka wəzva makaklaw sula na əzəm məlĩ na Yerobo'am a Israyel, Asa agəm məlĩ na Yuda.

¹⁰ Azəmək məlĩ a Yerusalem, əzva kaklaw poɗo kiyən taka; iya nat man na, Ma'aka wətən Absalom.

¹¹ Asa agəɗək zəga də tiven ama hara Yawe va Davit afəni.

¹² Azetik məɗɗaŋ polkoyo də zit a matuya səka dəlva, azetik mbərwəkɗe en efiŋgiɗin aɗɗaŋ pakə.

¹³ Ya anat man Ma'aka na, aggbuktək səka Iya na ma-gagdaka, vi təmpək zəga net wil ka Astera, yaŋ Asa abəl zəga net wil naka, aɗi sən offo a lolohõ na Kedron.

¹⁴ Də as pak, gəleɗe-nettuyeŋge mərket dəgrakaŋ ɓa hara. Ya na, makra Asa asanək təstəs aka Yawe pay ənziya nan egge pakə.

¹⁵ Atoŋgitik zəgeɗ en afən aɗi sən Yawe gəm en aɗi sən kiyən addəv Gəla na Yawe: təbəz babara, meleŋge gəm zəgeɗ temtemi.

¹⁶ Wəgay agəɗək a weleŋgit may Asa də Ba'esa məlĩ na Israyel, pay ənziya net egge pakə.

¹⁷ Yaŋ Ba'esa, məlĩ na Israyel ambat əwak sən məlĩ na Yuda də əgaya, yaŋ atəŋ ərka ki Rama vi kawsuk tive səba Asa məlĩ na Yuda ka adawtoŋ may adawgilyen ɓa.

¹⁸ Asa andek təbəz babar gəm meleŋge dəmbraŋ məzeɓet addəv Gəla na Yawe gəm en mezeɓet eŋgil ana məlĩ da, məlĩ Asa epsit məɗɗaŋ wəza nan kawkesin Ben-Hadad wətən Tabrimmon wətən Heziyon məlĩ na Aram dəsan a Damas dawnah na:

¹⁹ «Wənmiyna tay aka walaŋgu də isi, a weleŋgit may əbba də afuko, ndəni nəslən suk əvəla, təbəz babara gəm meleŋge. Dok əppar wənmiyna nok də Ba'esa məlĩ na Israyel asna awaksu na də əgay ɗah əmpa ɓa.»

²⁰ Ben-Hadad atafək wən na məlĩ Asa; aslinik deyeɗe net məzəlpaŋ nan aket walaŋgəleɗe na Israyel, ammussik may Iyon, Dan, Abel-Bet-Ma'aka, ki va na Kinneret gəm dələv na Neftali azet basə.

²¹ Səza Ba'esa aprəm wənəs ləŋgə, ndən mbəgən ərka Rama, ndən ɗew a Tirsa.

²² Yaŋ məlĩ Asa aye ɗiy na Yuda pak məza mbəksa ɓa; asekinik gərmeŋge dit wəleŋɗe məs Ba'esa adarka ki Rama, yaŋ məlĩ Asa arka Geba na Benyamin gəm Mispa dənɗaŋ.

²³ Madembirgit wəzeɗe na Asa pakə, wəza gagdakɗe nan pakə, an agəɗə dit walaŋgəleɗe gugriɗ arkə na məvertiŋ addəv ɗerewel na Wəza net milyeŋge na Yuda ɓa sa? Aka wəgal nani yi azəm sahã aza tələn kaka'ə.

²⁴ Asa amtəka, məndəkni azet migilin a walaŋgəla-metiŋ na Davit, afəni. Yosafat wətəni yi dəgəm məlĩ a gəlani.

Nadab, məlĩ na Israyel

²⁵ Nadab wətən Yerobo'am agəmək məlĩ aka Israyel aka əzva masula'ən na Asa məlĩ na Yuda aka məlyã, azəmək məlĩ aka Israyel əzva sula.

²⁶ Agəɗək mbərayən ama hara Yawe; agəmək təl afən də mambray nan an atoŋgit mə Israyelɗe əɗɗa mambraya.

²⁷ Yas Ba'esa, wətən Ahiyya, səddəv mahəlfa na Isakar atuvur wən akani, Ba'esa abay a Gibeton net mə Filistiɗe, aka may Nadab dit mə Israyelɗe dəwənnet asərŋgəslnək Gibeton vani.

²⁸ Ba'esa, abay Nadab aka əzva mohokon na Asa aka məlĩ a Yuda, agəm məlĩ a gəlani.

²⁹ Adan agəm məlĩ ləŋgə, aŋgroɓik ɗiy na mahəlfa na Yerobo'am pakə, ɗəf tay apəl sən məza dəzan ɓa ɓa, va Yawe anah də ma məskəleŋ Ahiyya məs na Silo,

³⁰ aka batam mambray na Yerobo'am, an agəɗ sən kini, də an atoŋgit mə Israyelɗe də wədan sən gədəv Yawe Maŋgəlva na Israyel diyɗa.

³¹ Madembirgit wəzeɗe na Nadab də an agəɗ pak məvertiŋ addəv ɗerewel na Wəza ɗayɗay net milyeŋge na Israyel ɓa sa?

³² Wəgay asanək a weleŋgit may Asa də Ba'esa, məlĩ na Israyel, pay nanziya egge net pakə.

Ba'esa, məlĩ na Israyel

³³ Aka əzva mohokon na Asa aka əzəm məlĩ a Yuda, Ba'esa, wətən Ahiyya, agəm məlĩ aka Israyel dəwənnani, asanək əzəm məlĩ a Tirsa əzva kaklaw sula kiyən poɗo.

³⁴ Agəɗək mbərayən diyɗa ama hara Yawe; azbanək təl Yerobo'am afəni, də wətoŋgit mə Israyelɗe addəv mambraya.