1Milyeŋge 14 - Bible en Guidar

Əggrak əzəm məlĩ na Yerobo'am

¹ Aka pay nanəs na, Abiya wətən Yerobo'am, azəgək gbəgba'a.

² Yerobo'am anah sət ɗak nan na: «Asil kamə, akkpaŋgan zuko, adawsənkun na, ga Yerobo'am kənani ɓa, sissiŋ dok a Silo. Məskəleŋ Ahiyya tay adaka; ndəni yi, dənah su na wanəsaw məlĩ net ɗiyiŋki.

³ Kəndəgən peŋɗe kəlaw, moŋgoloyɗe siɗikke gəm mesteɓe na amama, kəmbatgən ədawrəhən; wanah suk an dədaɗɗa aka wiyna.»

⁴ Ga Yerobo'am təgəɗək va mənah səta; təsil təl a Silo, təgapək eŋgil ana Ahiyya da. Ahiyya awɓap ula ɓa, vi haran agəɗək ŋgburohõ sən əgala.

⁵ Yawe anah sən Ahiyya na: «Guluk na Yerobo'am yakəŋ əzzat aka tive, kassohõk wən na wətət gbəgba'a. Watəɗi zət ka malakakə, kənah sətgən, vana vana.»

⁶ Səza Ahiyya aprəm tələt kurof a maddamba ləŋgə, aɓsət na: «Atoŋgu, ga Yerobo'am! Vimi kədawɗi zuk va malakak di? Məslənwi yi, nawpel suk wən ɓəɓəla.

⁷ Dok anah sən Yerobo'am na: “Yawe Maŋgəlva na Israyel amna: Adan nəɗiyək kiyuk sə weleŋgit ɗiyi, nəɗikuk ka məlĩ aket ɗiy naw mə Israyelɗe;

⁸ nəmõhuk məlĩ səva zev Davit nəpsuko; yaŋ is tat va gawla naw Davit ɓa, dərme wəsəɓɗe naw dəzbaw də makran taka, zəga təstəs adaɗɗa kaka' ama harawa;

⁹ Kəgəɗək mbərayən daykiyit ɗiy en dəssoŋ daabəŋ kiyko: kəmbatək əvot meŋgilveɗ meɓɓet dit zəgeɗkameŋgilveɗi, de' ədan su gədəvwa; naw is firik əzgaw dərɓogoko.

¹⁰ Vini yi, wanəki wəray metiŋgin aka gəla na Yerobo'am, wanəzet zel səna Yerobo'am da, belemɗe dit ɗiy en na kiyit na Israyel pakə; wanəkkpor zev Yerobo'am pak va adakkporoŋ pəlwit zəgeɗ sləpatə.

¹¹ Ɗəf neŋgil ana Yerobo'am da dədamta a walaŋgəla-metiŋgin pak kirɗe dədampərnəni; an dədamta awra pak biŋgeɗ na disiŋ dədawzəməni, vi Yawe dənah vaska.”»

¹² Noko, asil dok anokda; əgap nok a walaŋgəla-metiŋ, wiyin wamtə.

¹³ Ɗiy na Israyel pak waɗɗanən gəlabayən, wandəkəni, vi ndəni kaka' naddəv gəla na Yerobo'am takərgən nawvoŋgən addəv magamasə. Səddəv gəla na Yerobo'am na, ndəni məs Yawe Maŋgəlva na Israyel arah zəga moggon azan kaka'ə.

¹⁴ Yawe waɗi məlĩ maɓɓan aka Israyel məs dədawzan gəla na Yerobo'am kakãhə. Dəpaŋki, miy nədawnəhəs hara di? Kəkaŋki kpakə!

¹⁵ Yawe warbə sit mə Israyelɗe; wakkereŋ aban va eflere eret iŋkile. Waptiw mə Israyelɗe gbuh gbuh səka dələv moggon an apsit efiŋgiɗtiŋka, watəraygit dəgar ki məlpa, vi ampaŋgək Astera, adan sənən gədəv Yawe.

¹⁶ Wappet mə Israyelɗe, vi Yerobo'am agəɗək mambray gəm atoŋgitik ɗiy na Israyel addəv mambraya.

¹⁷ Ga Yerobo'am təsilik tələk əgap a Tirsa. Gala təzlak tələt aka maddamba, wiyin nak zamə.

¹⁸ Andəkənka, mə Israyelɗe pakgit aɗɗanənək gəlabayən, va əpel na Yawe anah də ma məskəleŋ Ahiyya gawla nani.

¹⁹ Medembirgit wəzeɗe na Yerobo'am: wəlpa də əzəm məlĩ nan yeŋ məverit pak addəv ɗerewel net wəzeɗe ɗayɗay net milyeŋge na Israyel.

²⁰ Wəzva kaklaw sula kiyən sula, Yerobo'am asan aka məlyã; amtək azbetik migilni. Nadab, wətəni dəgəm məlĩ a gəlani.

Milyeŋge na Yuda gəm na Israyel ( 14:21—16:34 ) Əggrak əzəm məlĩ na Robo'am aka Yuda

²¹ Robo'am wətən Salomoŋ asanək məlĩ aka Yuda; tay də əzva kaklaw poɗo kiyən taka pay agəm məlyã, azəmək məlĩ a Yerusalem, əzva kəlaw kiyən buhul, walaŋgəla məs Yawe awel səret mahəlfaɗe na Israyel pak vi kawɗi iya nan adaka. Iya nat man na, Na'ama mə Ammonkə.

²² Mə Yudeɗ aɗɗaŋgək zəga mbərayən ama hara Yawe, də mambray an aɗɗaŋgi yi, asilgin sələh nan day ki an net efiŋgiɗit aɗɗaŋgə.

²³ Net van zlaŋ arkaŋgək gəleɗe-nettuyeŋge, ampaŋgək serekɗe dit Astereɗ aket mossorgoɗe pakə may ammba wəlaŋga məndufun pakə.

²⁴ Məɗɗaŋ polkoyo də zit a matuya tahəŋ addəv dəlva, aɗɗaŋgək zəga narba wil va net ɗiy-ɗar məs Yawe arɓehet səbet mə Israyelɗe naka.

²⁵ Aka əzva masle'en na Robo'am aka məlyã, Sisak məlĩ na Eziptə asilsinik Yerusalem də wəgaya.

²⁶ Andak arya məzaɓan naddəv Gəla na Yawe də an nana məlĩ da. Andak zəga bayman gəm andek barayɗe na meleŋge məs Salomoŋ azaɓə.

²⁷ Yas məlĩ Robo'am azaɓ barayɗe na təbəz pepreŋ a gəleti, appan wən net avet deyeɗe net məzəlpaŋgə, məs dədawganən meŋgle na məlyã.

²⁸ Vasna va məlĩ ambat addəv Gəla na Yawe pakə, məgaŋ meŋgle əkiyini, asna ndəɗaŋ əmndegetin addəv gəla nawga naka.

²⁹ Medembirgit wəzeɗe na Robo'am, an agəɗ pakə, ndəɗaŋgə məverit addəv ɗerewel na Wəza net milyeŋge na Yuda ɓa sa?

³⁰ Wəgay asanək pay pak a walaŋ Robo'am də Yerobo'am.

³¹ Robo'am amtəka, azbetik efiŋgiɗni, məndəkni addəv walaŋgəla-metiŋ na Davit azet migilni. Iya nat man na, Na'ama, mə Ammonkə. Abiyam, wətən dəgəm məlĩ a gəlani.